ବିଲ୍ ପାସ ନାଁରେ ରାତିରେ ନଶୋଇ ଦିନରେ ଶୋଇ ପଡ଼ିଲେ ଲୋକଙ୍କ ସରକାର

ଭୁବନେଶ୍ବର: ମନ୍ତ୍ରୀ ଶୋଇଛନ୍ତି । ଏକଥା ଆଜି ରାଜ୍ୟର ଅଧିକାଂଶ ମନ୍ତ୍ରୀଙ୍କ ସରକାରୀ ବାସଭବନରେ ଶୁଣିବାକୁ ମିଳିଛି । ରାତିସାରା ବିଧାନସଭା ଚଳାଇ ଦୁଇଟି ବିଲ ପାସ ହେବା ପରେ ନିଘୋଡ ନିଦରେ ଶୋଇ ପଡ଼ିଛନ୍ତି ରାଜ୍ୟ ସରକାର । ସରକାରୀ ବାସଭବନରେ ସିଧା ସିଧା ଗେଟ ପାଖରେ ସୁରକ୍ଷା କର୍ମୀଙ୍କୁ ନିର୍ଦ୍ଦେଶ ଦେଇଥିଲେ ଯିଏ ଆସିବ କହିବ, ମନ୍ତ୍ରୀ ଶୋଇଛନ୍ତି । ଏହାକୁ ନେଇ ରାଜଧାନୀରେ ଏକ ବିଚିତ୍ର ସ୍ଥିତି ସୃଷ୍ଟି ହୋଇଥିଲା ।

ବିଧାନସଭା ଚାଲିଥିବାବେଳେ ଖାମଖିଆଲି ଭାବେ ଗୃହକାର୍ଯ୍ୟ ଚାଲିଥିଲା । ହେଲେ ସରିବା ବେଳକୁ ରାତିସାରା ହେଲେ ଅନିଦ୍ରା । ହାଲିଆ ହୋଇ ସକାଳେ ଶୋଇପଡ଼ିଲେ ଲୋକଙ୍କ ସରକାର । ଏପରି ଶୋଇଲେ ଯେ କାହାରିକୁ ଦେଖା ଦେବାକୁ ବି ମନା କରିଦେଲେ ଅନେକ ମନ୍ତ୍ରୀ । ବୁଧବାର ବିଧାନସଭାରେ ବିଶ୍ବବିଦ୍ୟାଳୟ ସଂଶୋଧନ ବିଲ ଓ ରାଜ୍ୟ ରାଜପଥ ପ୍ରାଧିକରଣ ବିଲ ନେଇ ସାରା ରାତି ଆଲୋଚନା ଚାଲିଲା । ଶେଷରେ ବିଲ୍ ପାସ୍ ହୋଇଥିଲା । ମାତ୍ର ଦିନରେ ଏପରି ଶୋଇପଡିଲେ ଯେ ଲୋକଙ୍କ କଥା ଶୁଣିବା ଲାଗି ବି ଚାହିଁଲେ ନାହିଁ । ନିର୍ଦ୍ଧାରିତ ସମୟ ପୂର୍ବରୁ ଗୃହ ବନ୍ଦ କରାଯାଇଥିବାବେଳେ ତରବରିଆ ଭାବେ ଦୁଇଟି ବିଲ୍ ପାସ୍ କରିଥିଲେ ସରକାର । ଆଜି ଦିନ ତମାମ ଶୋଇଥିବାରୁ ମନ୍ତ୍ରୀ କାହାରିକୁ ଭେଟିବେ ନାହିଁ ବୋଲି କହିଥିଲେ ସୁରକ୍ଷା କର୍ମୀ ।

ଆମେ ପଞ୍ଚାୟତରାଜ ମନ୍ତ୍ରୀ ରବି ନାରାୟଣ ନାୟକଙ୍କ ସରକାରୀ ବସଭବନରୁ ସିଧା ଯାଇଥିଲୁ ରାଜସ୍ବ ମନ୍ତ୍ରୀ ସୁରେଶ ପୂଜାରୀଙ୍କ ବାସଭବନକୁ, ସବୁଠି ଏକା ସ୍ଥିତି । ରାଜସ୍ବ ମନ୍ତ୍ରୀଙ୍କ ପରେ ଆମେ ପହଞ୍ଚିଥିଲୁ ନଗର ଉନ୍ନୟନ ମନ୍ତ୍ରୀ କୃଷଚନ୍ଦ୍ର ମହାପାତ୍ରଙ୍କ ବାସଭବନରେ । ସେଠାରେ ବି ଶୁଣିଲୁ ସମାନ ଉତ୍ତର । ମନ୍ତ୍ରୀ ଶୋଇଥିଲେ, ତେଣେ ନିଜର ସମସ୍ୟା କଥା କହିବା ପାଇଁ ବାସଭବନ ଆଗରେ ଘଣ୍ଟା ଘଣ୍ଟା ଧରି ବସ୍ତି ବାସିନ୍ଦା ଠିଆ ହୋଇଥିବା ଦେଖିବାକୁ ମିଳିଥିଲା । ପରେ ଆମେ ପହଞ୍ଚିଥିଲୁ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ, ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶରାମ ଖୁଣ୍ଟିଆଙ୍କ ବାସଭବନରେ । ସେମାନେ ବି ଶୋଇଥିଲେ ଗାଢ଼ ନିଦରେ । ଏହାପରେ ସମବାୟ ମନ୍ତ୍ରୀ ପ୍ରଦୀପ ବଳସାମାନ୍ତ ଓ କୃଷ୍ଣଚନ୍ଦ୍ର ପାତ୍ରଙ୍କ ସରକାରୀ ବାସଭବନରେ ପହଞ୍ଚିଥିଲୁ । ସେଠି ବି ସମାନ ଚିତ୍ର ।

ବିଧାନସଭାରେ ବିଲ୍ ପାସ କରିବା ପରେ ରାଜ୍ୟ ସରକାର ଶୋଇପଡ଼ିଥିବା ବେଳେ ଚେଉଁଛନ୍ତି ବିରୋଧୀ । କଂଗ୍ରେସ ବିଧାୟକମାନେ ଏକାଠି ହୋଇ ପ୍ରେସମିଟ କରି ସରକାରଙ୍କୁ ଟାର୍ଗେଟ କରିଥିଲେ । ବିଧାୟକ ମଙ୍ଗୁ ଖିଲ କହିଛନ୍ତି, ମନ୍ତ୍ରୀମାନେ ଶୋଇପଡ଼ିଲେ ସରକାର କିପରି ଚାଲିବ । ଅନ୍ୟପଟେ ବରିଷ୍ଠ ବିଜେଡ଼ି ବିଧାୟକ ଅରୁଣ ସାହୁ କହିଛନ୍ତି, ଅଦୃଶ୍ୟ ଚାପରେ ପଡ଼ି ଶାସକ ଦଳର ମନ୍ତ୍ରୀମାନେ ଇଚ୍ଛା ନଥିଲେ ବି ବିଲ ପାସ କରି କ୍ଲାନ୍ତ ହୋଇପଡ଼ିଛନ୍ତି । ରାଜନୀତି ସମୀକ୍ଷକମାନେ ମଧ୍ୟ ଭିନ୍ନ ଯୁକ୍ତି ବାଢିଛନ୍ତି ।