ସାତ ବର୍ଷ ପରେ ମା’ ହେଲେ ଥରକରେ ଜନ୍ମ କଲେ ୨ ପୁଅ, ୩ ଝିଅ

ରାଜସ୍ଥାନ : ମା’ ହେବାର ସୌଭାଗ୍ୟ ଭାଗ୍ୟରେ ଥିଲେ ମିଳେ । ଆଜିକାଲିର ଜୀବନଶୈଳୀ କାରଣରୁ ବର୍ତ୍ତମାନ ମାତୃତ୍ୱଲାଭରେ ଅନେକ ପ୍ରକାର ଅସୁବିଧା ଦେଖାଯାଉଛି । ଅଧିକାଂଶ ମହିଳା ଏଥିପାଇଁ ଡାକ୍ତରଙ୍କ ପରାମର୍ଶ ମଧ୍ୟ ଲୋଡ଼ୁଛନ୍ତି । କିଏ ମାତୃତ୍ୱଲାଭ କରିବାରେ ସଫଳ ହେଉନି ତ କାହାର ପିଲା ଜନ୍ମ ହେବା ପରେ ସ୍ୱାସ୍ଥ୍ୟ ସମସ୍ୟା ଦେଖାଦେଉଛି । ରାଜସ୍ଥାନର କରୋଲି ଅଞ୍ଚଳରେ ଥରକରେ ୫ଟି ଶିଶୁଙ୍କୁ ଜନ୍ମ ଦେଇ ଚର୍ଚ୍ଚାରେ ୨୫ ବର୍ଷୀୟ ମହିଳା । ମହିଳା ଜଣକ ହେଉଛନ୍ତି ରେସ୍ମା । ତାଙ୍କ ସ୍ୱାମୀ ଅସ୍କ ଅଲ୍ଲି କେରଳରେ ରହି କାମ କରୁଥିବା ବେଳେ ରେସ୍ମା ପ୍ରଥମ ଥର କରି ମାତୃତ୍ୱଲାଭ କରିଥିଲେ । ଏଥିମଧ୍ୟରୁ ଦୁଇ ଜଣ ପୁଅ ଥିବାବେଳେ ୩ଟି ଝିଅ ବୋଲି ଜଣାପଡ଼ିଛି । ସମସ୍ତ ଶିଶୁ ୭ ମାସରେ ଜନ୍ମ ଅର୍ଥାତ୍ ପ୍ରି-ମ୍ୟାଚୋର ବେବି ହୋଇଥିବାରୁ ସମସ୍ତଙ୍କର ସ୍ୱାସ୍ଥ୍ୟବସ୍ଥା ଦୁର୍ବଳ ଥିଲା ।

ମହିଳାଙ୍କ କହିବାନୁସାରେ ୨୦୧୫ରେ ତାଙ୍କର ବିବାହ ହୋଇଥିବା ବେଳେ ଦୀର୍ଘ ୭ ବର୍ଷ ଧରି ତାଙ୍କର କୌଣସି ସନ୍ତାନସନ୍ତତି ହେଉନଥିଲା । ଅନେକ ଡାକ୍ତରଙ୍କ ପରମର୍ଶ ନେବା ପରେ ମଧ୍ୟ କୌଣସି ସଫଳତା ଦେଖାଦେଇନଥିଲା । ଏତେ ବର୍ଷର ବ୍ୟବଧାନ ପରେ ମାତୃତ୍ୱଲାଭର ସୌଭାଗ୍ୟ ଅର୍ଜନ କରିଥିବାରୁ ବହୁତ ଖୁସି ଥିଲେ ରେସ୍ମା । ୫ଟି ଶିଶୁ ୧ରୁ ଦେଢ଼ ମିନିଟ୍ ବ୍ୟବଧାନରେ ଜନ୍ମ ହୋଇଥିବା ବେଳେ ଓଜନ ଥିଲା ୩୦୦ରୁ ୬୦୦ ଗ୍ରାମ୍ । ଜନ୍ମ ହୋଇଥିବା ସମସ୍ତ ଶିଶୁ ଦୁର୍ବଳ ହୋଇଥିବାରୁ ଉନ୍ନତ ଚିକିତ୍ସା ପାଇଁ ଶିଶୁମାନଙ୍କୁ ଜୟପୁରସ୍ଥିତ ଜେକେ ଲନ୍ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ମାତ୍ର, ଦୁର୍ଭାଗ୍ୟବଶତଃ ଡାକ୍ତରଖାନାକୁ ନେବା ସମୟରେ ବାଟରେ ହିଁ ସମସ୍ତ ଶିଶୁ ମୃତ୍ୟୁବରଣ କରିଥିଲେ । ନବଜାତ ଶିଶୁଙ୍କୁ ହରାଇବା ପରେ ରେସ୍ମା ସମ୍ପୂର୍ଣ୍ଣ ଭାଙ୍ଗିପଡ଼ିଥିବା ସ୍ୱାମୀ କହିଛନ୍ତି ।