ପୁଣି ସାମ୍ନାକୁ ଆସିଲା ବିଜେପି ନେତ୍ରୀଙ୍କ ଅପରାଧୀ ଲିଙ୍କ୍
ଭୁବନେଶ୍ୱର: ପୁଣି ସାମ୍ନାକୁ ଆସିଲା ବିଜେପି ନେତ୍ରୀଙ୍କ ଅପରାଧୀ ଲିଙ୍କ୍ । ମହିଳାଙ୍କୁ ଅସଦାଚରଣ କରି ଜଣେ ଅଭିଯୁକ୍ତ ଜେଲ୍ରେ ଥିବା ବେଳେ, ତା’ସହ ବିଜେପି ନେତ୍ରୀଙ୍କ ଲିଙ୍କ୍ ଥିବା ଜଣାପଡ଼ିଛି । ଆମେ କହୁଛୁ ଭୁବନେଶ୍ୱର ସାଂସଦ ଅପରାଜିତା ସଢ଼ଙ୍ଗୀଙ୍କ କଥା । ସାଂସଦ ଭାବେ ନିର୍ବାଚିତ ହେବା ଦିନଠାରୁ ଅପରାଜିତା ବିଭିନ୍ନ ବିବାଦରେ ଛନ୍ଦି ହୋଇଆସୁଛନ୍ତି । କେତେବେଳେ ତାଙ୍କ ସହଯୋଗୀ ତଥା ସାଂସଦ ପ୍ରତିନୀଧିଙ୍କ ନାଁରେ ବଟି ଆଦାୟ କରୁଥିବା ଅଭିଯୋଗ ଆସୁଛି ତ କେତେବେଳେ ଖୋଦ୍ ଅପରାଜିତା ନିୟମ କାନୁନ ଭାଙ୍ଗି ନିଜର ଅମାନିଆପଣ ଦେଖାଉଛନ୍ତି ।
ଏବେ ପୁଣି ସାମ୍ନାକୁ ଆସିଛି, ଜଣେ ଅଭିଯୁକ୍ତଙ୍କ ସହ ସାଂସଦଙ୍କ ଲିଙ୍କ୍ ଘଟଣା । ବରଗଡ଼ ଥାନା ପୋଲିସ କିଛି ଦିନ ପୂର୍ବେ ଜଣେ ପୂଜକଙ୍କୁ ଗିରଫ କରିଥିଲା । ଆଉ ସେହି ପୂଜକ ସହ ସାଂସଦଙ୍କ ଲିଙ୍କ୍ ରହିଥିବା ଜଣାପଡ଼ିଛି । ସାଂସଦ ଓ ଅଭିଯୁକ୍ତ ପୂଜକଙ୍କ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଉକ୍ତ ପୂଜକ ଜଣକ ମନ୍ଦିରରେ ଜଣେ ମହିଳାଙ୍କୁ ଅସଦାଚରଣ କରିବା ସହ ତାଙ୍କ ଭିଡିଓ ଭାଇରାଲ କରିଥିଲେ । ତେଣୁ ତାଙ୍କୁ ପୋଲିସ ଗିରଫ କରିଛି । ସେ ଏବେ ଜେଲ୍ରେ ଥିବା ବେଳେ ସାଂସଦ ଅପରାଜିତାଙ୍କ ସହ ତାଙ୍କର ସମ୍ପର୍କ ଥିବା ନେଇ ଚର୍ଚ୍ଚା ହେଉଛି । ଅପରାଜିତାଙ୍କ ଜନ୍ମଦିନ ଅବସରରେ ସେ ତାଙ୍କୁ ଫୁଲ ତୋଡ଼ା ନେଇ ଦେଉଥିବା ସହ ସେଲ୍ଫୀ ଫଟୋ ଏବେ ଭାଇରାଲ ହେଉଛି ।
ଏଭଳି ଅନେକ ଅଭିଯୋଗ, ପୂର୍ବରୁ ମଧ୍ୟ ସାଂସଦଙ୍କ ନାଁରେ ରହିଛି । ସାଂସଦ ପ୍ରତିନିଧି ଭାବେ ଭୁବନେଶ୍ୱରରେ ନିଜର ଦବ୍ଦବା ଜାହିର କରୁଥିବା ଜଣେ ବାହୁବଳି ବ୍ୟକ୍ତି ସବୁବେଳେ ସାଂସଦଙ୍କ ଚାରିପାଖେ ରୁହନ୍ତି । ଆଉ ସେହି ବାହୁବଳିଙ୍କ ନାଁରେ ରହିଛି ଅନେକ ଅଭିଯୋଗ । ବଟି ଆଦାୟଠାରୁ ଆରମ୍ଭ କରି ଜୀବନରୁ ମାରିଦେବା ଭଳି ମାମଲା ତାଙ୍କ ନାଁରେ ରହିଛି । ଖାଲି ସେତିକି ନୁହେଁ ବିଭିନ୍ନ ଅପରାଧିକ ମାମଲାରେ ଜଡ଼ିତ ଥିବାରୁ ତାଙ୍କୁ ପୋଲିସ ଗିରଫ ମଧ୍ୟ କରିଥିଲା । ମାସ ମାସ ଧରି ସେ ଜେଲ୍ରେ ମଧ୍ୟ ଦିନ କାଟିଛନ୍ତି ।
