ଭୁବନେଶ୍ୱର: ଦେଶର ପ୍ରଥମ ରାଜ୍ୟ ଭାବେ ସବୁ ଜିଲ୍ଲାରେ ଏପ୍ରିଲ ମାସରେ କୋଭିଡ୍ ହସପିଟାଲ ପ୍ରତିଷ୍ଠା କରିଥିଲା ଓଡ଼ିଶା । ନୀତି ଆୟୋଗ ପୁସ୍ତକ- ମିଟିଗେସନ ଆଣ୍ଡ ମ୍ୟାନେଜମେଣ୍ଟ ଅଫ୍ କୋଭିଡ଼- ୧୯ରେ ରାଜ୍ୟର କୋଭିଡ୍ ପରିଚାଳନା ସଂପର୍କରେ ଉଲ୍ଲେଖ ରହିଛି । ପ୍ରଥମ ରାଜ୍ୟ ଭାବେ ଓଡ଼ିଶା ସରକାର କୋଭିଡ ହସ୍ପିଟାଲ ପାଇଁ ଦୁଇଟି ଘରୋଇ ହସ୍ପିଟାଲ ସହ MOU କରିଥିଲେ ।
ଏହାସହ ଏପ୍ରିଲ ଶେଷ ସୁଦ୍ଧା ସବୁ ଜିଲ୍ଲାରେ ସ୍ୱତନ୍ତ୍ର କୋଭିଡ ହସ୍ପିଟାଲ ପ୍ରତିଷ୍ଠା କରିଥିଲା। ପିଲାମାନଙ୍କୁ ସଚେତନ କରିବାକୁ ଅନଲାଇନରେ ମୋ ପ୍ରତିଭା ଆୟୋଜନ କରାଯାଇଥିଲା। ସ୍ୱାସ୍ଥ୍ୟ କର୍ମୀଙ୍କ ଆଗୁଆ ବେତନ ସହ ସେମାନଙ୍କୁ ଉଚିତ ସମ୍ମାନ ପ୍ରଦାନ କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବ୍ୟକ୍ତିଗତ ଭାବେ ରାଜ୍ୟବାସୀଙ୍କୁ ଅନୁରୋଧ କରିଥିବା କଥା ବି ପୁସ୍ତକରେ ସ୍ଥାନ ପାଇଛି । ସେହିପରି କୋଭି଼ଡ୍ ଯୋଦ୍ଧାଙ୍କୁ ଦୁର୍ବ୍ୟବହାର ବିରୋଧରେ କାର୍ଯ୍ୟାନୁଷ୍ଠାନର ଚେତାବନୀ ଦେଇ ସ୍ୱାସ୍ଥ୍ୟକର୍ମୀଙ୍କ ସାହସ ବଢାଇଥିଲେ ନବୀନ ।
ରାଜ୍ୟ ସରକାରଙ୍କ ସ୍ୱାସ୍ଥ୍ୟକର୍ମୀଙ୍କ ମୃତ୍ୟୁରେ ପରିବାର ଲୋକଙ୍କୁ ୫୦ଲକ୍ଷ ଓ ଗଣମାଧ୍ୟମ ପ୍ରତିନିଧିଙ୍କ ମୃତ୍ୟୁରେ ୧୫ ଲକ୍ଷ ଟଙ୍କା ପ୍ରଦାନ ଘୋଷଣା ସଂପର୍କରେ ବି ପୁସ୍ତକରେ ଉଲ୍ଲେଖ କରାଯାଇଛି । ମହାମାରୀ ସମୟରେ ୫ ଲକ୍ଷ ପ୍ରବାସୀଙ୍କୁ ଫେରାଇ ଆଣିବା ସହ ମାଗଣା ସ୍ଵାସ୍ଥ୍ୟ ସେବା ଯୋଗାଇ ଦିଆଯାଇଥିଲା । ଏହି ସମୟରେ ପଞ୍ଚାୟତିରାଜ ବ୍ୟବସ୍ଥାକୁ ସକ୍ରିୟ କରି ସରପଞ୍ଚଙ୍କୁ କ୍ଷମତା ପରିସର ବୃଦ୍ଧି ସଂପର୍କରେ ବି ଏଥିରେ ଉଲ୍ଲେଖ ରହିଛି।
