ପୁଣି ପଳାଶୁଣୀ ଛକରେ ସିରିଜ ଦୁର୍ଘଟଣା, ଆଗପଛ ହେଇ ପିଟିହେଲା ଟ୍ରକ, ବସ୍ ଏବଂ ଅଟୋ

ଭୁବନେଶ୍ବର: ପୁଣି ରାଜଧାନୀ ପଳାଶୁଣୀ ଛକରେ ସିରିଜ୍ ଦୁର୍ଘଟଣା। ଆଗପଛ ହୋଇ ପିଟି ହେଲା ଏକାଧିକ ଗାଡି। ସକାଳୁ ସକାଳୁ ଏହି ଦୁର୍ଘଟଣା ଘଟିଛି ।ଦୁର୍ଘଟଣାପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି । ଏକ ଟ୍ରକ ବସକୁ ପଛରୁ ଧକ୍କା ଦେବାରୁ ଵସ ଆଗରେ ଥିବା ଅଟୋକୁ ଧକ୍କା ଦେଇଥିଲା। ଅଟୋ ଆଗରେ ଥିବା ଏକ କାରକୁ ଧକ୍କା ଦେବାରୁ ଅଟୋରେ ଥିବା ୩ ଜଣ ବ୍ୟକ୍ତି ଆହତ ହୋଇଛନ୍ତି। ଜଣେ ବୃଦ୍ଧ ଗୁରୁତର ହୋଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଛନ୍ତି।

ଟ୍ରକକୁ ପୁଣି ପଛରୁ ଏକ ପିକଅପ ଧକ୍କା ଦେଇଛି। ଟ୍ରକର ଆଗପଟ ଭାଙ୍ଗିଯାଇଥିବା ବେଳେ ବସର ପଛପଟ ଭାଙ୍ଗିଯାଇଛି। ଅଟୋଟି ସଂପୂର୍ଣ୍ଣ ଭାଙ୍ଗରୁଜି ଯାଇଥିବା ବେଳେ କାରର ସାମାନ୍ୟ କ୍ଷତି ହୋଇଛି। ଘଟଣାସ୍ଥଳରେ ମଞ୍ଚେଶ୍ଵର ଥାନା ପୋଲିସ ପହଞ୍ଚି ଗାଡିଗୁଡିକ ଜବତ କରିଛି। ସେପଟେ ଦୁର୍ଘଟଣା ପାଇଁ ପଳାସୁଣୀ ଛକରେ ଟ୍ରାଫିକ୍ ଜାମ୍ ହୋଇଛି ।