ସୋସିଆଲ ମିଡିଆରେ ମାତିଛନ୍ତି କିଡ୍ନୀ ଚୋର, ସୋମନାଥଙ୍କ ପାଇଁ ଦେବଦୂତ ସାଜିଲେ ସବ୍ୟସାଚୀ
ଭୁବନେଶ୍ୱର: (ଭବାନୀ ଶଙ୍କର ଦାସ): ସାବଧାନ ! ସୋସିଆଲ ମିଡିଆରେ ମାତିଛନ୍ତି କିଡ୍ନୀ ଚୋରି ରାକେଟ୍ । ଲୋକଙ୍କୁ ମୋଟା ଅଙ୍କର ଲୋଭ ଦେଖାଇ କିଡ୍ନୀ ଚୋରି ଲାଗି ଉଦ୍ୟମ କରୁଛନ୍ତି । ସୋସିଆଲ ମିଡିଆରେ ଆପଣ ଅଜଣା ଲୋକଙ୍କ ଯୋଗାଯୋଗରେ ଆସୁଛନ୍ତି କି ? ଅଜଣା ଲୋକଙ୍କ ଦ୍ବାରା ମିଥ୍ୟା ପ୍ରଲୋଭନକାରୀ ପୋଷ୍ଟ ସମ୍ପର୍କରେ ଆସୁଛନ୍ତି କି ? ମୋଟା ଅଙ୍କର ଟଙ୍କା ଲୋଭ ଦେଖାଇ ଅଙ୍ଗଦାନ କରିବା ଲାଗି ଆପଣଙ୍କୁ କେହି ପ୍ରବର୍ତ୍ତାଉଛି କି ? ତେବେ ହୋଇଯାଆନ୍ତୁ ସାବଧାନ । କାହିଁକି ନା ଆପଣ ହୋଇପାରନ୍ତି ସାଂଘାତିକ ଷଡ଼ଯନ୍ତ୍ରର ଶିକାର ।
କାରଣ ସୋସିଆଲ ମଡିଆରେ ମାତିଛନ୍ତି ଅଙ୍ଗଚୋରି ରାକେଟ । ଟଙ୍କା ଲୋଭରେ ଅଙ୍ଗ ବିକ୍ରି ଲାଗି ପ୍ରଲୋଭିତ ହେଲେ ଚାଲିଯାଇପାରେ ଆପଣଙ୍କ ଜୀବନ । ଏଭଳି କିଛି ସାଂଘାତିକ ଘଟଣା ସାମନାକୁ ଆସିଛି । କେନ୍ଦ୍ରାପଡାର ସୋମନାଥ ଗାହାଣ ଭୁବନେଶ୍ୱର ତମାଣ୍ଡୋ ଅଞ୍ଚଳରେ ଭଡ଼ାଘର ନେଇ ହୋଟେଲ କରିଥିଲେ । ଲକ୍ଡାଉନ ଯୋଗୁ ବ୍ୟବସାୟ ଠପ୍ ହେବାରୁ ମାନସିକ ଦୁଶ୍ଚିନ୍ତାରେ ଥିଲେ ସୋମନାଥ ।
ଫେସବୁକରେ ସେଲ୍ ଇୟୋର କିଡ୍ନୀ ବିଜ୍ଞାପନ ଦେଖି ପ୍ରଲୋଭିତ ହୋଇଥିଲେ । ପରେ ମେସେଞ୍ଜରରେ ସୋମନାଥଙ୍କ ସହିତ ଯୋଗାଯୋଗ କରିଥିଲେ ଠକ ଗ୍ୟାଙ୍ଗ । ଗୋଟିଏ କିଡ୍ନୀ ଦେଲେ ୩ କୋଟି ଟଙ୍କା ଦିଆଯିବ ବୋଲି ସୋମନାଥଙ୍କୁ ପ୍ରଲୋଭିତ କରିଥିଲେ । ଠକ ଜଣକ ନିଜକୁ ଡାକ୍ତର ହେଲେନ ଅହମ୍ମଦ ବୋଲି ଦାବି କରିଥିଲେ । ଦିଲ୍ଲୀ ଯାଇ କିଡ୍ନୀ ଦେବାକୁ ରାଜି ହେବାରୁ +919585413804 ହ୍ୱାଟ୍ସଆପ୍ ନମ୍ବରରେ କଥାବାର୍ତ୍ତା ଆରମ୍ଭ କରିଥିଲା ଠକ । ତେବେ ଅଭିନେତା ସବ୍ୟସାଚୀ ମିଶ୍ରଙ୍କ ହସ୍ତକ୍ଷେପ ଯୋଗୁଁ ବଡ଼ ଅଘଟଣରୁ ବର୍ତ୍ତି ଯାଇଛନ୍ତି ସୋମନାଥ ଗାହାଣ ।
ଦେଶରେ ଅଙ୍ଗଦାନ ଓ ପରତିରୋପଣ ଲାଗି ସ୍ୱତନ୍ତ୍ର ବ୍ୟବସ୍ଥା ରହିଛି । ସରକାରୀ ବିଧି ବ୍ୟବସ୍ଥା ଭିତରେ ଏହି ପ୍ରକ୍ରିୟା କରାଯାଏ । ମିଥ୍ୟା ପ୍ରଲୋଭନର ଶିକାର ହେଲେ ବୁମେରାଂ ହେବ ବୋଲି କହିଛନ୍ତି ପୂର୍ବତନ ପୋଲିସ ଅଧିକାରୀ ଓ ସୋସିଆଲ ମିଡିଆ ବିଶେଷଜ୍ଞ । ଯଦି ଏପରି କେହି ସାମାଜିକ ଗଣମାଧ୍ୟମରେ ଯୋଗଯୋଗ କରୁଛନ୍ତି ତେବେ ଏଥିରୁ ଖ୍ୟାନ୍ତ ରହିବାକୁ ଉଭୟ ପରାମର୍ଶ ଦେଇଛନ୍ତି ।
