ସୁପ୍ରିମକୋର୍ଟରୁ କେନ୍ଦ୍ରକୁ ଝଟକା: ସଂପୃକ୍ତ ରାଜ୍ୟ ଅନୁମତି ନଦେଲେ ତଦନ୍ତ କରିପାରିବ ନାହିଁ CBI
ନୂଆଦିଲ୍ଲୀ: ରାଜ୍ୟ ସରକାରଙ୍କ ବିନା ସହମତିରେ ସମ୍ପୃକ୍ତ ରାଜ୍ୟରେ ତଦନ୍ତ କରି ପାରିବ ନାହିଁ ସିବିଆଇ । ସିବିଆଇର ଅଧିକାର ଓ ତଦନ୍ତ ପରିସର ନେଇ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି ସୁପ୍ରିମକୋର୍ଟ । ଡିଏସପିଇ ଆକ୍ଟର ଧାରା ୬ ଅନୁସାରେ ସଂଘୀୟ ବ୍ୟବସ୍ଥାରେ ସିବିଆଇ କୌଣସି ରାଜ୍ୟରେ ତଦନ୍ତ କରିବାକୁ ଚାହୁଁଥିଲେ ସେହି ରାଜ୍ୟରେ ଅନୁମତି ନିହାତି ଆବଶ୍ୟକ ।
ରାଜ୍ୟ ସରକାରଙ୍କ ସୁପାରିଶ କ୍ରମେ କେନ୍ଦ୍ର ସରକାର ସିବିଆଇ ତଦନ୍ତ ପାଇଁ ଅନୁମତି ଦେଇଥାନ୍ତି । ତାସତ୍ତ୍ୱେ ବି ସିବିଆଇକୁ ସାଧାରଣ ଅନୁମତିର ଆବଶ୍ୟକ ରହିଛି । ପୂର୍ବରୁ କଂଗ୍ରେସ ଶାସିତ ତଥା ବିଜେପି ବିରୋଧୀ ରାଜ୍ୟରେ ବିନା ଅନୁମତିରେ ସିବିଆଇ ତଦନ୍ତ କରିବପାରିବ ନାହିଁ ବୋଲି ନିୟମ କରାଯାଇଛି ।
ଏବେ ସୁପ୍ରିମକୋର୍ଟ ଏନେଇ ନିର୍ଦ୍ଦେଶ ଦେବା ପରେ ସିବିଆଇ ପାଇଁ କୌଣସି ରାଜ୍ୟରେ ପଶି ମନଇଚ୍ଛା ତଦନ୍ତ କରିବା ଉପରେ କଟକଣା ଲାଗିଛି । ଧାରା ୫ ଅନୁସାରେ କେନ୍ଦ୍ର ସରକାର ନିଜ ଅଧିକାର କେନ୍ଦ୍ର ଶାସିତ ଅଞ୍ଚଳ ବା ରାଜ୍ୟରେ ବିସ୍ତାର କଲେ ମଧ୍ୟ ସମ୍ପୃକ୍ତ ରାଜ୍ୟର ଅନୁମତି ଆବଶ୍ୟକ ବୋଲି ସୁପ୍ରିମକୋର୍ଟ କହିଛନ୍ତି । ସୁପ୍ରିମକୋର୍ଟର ବିଚାରପତି ଏ.ଏମ ଖାନୱିଲକର ଓ ବି.ଆର ଗାଭାଇଙ୍କ ଖଣ୍ଡପୀଠ ଏହି ରାୟ ପ୍ରକାଶ କରିଛନ୍ତି । ମାସେ ତଳେ କେରଳ ସରକାର ମଧ୍ୟ ସିବିଆଇ ତଦନ୍ତ ପାଇଁ ରାଜ୍ୟର ଅନୁମତି ଦରକାର ବୋଲି ନୋଟିସ ଜାରି କରିଛନ୍ତି ।
