ଘରୋଇ ହସ୍ପିଟାଲ ପରେ ଏବେ ଶିଳ୍ପାନୁଷ୍ଠାନ ଚିନ୍ତା: ତାଗିଦ କଲେ ବିଏମସି କମିଶନର

ଭୁବନେଶ୍ୱର: ଶିଳ୍ପାନୁଷ୍ଠାନ କୋଭିଡ ନିୟମର ଅନୁପାଳନ ନକଲେ ହେବ କାର୍ଯ୍ୟାନୁଷ୍ଠାନ । ନିକଟରେ ଏକ ଶିଳ୍ପାନୁଷ୍ଠାନରୁ ୬୮ କରୋନା ପଜିଟିଭ ଚିହ୍ନଟ ହେବା ପରେ ଆଜି ବିଏମସି କମିଶନର ଏଭଳି ଚରମବାଣୀ ଶୁଣାଇଛନ୍ତି । ଏଥିସହିତ ଆଜିଠାରୁ ବିଏମସି ଅଞ୍ଚଳରେ ଦୈନିକ ଟେଷ୍ଟିଂର ହାରକୁ ବୃଦ୍ଧି କରାଯାଉଛି । କରୋନା ସଂକ୍ରମିତଙ୍କ ପାଇଁ ଅଧିକ ସଂଖ୍ୟାରେ କୋଭିଡ ହସ୍ପିଟାଲ ଓ ବେଡର ମଧ୍ୟ ବ୍ୟବସ୍ଥା କରାଯାଉଛି ।

ତେବେ ଆପଣଙ୍କୁ ଯିବାକୁ ପଡିବନି କରୋନରେ ହସ୍ପିଟାଲ । ସିଧାସଳଖ କୋଭିଡ ହସ୍ପିଟାଲକୁ ନଯାଇ କେଭିଡ କେୟାର ହୋମରେ ଚିକିତ୍ସିତ ହେଇପାରିବେ । ଏଥିପାଇଁ ଭୁବନେଶ୍ୱର ମହାନଗର ନିଗମ ପଦକ୍ଷେପ ନେଇଛି । ବିଏମସି କେଭିଡ କେୟାର ହେମ୍ ପାଇଁ ବର୍ତ୍ତମାନ ରାଜଧାନୀର ହାଇଟେକ୍ ମେଡିକାଲକୁ ଦାୟିତ୍ୱ ଦେଇଛି । ବର୍ତ୍ତମାନ ହାଇଟେକ୍ ମେଡିକାଲର ୫୦୦ ଶଯ୍ୟା ବିଶିଷ୍ଟ କେଭିଡ କେୟାର ହେମ୍ ତିଆରି କରାଯାଇଛି ।

କୋଭିଡ ରୋଗୀଙ୍କ ଚିକିତ୍ସା ପାଇଁ ଭୁବନେଶ୍ବରରେ କୋଭିଡ ବେଡ ସଂଖ୍ୟା ୩୩୨୧କୁ ବୃଦ୍ଧି କରାଯାଇଛି । ଏଥିସହିତ ରହିଛି ୮୫ଟି ଆଇସିୟୁ ଓ ୨୭ ଭେଣ୍ଟିଲେଟର ସୁବିଧା ।  ପୂର୍ବରୁ ରାଜଧାନୀ ପାଇଁ ବସ୍ତି ଓ ଘରୋଇ ହସ୍ପିଟାଲ ଚିନ୍ତା ବଢାଉଥିଲେ । ନିକଟରେ ଗୋଟିଏ ଶିଳ୍ପାନୁଷ୍ଠାନରୁ ୬୮ ପଜିଟିଭ ଚିହ୍ନଟ ହେବା ପରେ ବିଏମସି ରଣନୀତି ବଦଳାଇଛି । ସବୁ ଶିଳ୍ପାନୁଷ୍ଠାନକୁ ସରକାରଙ୍କ କୋଭିଡ ଗାଇଡାଲାଇନର ଅନୁପାଳନ ପାଇଁ ନିର୍ଦ୍ଦେଶ ଦିଆଯାଇଛି ।

ଏହାର ଅନୁପାଳନ ନହେଲେ କାର୍ଯ୍ୟାନୁଷ୍ଠାନ ନିଆଯିବ । ସିଧାସଖଳ ଭାବେ ଏଭଳି ଚରମବାଣୀ ଶୁଣାଇଛନ୍ତି ବିଏମସି କମିଶନର । ରାଜଧାନୀରେ କୋଭିଡ ମୁକାବିଲାକୁ ଆହୁରି ପ୍ରଭାବୀ କରିବାକୁ ପ୍ରତି ଜୋନରେ ରାପିଡ ରେସପନସ ଟିମ ସଂଖ୍ୟା ୫କୁ ବୃଦ୍ଧି କରାଯାଇଛି । ଦୈନିକ ଟେଷ୍ଟିଂ ହାର ୧୪ଶହକୁ ମଧ୍ୟ ବୃଦ୍ଧି କରାଯାଉଛି । ପ୍ରତି ୱାର୍ଡ ଉପରେ ମଧ୍ୟ ନଜର ରଖୁଛନ୍ତି ୱାର୍ଡ ସଚେତକ । ବସ୍ତି ପାଇଁ ରହିଛି ଭିନ୍ନ ରଣନୀତି ।

କେବଳ କେଭିଡ କେୟାର ହୋମ୍ ନୁହେଁ ଖୁବ ଶୀଘ୍ର ରାଜଧାନୀର ଆଦିତ୍ୟ ଅଶ୍ବନୀ ହସ୍ପିଟାଲରେ ମଧ୍ୟ ୧୧୯ଟି ବେଡ ଓ ୩୧ଟି ଆଇସିୟୁ ୟୁନିଟ ରହିବ  । ଏହା ସହ ରାଜଧାନୀର ତିନି ବିଧାୟକ ନିଜସ୍ବ ପାଣ୍ଠିରୁ ନିଜନିଜ ଅଚଂଳରେ ୬୦ ସଂଖ୍ୟକ କେଭିଡ କେୟାର ହୋମ କରିବାର ଲକ୍ଷ୍ୟ ରଖିଛନ୍ତି । ଯାହା ଆଗାମୀ ତିନି ମାସ ପର୍ଯ୍ୟନ୍ତ କାର୍ଯ୍ୟକ୍ଷମ ରହିବ । ଠିକ ସେହି ଭଳି ଡୁମଡୁମା ଓ ରାଜଧାନୀର ବିଭିନ୍ନ ଆର୍ପାଟମେଣ୍ଟ ମାନଙ୍କ ମଧ୍ୟରେବି  କୋଭିଡ କେୟାର ହୋମ ତିଆରି ହେବ  ।