ଶ୍ରୀମନ୍ଦିର ଭିତରେ ଥିବା ବରାହ ମନ୍ଦିରରୁ ଖସିଲା ପଥର। ଆଜି ଭୋର ସମୟରେ ବରାହ ମନ୍ଦିରରୁ ଖସିଛି ପଥର। ପଥର ଖସି ଏକାଦଶୀ ମନ୍ଦିର ଟିଣ ଛାତରେ କଣା ହୋଇଯାଇଛି। ପଥରକୁ ଶ୍ରୀମନ୍ଦିରର କମାଣ୍ଡର ସଂଗ୍ରହ କରି ଏଏସଆଇକୁ ସୂଚନା ଦେଇଛନ୍ତି । ଦକ୍ଷିଣ ଘର ପଛ ପାଖ ତଥା ବିମଳା ମନ୍ଦିର ସମ୍ମୁଖରେ ରହିଛି ବରାହ ମନ୍ଦିର । ଏଏସଆଇ ପକ୍ଷରୁ ଦକ୍ଷିଣ ଘର ଉପର ଅଂଶର ମରାମତି କରାଯାଇଥିଲା।
ମନ୍ଦିରରୁ ପଥର ଖସିବା ପରେ ଏହାର ଅନୁଧ୍ୟାନ କରିଛନ୍ତି ଏଏସଆଇ ଟିମ୍। ପଥରର ଓଜନ ପ୍ରାୟ ୩ ରୁ ୪ କେଜି ରହିଥିବା ବେଳେ, ଶ୍ରୀମନ୍ଦିର ପ୍ରତି କୌଣସି ବିପଦ ନାହିଁ ବୋଲି କହିଛି ଏଏସଆଇ ଟିମ୍। ରାସାୟନିକ ପ୍ରଲେପ ଦିଆଯାଇ ମରାମତି କରାଯିବ । ପଥର ଦୁର୍ବଳ ଥିବାରୁ ମାଙ୍କଡ ଡେଇଁ ଖସାଇଥିବା ଅନୁମାନ କରାଯାଉଛି ବୋଲି କହିଛନ୍ତି ଏଏସଆଇ ସୁପରିଟେଣ୍ଡଣ୍ଟ ଡି.ବି. ଗଡ଼ନାୟକ।
