ପ୍ରଭୁ ରାମଙ୍କ ଉପରେ ଦେଇଥିବା ମନ୍ତବ୍ୟ ପାଇଁ କ୍ଷମା ମାଗିଲେ ସୈଫ, କହିଲେ ରାମ ଆମ ପାଇଁ ହିରୋ

ନୂଆଦିଲ୍ଲୀ: ବଲିଉଡ ଅଭିନେତା ସୈଫ ଅଲ୍ଲୀ ଖାନ ଆଜିକାଲି ତାଙ୍କ ନୂଆ ଚଳଚ୍ଚିତ୍ରକୁ ନେଇ ବିବାଦରେ ରହୁଛନ୍ତି । ସୈଫଙ୍କ ଆଗାମୀ ଚଳଚ୍ଚିତ୍ର ଆଦିପୁରୁଷକୁ ନେଇ ଉଠିଛି ବିବାଦ । ଏହି ଚଳଚିତ୍ରରେ ରାବଣର ଚରିତ୍ରକୁ ଭଲ ରୂପରେ ପରିବେଷଣ କରାଯାଇ ରାମଙ୍କ ଭାବମୂର୍ତ୍ତିକୁ ଅପମାନିତ କରିବାକୁ ଚେଷ୍ଟା କରାଯାଇଛି ବୋଲି ବିରୋଧି କହଛନ୍ତି । ଏଭଳି ବିବାଦ ଦେଖାଦେବା ପରେ  ଅଭିନେତା ସୈଫ ଅଲି ଖାନଙ୍କ ତାଙ୍କର ପ୍ରତିକ୍ରିୟା ରଖିଛନ୍ତି ।

ସୈଫ ଅଲ୍ଲୀ ଖାନ ଏକ ବିବୃତ୍ତିରେ ନିଜର ମନ୍ତବ୍ୟ ରଖିଛନ୍ତି । ସେ କହିଛନ୍ତି ଯେ ସାକ୍ଷାତକାରରେ ମୋର ମନ୍ତବ୍ୟ ପାଇଁ ଲୋକମାନେ ଅଧିକ ଆଘାତ ପାଇଛନ୍ତି । ମୁଁ ଏହା କରିବାକୁ ଇଚ୍ଛା କରି ନାହିଁ କିମ୍ବା କୌଣସି ପ୍ରକାରେ ଏହା ଚାହେଁ ନାହିଁ । ମୁଁ ମୋର ବିବୃତ୍ତି ପ୍ରତ୍ୟାହାର କରିବା ସହ ମୋ ଦ୍ୱାରା ଆଘାତ ପାଇଥିବା ଲୋକଙ୍କୁ ମୁଁ କ୍ଷମା ମାଗୁଛି ବୋଲି ସୈଫ କହିଛନ୍ତି । ସେ ଆହୁରି ମଧ୍ୟ କହିଛନ୍ତିଯେ ତାଙ୍କ ପାଇଁ ପ୍ରଭୁ ରାମ ସର୍ବଦା ଜଣେ ହିରୋଙ୍କ ପ୍ରତିଛବି ରହିଆସିଛନ୍ତି । ଆଦିପୁରୁଷ ହେଉଛି ମନ୍ଦ ଉପରେ ଭଲର ବିଜୟର ଉତ୍ସବ । ଏହି ମହାନ କାହାଣୀକୁ ପରଦାରେ ରଖିବା ପାଇଁ ଆମର ପୁରା ଟିମ୍ କାର୍ଯ୍ୟ କରୁଛି  ।

ଆଦିପୁରୁଷ ଚଳଚ୍ଚିତ୍ର ବିଷୟରେ କହିବାକୁ ଗଲେ ଏହି ଚଳଚ୍ଚିତ୍ରଟି ବାହୁବଲୀ ଖ୍ୟାତି ସାଉଥ ସୁପରଷ୍ଟାର ପ୍ରଭାସଙ୍କ ପରବର୍ତ୍ତୀ ଚଳଚ୍ଚିତ୍ର । ଏହି ଚଳଚ୍ଚିତ୍ରରେ ସୈଫ ଲଙ୍କେଶ ଭୂମିକାରେ ଅଭିନୟ କରିବାକୁ ଯାଉଛନ୍ତି । ପ୍ରଭାସଙ୍କୁ ରାମ ଭୂମିକାରେ ଦେଖିବାକୁ ମିଳିବ । ଆଦିପୁରୁଷ ଅଗଷ୍ଟ ୧୧, ୨୦୨୨ରେ ମୁକ୍ତିଲାଭ କରିବ ।