ଜାତୀୟ ପାର୍ଟି ରେସ୍ରେ ଆମ୍ ଆଦମୀ ପାର୍ଟି, ମାତ୍ର ୧୦ ବର୍ଷରେ ଆଶାତୀତ ସଫଳତା
ଗାନ୍ଧୀନଗର: ଗୁଜରାଟରେ ପାଦ ଥାପିଲା ଆମ୍ ଆଦମୀ ପାର୍ଟି । କେବଳ ପାଦ ଥାପିନି, ଆମ୍ ଆଦମୀ ପାର୍ଟି ଜାତୀୟ ପାର୍ଟି ହେବା ଆଶା ଉଜ୍ବଳ ହୋଇଛି । ଗୁଜରାଟ ନିର୍ବାଚନରେ ଆପକୁ ୧୩ ପ୍ରତିଶତ ଭୋଟ ମିଳିଥିବାବେଳେ ପ୍ରତିଷ୍ଠାର ମାତ୍ର ୧୦ ବର୍ଷରେ ଆପକୁ ମିଳିଛି ଆଶାତୀତ ସଫଳତା । ୧୮୨ ଆସନ ବିଶିଷ୍ଟ ଗୁଜରାଟ ବିଧାନସଭାରେ ବିଜେପିକୁ ୧୫୬ ଆସନ ମିଳିଥିବାବେଳେ କଂଗ୍ରେସକୁ ମାତ୍ର ୧୭ଟି ଆସନ ମିଳିଛି । ଆପ୍କୁ ମିଳିଛି ୫ଟି ଆସନ ।
ଆନ୍ନା ହଜାରେଙ୍କ ଦୁର୍ନୀତି ବିରୋଧୀ ସଂଗ୍ରାମରୁ ଆରମ୍ଭ ହୋଇଥିବା ଆପ୍ ଦିଲ୍ଲୀ ଓ ପଞ୍ଜାବରେ ସରକାରରେ ରହିଥିବାବେଳେ ଦିଲ୍ଲୀ ମହାନଗର ନିଗମରେ ବି ଦଳର ଦବଦବା ପ୍ରକାଶ ପାଇଛି । ଗୋଆ ଓ କେତେକ ଉତ୍ତରପୂର୍ବାଞ୍ଚଳ ରାଜ୍ୟରେ ବି ବଢୁଛି ଆପ୍ । ବର୍ତ୍ତମାନ ଦେଶରେ 8ଟି ଜାତୀୟ ରାଜନୈତିକ ଦଳ ଅଛନ୍ତି । ସେଗୁଡିକ ହେଲେ କଂଗ୍ରେସ, ବିଜେପି, ସିପିଆଇ, ସିପିଏମ, ତୃଣମୂଳ କଂଗ୍ରେସ, ବହୁଜନ ସମାଜ ପାର୍ଟି, ଏନସିପି, ଏନପିପି ।
ଇତିମଧ୍ୟରେ ଦିଲ୍ଲୀ, ପଞ୍ଜାବ, ଗୋଆ ଓ ଗୁଜରାଟରେ ମାନ୍ୟତା ପାଇଛି ଆପ୍ । ନିୟମ ଅନୁସାରେ ଅତିକମରେ ୩ଟି ରାଜ୍ଯରେ ଲୋକସଭା ନିର୍ବାଚନରେ ଯଦି କୌଣସି ଦଳ ୨ ପ୍ରତିଶତ ଆସନ ଲାଭ କରିଥିବ କିମ୍ବା ଯଦି ୪ଟି ରାଜ୍ୟରେ ବିଧାନସଭା ବା ଲୋକସଭା ନିର୍ବାଚନରେ ଦଳ ୬ ପ୍ରତିଶତରୁ ଅଧିକ ଭୋଟ ପାଇଥାଏ ସେହି ଦଳକୁ ଜାତୀୟ ମାନ୍ୟତା ମିଳିବ ।
