ଜମ୍ମୁ-କାଶ୍ମୀରର ମୁସଲିମ୍ ବହୁଳ ଅଞ୍ଚଳରୁ ମୁସଲମାନଙ୍କୁ ହଟାଇବା ଲାଗି ଷଡ଼ଯନ୍ତ୍ର କରୁଛି କେନ୍ଦ୍ର: ମେହବୁବା

ଶ୍ରୀନଗର: ତ୍ରିରଙ୍ଗା, କାଶ୍ମୀର ଯୁବକଙ୍କୁ ଚାକିରି ପରେ ଆଉ ଏକ ଗୁଳି ମାରିଛନ୍ତି ମେହବୁବା ମୁଫତି । ଏଥରକ ଧର୍ମ, ସମ୍ପ୍ରଦାୟକୁ ନେଇ ଜମ୍ମୁ-କାଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ମେହବୁବା କେନ୍ଦ୍ର କୋର୍ଟକୁ ଫିଙ୍ଗିଛନ୍ତି ବଲ୍ । ଅଭିଯୋଗ କରିଛନ୍ତି- କେନ୍ଦ୍ର ସରକାର ଜନସଂଖ୍ୟା ପରିର୍ତ୍ତନ ଲାଗି ଷଡ଼ଯନ୍ତ୍ର କହିଛନ୍ତି । କେନ୍ଦ୍ର ସରକାରଙ୍କ ନିଷ୍ପତ୍ତି- ମୁସଲିମ୍ ବହୁଳ ଅଞ୍ଚଳରୁ ମୁସଲମାନମାନଙ୍କୁ ବାହାର କରି ଦେବା ଲାଗି ଉଦ୍ଦିଷ୍ଟ ବୋଲି ମେହବୁବା ସଂଗୀନ ଅଭିଯୋଗ କରିଛନ୍ତି ।

ସୋମବାର ବିଜେପିକୁ ଟାର୍ଗେଟ୍ କରି ମେହବୁବା କହିଛନ୍ତି- କେନ୍ଦ୍ର ସରକାର ଏମିତି ଷଡ଼ଯନ୍ତ୍ର କରୁଛନ୍ତି । ଯାହାଦ୍ୱାରା ଜମ୍ମୁ-କାଶ୍ମୀରର ଜନସଂଖ୍ୟା ବଦଳିଯିବ । ମେହବୁବା ଅଭିଯୋଗ କରିଛନ୍ତି- କେନ୍ଦ୍ର ଜମ୍ମୁ-କାଶ୍ମୀରର ଲୋକଙ୍କ ମଧ୍ୟରେ ଭାଗବଣ୍ଟା ରାଜନୀତି କରୁଛି । କେନ୍ଦ୍ର ନୀତି ଏହି ହେଉଛି କୌଣସି ପ୍ରକାରେ ଏଠାକାର ମୁସଲିମ୍ ବହୁଳ ଅଞ୍ଚଳରୁ ମୁସଲମାନଙ୍କୁ ବାହାର କରି ଦିଆଯିବ ।

ନିର୍ବାଚନ ପୂର୍ବରୁ ବଡ଼ ଅଭିଯୋଗ

ଜମ୍ମୁ-କାଶ୍ମୀରରେ ଜିଲ୍ଲା ବିକାଶ ପରିଷଦ ନିର୍ବାଚନ ହେଉଥିବା ବେଳେ ମେହବୁବାଙ୍କ ଏଭଳି ବୟାନ ଆସିଛି । ରାଜ୍ୟରେ ଆସନ୍ତା କିଛି ଦିନ ମଧ୍ୟରେ ବିକାଶ ପରିଷଦ ଆସନ ପାଇଁ ମତଦାନ ହେବ । ପିପୁଲ୍ସ ଗ୍ରୁପ୍ ଫର ଗୁପକାର ମେଣ୍ଟରେ ସାମିଲ ହୋଇଥିବା ମେହବୁବାଙ୍କ ଦଳ ଏଥର ନିର୍ବାଚନ ଲଢୁଛି । ଯାହାକୁ ଗୁପକାର ମେଣ୍ଟ ବୋଲି ମଧ୍ୟ କୁହାଯାଉଛି । ମେହବୁବା ଏହି ମେଣ୍ଟରେ କଂଗ୍ରେସ, ନ୍ୟାସନାଲ କନଫରେନ୍ସ ଓ ଅନ୍ୟ ଦଳ ସହିତ ନିର୍ବାଚନକୁ ଓହ୍ଲାଇଛନ୍ତି । ମେଣ୍ଟର ପ୍ରମୁଖ ପ୍ରତିଦ୍ୱନ୍ଦ୍ୱୀ ହେଉଛି ବିଜେପି ।