ମୁମ୍ବାଇ: ଅଭିନେତା ରାହୁଲ ରଏଙ୍କୁ ଫିଲ୍ମ ‘L.A.C – Live The Battle’ର ସୁଟିଂ ସମୟରେ ବ୍ରେନ୍ ଷ୍ଟ୍ରୋକ୍ ହୋଇଥିବା ଖବର ସାମ୍ନାକୁ ଆସିଛି । ଅସୁସ୍ଥ ହେବା ପରେ ତାଙ୍କୁ ନାନାବତୀ ହସ୍ପିଟାଲରେ ଭର୍ତ୍ତି କରାଯାଇଛି । ଫିଲ୍ମଟି କାର୍ଗିଲରେ ସୁଟିଂ କରାଯାଉଥିଲା । ଅସୁସ୍ଥ ହେବା ପରେ ତାଙ୍କୁ ତୁରନ୍ତ ଶ୍ରୀନଗରରୁ ମୁମ୍ବାଇ ଅଣାଯାଇଥିଲା । ରାହୁଲଙ୍କୁ କଥା କହିବାରେ ଅସୁବିଧା ହେଉଥିଲା ବୋଲି ସୂଚନା ରହିଛି ।
ନାନାବତୀ ହସ୍ପିଟାଲରେ ଚିକିତ୍ସା ଚାଲିଥିବା ବେଳେ ତାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିଛି । ନିବେଦିତା ବାସୁ ପୁରା ଘଟଣା ସମ୍ପର୍କରେ ସୂଚନା ଦେଇ କହିଛନ୍ତି ଯେ, ‘ନିର୍ଦ୍ଦେଶକଙ୍କ ଘନିଷ୍ଠ ବନ୍ଧୁ ହେଉଛନ୍ତି ରାହୁଲ, ଆଉ ଏହି ପ୍ରୋଜେକ୍ଟରେ ଆସିଥିବା ପ୍ରଥମ ବ୍ୟକ୍ତି । ଯେତେବେଳେ ଅନ୍ୟ କାଷ୍ଟ ଖୋଜାଯାଉଥିଲା ସେତେବେଳେ, ଆମେ ଜାଣିଥିଲୁ ଯେ ସେ ଏହି ପ୍ରୋଜେକ୍ଟରେ ଅଛନ୍ତି । ଲକ୍ଡାଉନ୍ ସମୟରେ ତାଙ୍କ ସହ ‘ଓ୍ୱାକ୍’ ନାମକ ଏକ କ୍ଷୁଦ୍ର ଚଳଚ୍ଚିତ୍ର କରିବା ପରେ ନୀତିନ ଜାଣିଥିଲେ ରାହୁଲଙ୍କ ଏକ ଭଲ ଅପ୍ସନ୍ ବୋଲି ଭାବିଥିଲେ ।’
ନିବେଦିତା କହିଛନ୍ତି ‘କାର୍ଗିଲରେ ତାପମାତ୍ରା ମାଇନସ୍ ୧୨ ଡିଗ୍ରୀ ସେଲସିୟସ୍ ଏବଂ ମାଇନସ୍ ୧୩ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ରହିଥିଲା । ଥଣ୍ଡା ଅତ୍ୟଧିକ ଥିଲା । ଏହା ଏମିତି ଏକ ସମୟ ଥିଲା ଯେ, ସମସ୍ତେ ଥାଣ୍ଡା ଆଗରେ ହାର ମାନିଥିଲେ । ଥଣ୍ଡା ଯୋଗୁଁ ସମସ୍ତଙ୍କ ପାଇଁ ସମସ୍ୟା ସୃଷ୍ଟି କରିଥିଲା । ତେବେ ସୁଟିଂର ଆଉ ଗୋଟିଏ ଦିନ ବାକି ଥିବା ବେଳେ ରହୁଲଙ୍କ ସ୍ୱାସ୍ଥ୍ୟ ଖରାପ ହେଲା । ଏନେଇ ସୂଚନା ମିଳିବା ପରେ ନୀତିନଙ୍କୁ କୁହାଗଲା ଯେ, ତାଙ୍କୁ ଏଠାରୁ ବାହାର କରିବା ଆବଶ୍ୟକ ।
ସୂଚନାଯୋଗ୍ୟ, L.A.C -Live The Battle ହେଉଛି ନିଶାନ୍ତ ସିଂହଙ୍କ ମାଲିକାନାର OTT ପ୍ଲାଟ୍ଫର୍ମରେ ପ୍ରଥମ ଫିଲ୍ମ । ଏହି ଚଳଚ୍ଚିତ୍ରକୁ ନିର୍ଦ୍ଦେଶନା ଦେଇଛନ୍ତି ନୀତିନ କୁମାର ଗୁପ୍ତା । ଚିତ୍ରା ଭାକିଲ ଶର୍ମା ଏବଂ ନିବେଦିତା ବାସୁ ଏହାର ପ୍ରଯୋଜକ ରହିଛନ୍ତି ।
ନିବେଦିତା ଆହୁରି କହିଛନ୍ତି ଯେ, ନୀତିନ ରାହୁଲଙ୍କୁ କାର୍ଗିଲରୁ ଶ୍ରୀନଗର ଏବଂ ପରେ ମୁମ୍ବାଇକୁ ନେବା ପାଇଁ ବ୍ୟବସ୍ଥା କରିଥିଲେ । ତାଙ୍କ ସ୍ୱାସ୍ଥ୍ୟାବସ୍ଥା ପାଇଁ ପ୍ରଡକ୍ସନ ହାଉସ ଦ୍ୱାରା ଖର୍ଚ୍ଚର ବ୍ୟବସ୍ଥା କରାଯାଇଛି । ତାଙ୍କର ଆଶୁଆରୋଗ୍ୟ କାମନା କରୁଛୁ ।
କୋ-ଆକ୍ଟର ନିଶାନ୍ତ କହିଛନ୍ତି ଯେ, ମଙ୍ଗଳବାର ଦିନ ଏହି ଘଟଣା ଘଟିଛି । ସୋମବାର ରାତିରେ ଆମେ ସମସ୍ତେ ଶୋଇବାକୁ ଯିବାବେଳେ ସେ ସୁସ୍ଥ ଥିଲେ । ଥଣ୍ଡା ଜଳବାୟୁ ଯୋଗୁଁ ତାଙ୍କର ଏଭଳି ପରିସ୍ଥିତି ହୋଇଥାଏ ପାରେ ବୋଲି ଅନୁମାନ କରାଯାଉଛି । କାର୍ଗିଲରେ ତାପମାତ୍ରା ମାଇନସ୍ ୧୫ ଡିଗ୍ରୀ ରହୁଥିଲା । ମଙ୍ଗଳବାର ରାହୁଲଙ୍କ ସ୍ୱାସ୍ଥ୍ୟ ଠିକ୍ ନଥିବା ଭଳି ଲାଗୁଥିଲା । କାରଣ ସେ ଡାଇଲଗ୍ ମନେ ରଖିଥିଲେ କିନ୍ତୁ ପୁରା କହିପାରୁନଥିଲେ । ତାଙ୍କୁ କଷ୍ଟ ଅନୁଭବ ହେଉଥିଲା ।
