ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟର ବାରମ୍ବାର ସମନ ମଧ୍ୟରେ ଆଜି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଲୋଡିବେ ଆସ୍ଥାଭୋଟ । ଆପ୍ ବିଧାୟକଙ୍କୁ ନେବା ଲାଗି ବିଜେପି ଉଦ୍ୟମ କରୁଥିବା ଅଭିଯୋଗ କରିଆସୁଥିବା କେଜ୍ରିଓ୍ବାଲ ଲୋଡିବେ ଆସ୍ଥା ଭୋଟ । ବିଧାନସଭାରେ ନିଜ ଶକ୍ତି ପ୍ରଦର୍ଶନ କରିବେ କେଜ୍ରିଓ୍ବାଲ । ସେପଟେ ୫ ଥର ସମନ ସତ୍ତ୍ବେ କାହିଁକି ଇଡିରେ ହାଜର ହେଲେନି ସେ ନେଇ ରାଉସ ଆଭେନ୍ୟୁ କୋର୍ଟରେ ଉତ୍ତର ରଖିଛନ୍ତି କେଜ୍ରିୱାଲ। ମାମଲାର ପରବର୍ତ୍ତୀ ଶୁଣାଣି ଆସନ୍ତା ୧୬ରେ ହେବ।
ଦିଲ୍ଲୀ ମଦନୀତି ମାମଲାରେ କେଜ୍ରିଓ୍ବାଲଙ୍କୁ ବାରମ୍ବାର ସମନ ଜାରି କରି ଆସୁଥିବାବେଳେ ମନୀଷ ସିସୋଦିଆ ଓ ସଞ୍ଜୟ ସିଂଙ୍କୁ ଗିରଫ କରାଯାଇସାରିଛି । ଆସନ୍ତା ୧୯ ତାରିଖରେ ହାଜର ହେବା ଲାଗି କେଜ୍ରିଓ୍ବାଲଙ୍କୁ ଷଷ୍ଠ ସମନ ଜାରି କରିସାରିଛି ଇଡି। ପୂର୍ବରୁ କେଜ୍ରିଓ୍ବାଲ କହିଥିଲେ ତାଙ୍କ ଦଳର ଦୁଇ ଜଣ ବିଧାୟକଙ୍କୁ ବିଜେପି ନେଇଯିବା ଲାଗି ଉଦ୍ୟମ କରୁଛି ବୋଲି ସେହି ବିଧାୟକମାନେ ତାଙ୍କ ନିକଟରେ ସୂଚନା ଦେଇଥିଲେ।
ବିଜେପିରେ ଯୋଗଦେବା ଲାଗି ୨୧ ଜଣ ବିଧାୟକ କୁଆଡେ ସହମତି ପ୍ରକାଶ କରିଛନ୍ତି ଏବଂ ସେମାନଙ୍କୁ ୨୫ କୋଟି ଟଙ୍କା ଯଚାଯାଇଛି ବୋଲି ସେହି ୨ ବିଧାୟକ ସୂଚନା ଦେଇଥିଲେ ବୋଲି କହିଛନ୍ତି କେଜ୍ରିଓ୍ବାଲ । ଦ୍ବିତୀୟ ଥର ଲାଗି କେଜ୍ରିଓ୍ବାଲ ଆସ୍ଥା ଭୋଟ ଚାହିଁଛନ୍ତି । ୭୦ ସଦସ୍ୟ ବିଶିଷ୍ଟ ଦିଲ୍ଲୀ ବିଧାନସଭାରେ ଆପର ରହିଛନ୍ତି ୬୨ ବିଧାୟକ । ସେପଟେ ବିଭିନ୍ନ ମାମଲାରେ ଆଜି କୋର୍ଟରେ ହାଜର ହେବେ କେଜ୍ରିଓ୍ବାଲ, ମନୀଷ ସିସୋଦିଆ, ସଞ୍ଜୟ ସିଂ ଓ ସତ୍ୟେନ୍ଦ୍ର ଜୈନ । କେଜ୍ରିଓ୍ବାଲ, ସିସୋଦିଆ ଓ ସଞ୍ଜୟ ମଦ ନୀତି ମାମଲାରେ ଏବଂ ୧ କୋଟି ୪୭ ଲକ୍ଷ ଟଙ୍କାର ବେଆଇନ ସମ୍ପତ୍ତି ଠୁଳ ମାମଲାରେ ସତ୍ୟେନ୍ଦ୍ର ହାଜର ହେବେ ।
