ପୁଣି ଦେଶବ୍ୟାପୀ ଆନ୍ଦୋଳନର ଆହ୍ୱାନ

ନୂଆଦିଲ୍ଲୀ:  ସରକାରଙ୍କୁ ଆଲୋଚନା ପ୍ରସ୍ତାବ ଦେବାର ଗୋଟିଏ ଦିନ ପରେ ଆନ୍ଦୋଳନକୁ ଦେଶବ୍ୟାପୀ କରିବା ନିଷ୍ପତି ନେଇଛନ୍ତି ଚାଷୀ । ନୂଆବର୍ଷରେ ଚାଷୀ ଆନ୍ଦୋଳନକୁ ସମର୍ଥନ କରି ଦେଶବ୍ୟାପୀ ବିକ୍ଷୋଭ ଆହ୍ବାନ ଦିଆଯାଇଛି  । ତେବେ ଚାଷୀ ସଂଗଠନ AIKSCC (ଅଲ୍‌ ଇଣ୍ଡିଆ କିଶାନ ସଂଘର୍ଷ କୋଡିନେସନ କମିଟି) ପକ୍ଷରୁ ଡିସେମ୍ବର ୨୯ରେ  ବିହାରର  ପାଟନା, ଥାନାଜୁର, ଡିସେମ୍ବର ୩୦ରେ ମଣିପୁର ଓ ହାଇଦ୍ରାବାଦରେ ବିକ୍ଷୋଭ ପ୍ରଦର୍ଶନ କରାଯିବା କାର୍ଯ୍ୟକ୍ରମ ରହିଛି  ।

ସେପଟେ ଚାଷୀ ସଂଗଠନ ପକ୍ଷରୁ ସରକାରଙ୍କୁ ଦିଆଯାଇଥିବା ଆଲୋଚନା ପ୍ରସ୍ତାବ ନେଇ କିଛି ଉତ୍ତର ମିଳିନାହିଁ  । ତେଣୁ ଆନ୍ଦୋଳନକୁ ଜୋରଦାର କରାଯିବ ବୋଲି କ୍ରାନ୍ତିକାରୀ କୃଷକ ୟୁନିଅନ ସଭାପତି ଦର୍ଶନ ପାଲ କହିଛନ୍ତି  । ନୂଆ କୃଷି ଆଇନ ବିରୋଧରେ ଦିଲ୍ଲୀ ସୀମାରେ ଚାଷୀ ଆନ୍ଦୋଳନ ଆଜିକୁ ୩୩ ଦିନରେ ପହଞ୍ଚିଛି  । କିନ୍ତୁ ସରକାର ଏବଂ ଚାଷୀଙ୍କ ମଧ୍ୟରେ ବର୍ତ୍ତମାନ ସୁଦ୍ଧା ପର୍ଯ୍ୟନ୍ତ ନିଷ୍କର୍ସ ବାହାରି ପାରୁନାହିଁ ।

ପ୍ରବଳ ଶୀତରେ ରାଜଧାନୀ ଦିଲ୍ଲୀ ଥରୁଥିବା ବେଳେ ରାସ୍ତାରେ ବସି ରହିଛନ୍ତି ହଜାର ହଜାର ଚାଷୀ । କୃଷି ଆଇନ ପ୍ରତ୍ୟାହାର ଜିଦ୍‌ରେ ଚାଷୀ ସଂଗଠନ ଆନ୍ଦୋଳନ ଜାରି ରଖିଛି  । ପୂର୍ବରୁ ଅନେକ ବାର ସରକାର ଚାଷୀଙ୍କ ସହ ଆଲୋଟଚନା କରିଥିଲେ ମଧ୍ୟ ଏହାର କୌଣସି ସୁଫଳ ମିଳିପାରି ନଥିଲା  । ତେବେ ଆଗକୁ ଏଦିଗରେ ସରକାର ଏବଂ ଚାଷୀଙ୍କ ମଧ୍ୟରେ ବିବାଦ ତୁଟୁଛି ନା ବଢୁଛି ତାହା ସମୟକୁ ଅପେକ୍ଷା  ।