ଜୁହି ଚାୱଲାଙ୍କର ସରକାରଙ୍କୁ ପ୍ରଶ୍ନ: ଭାରତକୁ ୫ଜି ଆଣିବା ପୂର୍ବରୁ ପ୍ରମାଣ କରନ୍ତୁ ଏହାର ଅପକାରିତା ଓ ଉପକାରିତା

ଅନେକ ସମୟରେ ବିବାଦିତ ଘଟଣା ପାଇଁ ହିଁ ବଲିଉଡର କଥା ଚର୍ଚ୍ଚାକୁ ଆସେ । କେତେବେଳେ ହିରୋ ହିରୋଇନଙ୍କୁ ନେଇ ବିବାଦ ତ ପୁଣି କେତେବେଳେ ଚଳଚିତ୍ରକୁ ନେଇ ବିବାଦ । ହେଲେ ଏମିତି ଜଣେ ଅଭିନେତ୍ରୀ ଅଛନ୍ତି ଯିଏକି ଏସବୁ ବିବାଦ ଠାରୁ ଖୁବ୍ ଦୂରରେ । କିନ୍ତୁ ସେ ଭବିଷ୍ୟତକୁ ନେଇ ଖୁବ୍ ଚିନ୍ତାରେ । ବଲିଉଡର ଜଣେ ଜଣାଶୁଣା ଓ ଖୁବ ପ୍ରତିଷ୍ଠିତ ଅଭିନେତ୍ରୀ ହେଉଛନ୍ତି ଜୁହି ଚାୱଲା । ସେ କିଛି ବର୍ଷ ହେବ ମୋବାଇଲ ଫୋନର ୫ଜି ଟେକନିକ୍ କୁ ନେଇ ଚିନ୍ତା ପ୍ରକାଶ କରିଆସୁଛନ୍ତି ।

ତାଙ୍କ କହିବା ଅନୁସାରେ ଲୋକଙ୍କ ସ୍ୱାସ୍ଥ୍ୟ ଉପରେ ରେଡିଓ ଫ୍ରିକ୍ୱେନ୍ସିର ସମ୍ବାବ୍ୟ କ୍ଷତିକାରକ ପ୍ରଭାବକୁ ବିଶ୍ଳେଷଣ ନ କରି ଏହାକୁ କାର୍ଯ୍ୟକାରୀ କରାଯିବା ଉଚିତ୍ ନୁହେଁ । ଏହି ମାମଲାକୁ ଆଗକୁ ନେଇ ବର୍ତମାନ କୋର୍ଟର ଦ୍ୱାରସ୍ଥ ହୋଇଛନ୍ତି ଜୁହି । ଭାରତରେ ୫ଜି ଟେକ୍ନୋଲୋଜୀର ଲାଗୁ ବିରୋଧରେ ବମ୍ବେ ହାଇକୋର୍ଟରେ ଏକ ଆବେଦନ ପତ୍ର ଦାଖଲ କରିଛନ୍ତି । ଗଣମାଧ୍ୟମର ରିପୋର୍ଟ ଅନୁସାରେ ଜୁହି ଚାୱଲା ଭାରତସରକାରଙ୍କ ଟେଲିକମ୍ ମନ୍ତ୍ରଣାଳୟକୁ ଏହି ପତ୍ର ମାଧ୍ୟମରେ ଆବେଦନ କରିଛନ୍ତି ଯେ- ସାଧାରଣ ଲୋକ,ସମସ୍ତ ଜୀବ ଜନ୍ତୁ,ପ୍ରାଣୀ,ଉଦ୍ଭିଦ,ଜଙ୍ଗଲ ଓ ପରିବେଶ ଉପରେ ୫ଜିର ପ୍ରଭାବକୁ ଅତି ନିକଟରୁ ଅନୁଧ୍ୟାନ କରି ସମସ୍ତ ରିପୋର୍ଟର ଭଲଭାବରେ ଯାଂଚ କରି ୫ଜି ଟେକ୍ନୋଲୋଜୀର ପ୍ରୟୋଗ ଭାରତରେ କରିବା ଦରକାର ।

ଜୁହି ଚାୱଲା ରେଡିଏସନ୍ ପ୍ରତି ସଚେତନ କରିବା କାମ ଅନେକ ଦିନରୁ କରିଆସୁଛନ୍ତି । କେନ୍ଦ୍ର ସରକାର ଡିଜିଟାଲ ଇଣ୍ଡିଆର ଲକ୍ଷ୍ୟକୁ ହାସଲ କରିବା ପାଇଁ ୫ଜି ଲାଗୁ କରିବାକୁ ଚାହୁଁଛନ୍ତି । ସେଥିପାଇଁ ଜୁହି ସରକାରଙ୍କୁ ପ୍ରଶ୍ନ କରିଛନ୍ତି କି କଣ ଏହି ଟେକନିକର ଭଲଭାବରେ ତର୍ଜମା କରାଯାଇଛି । ଆଉ ଯଦି ଏହା ହୋଇଛି ତେବେ ଏହି ଟେକନିକ ସହ ଜଡିତ ସମସ୍ତ ପରୀକ୍ଷା ନିରିକ୍ଷାର ପ୍ରମାଣପତ୍ର ସାର୍ବଜନୀନ କରାଯାଉ । କାହିଁକି ନା ସମସ୍ତେ ଜାଣିବା ଆବଶ୍ୟକ କି ଏହା ବର୍ତମାନର ପିଢି ଓ ଆଗାମୀ ପିଢି ପାଇଁ ଅସୁବିଧାର କାରଣ ନା ଉନ୍ନତିର ସଫଳ ମାର୍ଗ । ଜୁହିଙ୍କର ଦାବି ଯେ ଆମ ପରିବେଶକୁ ଆମେ ସୁରକ୍ଷିତ ରଖିବା ପାଇଁ ଏହି ରେଡିୟସନ ଠାରୁ ଦୂରରେ ରହିବା ଜରୁରୀ । ସେଥିପାଇଁ ଯେଉଁ ଟେକ୍ନୋଲୋଜୀ ମଣିଷଙ୍କ ହିତ ପାଇଁ କାମରେ ଆସିବା କଥା । ତାହା ହିଁ ଏବେ ମଣିଷର ଅନ୍ତର କାରଣ ପାଲଟିଛି ।