ଆର୍ମିର ସ୍ବତନ୍ତ୍ର ଡ୍ରେସ କପଡ଼ା ବିକୁଥିବା ଅଭିଯୋଗରେ ଦୋକାନରେ ଚଢ଼ାଉ

ବ୍ରହ୍ମପୁର: ଆର୍ମିର ସ୍ବତନ୍ତ୍ର ଡ୍ରେସ୍ କପଡ଼ା ବିକି ହରଡ଼ଘଣାରେ ଦୋକାନୀ। ବ୍ରହ୍ମପୁରରେ ଏହି କପଡ଼ା ବିକ୍ରି ହେଉଥିଲା। ପୋଲିସ ଓ ମିଲିଟାରି ଗୁଇନ୍ଦା ବିଭାଗର ମିଳିତ ଚଢ଼ାଉ କରିବା ସହିତ ଦୋକାନୀ ବିରୋଧରେ ଠକେଇ ମାମଲା ରୁଜୁ ହୋଇଛି । ୪୮୮ ମିଟର କପଡ଼ା ଜବତ କରିଛି ବ୍ରହ୍ମପୁର ଟାଉନ ଥାନା ପୋଲିସ। ଗୋଳାବନ୍ଧ ଆର୍ମି ଏଡି କଲେଜର ଜଣେ କର୍ମଚାରୀ ଗାଲକ୍ସି ଷ୍ଟୋରରେ ଦେଖିବାକୁ ପାଇଥିଲେ ଆର୍ମିର ନୂଆ ଡିଜିଟାଲ କମ୍ବାକ୍ଟ ୟୁନିଫର୍ମ । ଜାନୁଆରୀ ୧୫ ତାରିଖରୁ ଏହା କେବଳ କିଛି ନିର୍ଦ୍ଦିଷ୍ଟ ଆର୍ମି କ୍ୟାଣ୍ଟିନରେ ଉପଲବ୍ଧ ହେଉଛି। ବାହାରେ ଏହାର ବିକ୍ରି ନିଷେଧ ରହିଛି। ଏହା ବାହାରେ ବିକ୍ରି ହେବା ଜାତୀୟ ସୁରକ୍ଷା ପ୍ରତି ବିପଦ। କାରଣ ଏହି କପଡ଼ାର ଡ୍ରେସ ପିନ୍ଧି ଜଣେ ନିର୍ବିରୋଧରେ ଆର୍ମି କ୍ୟାମ୍ପରେ ପ୍ରବେଶ କରିପାରିବ। ତେବେ କପଡ଼ା ବିକ୍ରି ହେଉଥିବା ଜାଣିବା ପରେ ମିଳିତ ଚଢାଉ ହୋଇଥିଲା।  ସମ୍ପୃକ୍ତ ଦୋକାନୀ ଏହାକୁ କୋଲକାତାରୁ ଆଣିଥିବା  ଓ ଲୁଧିଆନାରେ ତିଆରି ହେଉଥିବା କହିଛନ୍ତି । ପୋଲିସ କୋଲକାତା ଓ ଲୁଧିଆନାରେ ତଦନ୍ତ କରିବ ବୋଲି ବ୍ରହ୍ମପୁର ଏସପି କହିଛନ୍ତି।…