Money Laundering Case: ଚତୁର୍ଥ ଥର ପାଇଁ ED ପଚରାଉଚରାରେ ସାମିଲ ହେଲେନି ଜ୍ୟାକଲିନ୍

ମୁମ୍ବାଇ: ସୋମବାର ବଲିଉଡ ଅଭିନେତ୍ରୀ ଜ୍ୟାକଲିନ ଫର୍ଣ୍ଣାଣ୍ଡିଜ ଚତୁର୍ଥ ଥର ପାଇଁ ୨୦୦ କୋଟି ମନି ଲଣ୍ଡରିଂ ମାମଲାରେ ଏନଫୋର୍ସମେଣ୍ଟ ଡାଇରେକ୍ଟୋରେଟ (ଇଡି)ରେ ପଚରାଉଚରା ପାଇଁ ସାମିଲ ହେଲେ ନାହିଁ । ସୋମବାର ଦିନ ଇଡିରେ ସେ ହାଜର ହେବାର ଥିଲେ ମଧ୍ୟ ସେ ଏଥର ଉପସ୍ଥିତ ରହିଲେ ନାହିଁ । ଏହାପୂର୍ବରୁ ଶନିବାର ମଧ୍ୟ ତାଙ୍କୁ ଡକାଯାଇଥିଲା ।

ଗତ ଚାରି ଦିନ ମଧ୍ୟରେ ତିନିଥର ଇଡି ପଚରାଉଚରା ପାଇଁ ଜ୍ୟାକଲିନଙ୍କୁ ଡାକିଥିଲେ । କିନ୍ତୁ ସେ ସମସ୍ତ ତିନି ଦିନ – ୧୫ ଅକ୍ଟୋବର (ଶୁକ୍ରବାର), ୧୬ଅକ୍ଟୋବର (ଶନିବାର) ଏବଂ ୧୮ ଅକ୍ଟୋବର (ସୋମବାର) ରେ ଇଡିର ପଚରାଉଚରାକୁ ଏଡ଼ାଇ ଦେଇଛନ୍ତି । ଏହାପୂର୍ବରୁ ସେପ୍ଟେମ୍ବର ୨୫ରେ ଜ୍ୟାକଲିନ ପଚରାଉଚରା ପାଇଁ ଆସିନଥିଲେ । ସୂଚନାନୁସାରେ, ଜ୍ୟାକଲିନ ବ୍ୟକ୍ତିଗତ କାରଣ ଦର୍ଶାଇ କହିଛନ୍ତି ଯେ ସେ ଏହି ଯାଞ୍ଚରେ ଭାଗ ନେଇ ପାରିବେ ନାହିଁ।

ଏହି ମାମଲାରେ ଅଭିନେତ୍ରୀ ନଭେମ୍ବର ପ୍ରଥମ ସପ୍ତାହ ପର୍ଯ୍ୟନ୍ତ ପଚରାଉଚରା ସ୍ଥଗିତ ରଖିବାକୁ ଅନୁରୋଧ କରିଥିଲେ, ଜ୍ୟାକଲିନଙ୍କ ଆର୍ଥିକ କାରବାର ଉପରେ ଇଡି ନଜର ରଖିଛି । ତାଙ୍କ କହିବାନୁସାରେ, ଜ୍ୟାକଲିନଙ୍କ କନମାନ ସୁକେଶ ଚନ୍ଦ୍ରଶେଖରଙ୍କ ସହ ସମ୍ପର୍କ ରହିଛି । ସୂତ୍ରରୁ ପ୍ରକାଶ ଯେ ଶୁକ୍ରବାର ଦିନ ଅଭିନେତ୍ରୀ ଇଡି ଅଧିକାରୀମାନଙ୍କୁ ନଭେମ୍ବର ପ୍ରଥମ ସପ୍ତାହ ପର୍ଯ୍ୟନ୍ତ ପଚରାଉଚରା ସ୍ଥଗିତ ରଖିବାକୁ ଅନୁରୋଧ କରିଛନ୍ତି। ଏଥି ସହିତ, ଇଡି ଜ୍ୟାକଲିନଙ୍କ ସହ ପଚରାଉଚରାକୁ ଯଥାଶୀଘ୍ର ଶେଷ କରିବାକୁ ଚାହୁଁଛନ୍ତି ।