ନୂଆଦିଲ୍ଲୀ: କରୋନା ଟିକାକରଣ ପାଇଁ କେନ୍ଦ୍ର ସରକାର ଦେଇଥିବା ଅର୍ଥକୁ ସେ ସମୟରେ ଦିଲ୍ଲୀରେ କ୍ଷମତାରେ ଥିବା ଆମ୍ ଆଦମୀ ପାର୍ଟି (ଆପ) ସରକାର ଅଟକାଇଥିଲେ । ନିୟନ୍ତ୍ରକ ଓ ମହାଲେଖା ପରୀକ୍ଷକ (CAG) ରିପୋର୍ଟରେ ଦିଲ୍ଲୀ ସରକାରଙ୍କ ସ୍ବାସ୍ଥ୍ୟ ବିଭାଗକୁ ନେଇ ଏଭଳି ତଥ୍ୟ ଦିଆଯାଇଛି । ପୂର୍ବ ଆପ ସରକାର କାର୍ଯ୍ୟକାଳରେ ଦିଲ୍ଲୀରେ ହସ୍ପିଟାଲରେ କର୍ମଚାରୀଙ୍କ ଅଭାବ, ଅପରେସନ ଥିଏଟର ବନ୍ଦ ଓ ଔଷଧ ସମସ୍ୟାକୁ ନେଇ ଖୁଲାସା କରାଯାଇଛି । ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ତରଫରୁ ବିଧାନସଭାରେ ଜାରି କରାଯାଇଥିବା ରିପୋର୍ଟରେ କରୋନା ସମୟରେ ମଧ୍ୟ କୁପରିଚାଳନା ହୋଇଥିବା କୁହାଯାଇଛି ।
CAG ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, କରୋନା ମହାମାରୀ ଅବସରରେ ଦିଲ୍ଲୀବାସୀଙ୍କ ଟିକାକରଣ ପାଇଁ ଯେଉଁ ଅର୍ଥ କେନ୍ଦ୍ର ସରକାର ଜାରି କରିଥିଲେ, ତାହାକୁ ସେହି ସମୟରେ କ୍ଷମତାରେ ଥିବା ଅରବିନ୍ଦ କେଜ୍ରିଓ୍ବାଲ ସରକାର ବହୁ ସମୟ ଧରି ଅଟକାଇ ରଖିଥିଲେ । କେନ୍ଦ୍ରରୁ ଯେଉଁ ଅର୍ଥ ୨୦୨୧ ମସିହା ମାର୍ଚ୍ଚରେ ମିଳିଥିଲା, ତାହାକୁ ଏପ୍ରିଲ ଓ ମେ ଯାଏ ଆଗକୁ ବଢ଼ାଯାଇଥିଲା । ଟିକାକରଣର ପୂରା ଅର୍ଥ ଖର୍ଚ୍ଚ କରାଯାଇନଥିବା ମଧ୍ୟ ରିପୋର୍ଟରେ କୁହାଯାଇଛି ।
