ଅନୁପସ୍ଥିତ ରହିଲେ ପରେ ମିଳିବନି ମାଗଣା ଭ୍ୟାକ୍ସିନ୍
ଭୁବନେଶ୍ୱର: ପ୍ରଥମ ପର୍ଯ୍ୟାୟରେ ବଳକା ଥିବା କରୋନା ଯୋଦ୍ଧାଙ୍କୁ ଆଜିଠୁ ଟିକା ଦିଆଯାଇଛି । ଆଜି ଭୁବନେଶ୍ୱରର ୧୧ଟି ସ୍ଥାନରେ ଟିକା ଦିଆଯାଇଥିବା ବେଳେ କାଲିଠୁ ଅନ୍ୟ ସମସ୍ତ ଜିଲ୍ଲାରେ କରୋନା ଟିକା ଦିଆଯିବ । ଆଜି ଭୁବନେଶ୍ୱରର ୧୧ଟି ସ୍ଥାନରେ ୧୧୩୭ ଜଣଙ୍କ କରୋନା ଟିକା ଦିଆଯାଇଛି । ଆସନ୍ତାକାଲି ରାଜ୍ୟର ୩୦ ଜିଲ୍ଲାର ୨୧୬ଟି କେନ୍ଦ୍ରରେ ୧୯ ହଜାର ୭୭୦ ଜଣଙ୍କ ଭ୍ୟାକ୍ସିନ୍ ଦେବା ପାଇଁ ଲକ୍ଷ୍ୟ ରଖାଯାଇଛି ।
ରାଜ୍ୟରେ ମୋଚ ୩ ଲକ୍ଷ ୩୮ ହଜାର ୭୦୦ ସ୍ୱାସ୍ଥ୍ୟକର୍ମୀଙ୍କୁ କୋଭିଡ୍ ଟିକା ଦିଆଯିବ । ଆଜି ସୁଦ୍ଧା ୧ ଲକ୍ଷ ୭୮ ହଜାର ୨୨୭ ଜଣଙ୍କୁ ଭ୍ୟାକ୍ସିନ୍ ଦିଆଯାଇଛି । ଫେବ୍ରୁଆରୀ ୧୦ ତାରିଖ ସୁଦ୍ଧା ବଳକା ୧ ଲକ୍ଷ ୬୦ ହଜାର ୪୭୩ ଜଣଙ୍କୁ ଟିକା ଦିଆଯିବ ।
ତେବେ, କିଛି ସ୍ୱାସ୍ଥ୍ୟ କର୍ମଚାରୀ ଟିକାକରଣ ଲାଗି ମେସେଜ୍ ଦିଆଯିବା ପରେ ବି ଟକାକରଣ କେନ୍ଦ୍ରକୁ ଆସୁନାହାଁନ୍ତି । ସେମାନେ ଟିକାକରଣ କେନ୍ଦ୍ରକୁ ଆସି ଟିକା ନନେଲେ ପରେ ପୁଣିଥରେ ମାଗଣା ଭ୍ୟାକ୍ସିନ୍ ଦିଆଯିବ ନାହିଁ ବୋଲି ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ।
ଟିକାକରଣ ପରେ ରାଜ୍ୟରେ ୧୯ ଜଣଙ୍କ ଠାରେ ସାମାନ୍ୟ ପାର୍ଶ୍ୱ ପ୍ରତିକ୍ରିୟା ଦେଖାଦେଇଛି । କେତେକଙ୍କ ଠାରେ ସାମାନ୍ୟ ଜ୍ୱର ରହୁଛି । ଗତ ୨୩ ତାରିଖରେ ନୂଆପଡ଼ାର ଜଣେ ଟିକା ନେବା ପରେ ଅସୁସ୍ଥ ହୋଇ ମୃତ୍ୟୁବରଣ କରିଥିଲେ । ଶବ ବ୍ୟବଚ୍ଛେଦ ପରେ ମୃତ୍ୟୁର କାରଣ ଟିକା ନୁହଁ ବୋଲି ସ୍ୱାସ୍ଥ୍ୟ ବିଭାଗ ସ୍ପଷ୍ଟ କରିଛି ।
