ନନ୍ଦିଘୋଷ ବିୁରୋ: କାର୍ତ୍ତିକ ମାସରେ ପରିବା ଦରରେ ନିଆଁ । ୫ଶହ ଟଙ୍କାରେ ବ୍ୟାଗ ପୁରୁନି। ପରିବା ଦର ଆକାଶଛୁଆଁ ହୋଇଥିବାରୁ ମଧ୍ୟବିତ୍ତ ଶ୍ରେଣୀର ଲୋକଙ୍କ ମାସିକ ବଜେଟ ବିଗିଡି ଗଲାଣି । ପୁରୀ ଜିଲ୍ଲା କାକଟପୁର, ଅସ୍ତରଙ୍ଗ, କୋଣାର୍କ, ନୟାହାଟ ବଜାରରେ ଏବେ ବାଇଗଣ ୮୦ ଟଙ୍କା, ବିନ୍ସ ୬୦ ଟଙ୍କା, ଦେଶୀ ପୋଟଳ ୧୨୦ ଟଙ୍କା, କଲରା ୮୦ ଟଙ୍କା, ଜହ୍ନି ୭୦ ଟଙ୍କା ହୋଇଛି। ୫ଶହ ଟଙ୍କାରେ ବ୍ୟାଗ୍ ପୂରୁନି। ଯେଉଁଠି କେଜିଏ ଦରକାର ହେଉଥିଲା, ଏବେ ସେଠି ଅଢେଇଶରେ କାମ ଚଳୁଛି। କେବଳ ପରିବା ନୁହେଁ, ତେଲ ଦର ବି ନିଆଁ ଲଗାଇଛି। ସେପଟେ ଲଗାଣ ବର୍ଷା ଯୋଗୁଁ ଝାରିଆ, ବେଗୁନିଆବସ୍ତ, କୁଣ୍ଢେଇ ଅଞ୍ଚଳରେ ପରିବା ଫସଲ ନଷ୍ଟ ହୋଇଛି। ଆଗରୁ ଯେତିକି ଆସୁଥିଲା, ଏବେ ତାର ଚାରି ଭାଗରୁ ଭାଗେ ପରିବା ମାର୍କେଟକୁ ଆସୁଛି। ବିବାହ ଋତୁ ଆରମ୍ଭ ହେବାରୁ ଚାହିଦା ଆହୁରି ବଢ଼ିଛି।ମହଙ୍ଗା ମାଡ଼ ମଧ୍ୟରେ ଘରୋଇ ବସ୍ ଭଡ଼ା ମଧ୍ୟ ବଢ଼ିଛି। ମଧ୍ୟବିତ୍ତ ପରିବାର ଏବେ ମୁଣ୍ଡରେ ହାତ ଦେଇ ବସିଛି। କାଳ ହେଲାଣି ଦରଦାମ ବୃଦ୍ଧି। କାର୍ତ୍ତିକ ପୂର୍ଣ୍ଣିମା ପରେ ଶୀତୁଆ ପରିବା ଆସିଲେ ଟିକେ ଆଶ୍ୱସ୍ତି ମିଳିବ ବୋଲି ସମସ୍ତେ ଚାହିଁ ରହିଛନ୍ତି।
