ନାବାଳିକାଙ୍କ ମାଆଙ୍କ ବିସ୍ଫୋରକ ବୟାନ- ‘ଦୁଷ୍କର୍ମ ପରେ ପୀଡ଼ିତାଙ୍କୁ ୨ଥର ଭେଟିଥିଲେ ଜଗି’

ଭୁବନେଶ୍ୱର: ମୁହଁ ନଖୋଲିବାକୁ ଓଟିଭି ଏମଡି ଜଗୀ ମଙ୍ଗତ ପଣ୍ଡା ପକାଉଥିଲେ ଚାପ । ଇନଫୋସିଟି ନାବାଳିକା ଗଣଦୁଷ୍କର୍ମ ମାମଲାରେ ସାଂଘାତିକ ଅଭିଯୋଗ । ଓଟିଭି ଏମଡି ଜଗୀ ପଣ୍ଡାଙ୍କ ବିରୋଧରେ ବିସ୍ଫୋରକ ବୟାନ ଦେଇଛନ୍ତି ପୀଡ଼ିତା ନାବାଳିକାଙ୍କ ମାଆ । ରାଜ୍ୟ ଶିଶୁ ସୁରକ୍ଷା ଆୟୋଗରେ ହାଜର ହୋଇ ପକ୍ଷ ରଖିବା ବେଳେ ପୀଡ଼ିତାଙ୍କ ମାଆ ଜଗୀଙ୍କ ଅସଲ ମୁଖା ଖୋଲିଛନ୍ତି । ଜଣେ ନାରୀ ହୋଇ ଜଗୀ କିଭଳି ନାବାଳିକା ଓ ମାଆଙ୍କୁ ମାରିବାକୁ ଧମକ ଦେଇଥିଲେ ସବୁ କିଛି କମିଶନଙ୍କୁ ଅବଗତ କରାଇଛନ୍ତି ।

ଲକଡାଉନ୍ ସମୟରେ ଗଣଦୁଷ୍କର୍ମ ପରେ ପୀଡ଼ିତାଙ୍କୁ ଓଟିଭି ଏମଡି ଜଗୀ ମଙ୍ଗତ ପଣ୍ଡା ୨ ଥର ଭେଟିଥିବା କହିଛନ୍ତି ନାବାଳିକାଙ୍କ ମାଆ । ଏପରିକି ପୋଲିସରେ ଅଭିଯୋଗ ପୂର୍ବରୁ ଜଗୀ ପୀଡ଼ିତାଙ୍କୁ ଭେଟି ଘଟଣା ବାବଦରେ କାହାରିକୁ କିଛି ନକହିବା ଲାଗି ଚାପ ପକାଇଥିଲେ । ଗଣଦୁଷ୍କର୍ମ ନେଇ ବାହାରେ କାହା ଆଗରେ କଥା ପ୍ରକାଶ କଲେ ମାଆ, ଝିଅକୁ ଜୀବନରେ ମାରି ଦେବାକୁ ଜଗୀ ଧମକ ଦେଇଥିଲେ ।

ଗଣଦୁଷ୍କର୍ମ ଅଭିଯୋଗକୁ ଚାପିବା ପାଇଁ ଧମକ ଦେବା ଠାରୁ ଆରମ୍ଭ କରି ତଦନ୍ତରେ ଅସହଯୋଗ । କାହିଁକି ଜଗୀ ବାରମ୍ବାର ନୋଟିସ୍ ସତ୍ତ୍ୱେ ବ୍ୟକ୍ତିଗତ ହାଜର ହେଉନାହାଁନ୍ତି । ତଦନ୍ତକୁ ବାଟବଣା ଓ ବିଳମ୍ବିତ କରିବା ଲାଗି ଓଟିଭି ଏମଡି ଜଗୀ ମଙ୍ଗତ ପଣ୍ଡା ଏପରି କରୁଥିବା ପୀଡ଼ିତାଙ୍କ ଓକିଲ ପ୍ରତିକ୍ରିୟା ଦେଇଛନ୍ତି । ଆସନ୍ତା ଡିସେମ୍ବର ୨ ତାରିଖରେ ଶିଶୁ ସୁରକ୍ଷା ଆୟୋଗରେ ଏହି ମାମଲାର ପରବର୍ତ୍ତୀ ଶୁଣାଣି ହେବ । ପରବର୍ତ୍ତୀ ଶୁଣାଣିରେ ବ୍ୟକ୍ତିଗତ ଭାବେ ହାଜର ହୋଇ ପକ୍ଷ ରକ୍ଷିବାକୁ ଆୟୋଗ ଓଟିଭି ଏମଡିଙ୍କୁ ନୋଟିସ୍ ଜାରି କରିଛନ୍ତି ।

ଏଥିସହ ପଢ଼ନ୍ତୁ- ନାବାଳିକା ଗଣଦୁଷ୍କର୍ମ ମାମଲା, ବ୍ୟକ୍ତିଗତ ହାଜର ପାଇଁ ଓଟିଭି ଏମଡିଙ୍କୁ ନୋଟିସ୍