ରାତି ଅଧରେ ଗୁପ୍ତଧନ ପାଇଁ ଚାଲିଥିଲା ତନ୍ତ୍ରସାଧନା, ଶେଷରେ ଏମିତି ହେଲା
ଧର୍ମଗଡ଼: ମାଟି ତଳେ ବିପୁଳ ପରିମାଣରେ ଧନ ଲୁଚି ରହିଛି । ମାଟି ଖୋଳିଲେ ମିଳିବ ପ୍ରଚୁର ପରିମାଣରେ ଟଙ୍କା ପଇସା । ସବୁ ଅସୁବିଧା ଦୂର ହେବ । ତନ୍ତ୍ର ପାଠ ସାଧନା କାରଣରୁ ମିଳିଛି ଆଦେଶ । ଖେଳ ପଡ଼ିଆ ମଝିରେ ଲୁଚି ରହିଛି ଏଭଳି ପ୍ରଚୁର ପରିମାଣରେ ଗୁପ୍ତଧନ । ଗୁପ୍ତଧନକୁ ପାଇବାକୁ ହେଲେ ପ୍ରଥମେ ପୂଜା ପାଠ ଏବଂ ପରେ ମାଟି ଖୋଳିବାକୁ ପଡ଼ିବ । ଏଭଳିତି କିଛି ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଧର୍ମଗଡ଼ ରଙ୍କା ବାହାଲ୍ ଗାଁରରେ ।
ଅନ୍ଧବିଶ୍ୱାସର ଅନ୍ଧଗଳିରେ ଏବେବି କିଛି ବ୍ୟକ୍ତି ଘରିବୁଲନ୍ତି । ତନ୍ତ୍ରମନ୍ତ୍ର ସାଧନାରେ ସବୁ କିଛି ହାସଲ କରିପାରିବେ ବୋଲି ପ୍ରଚାର କରନ୍ତି । ହେଲେ ସେଭଳି ପ୍ରଚାର ପ୍ରତିଥର ବିଫଳ ହୋଇଥାଏ । ଏଥର ମଧ୍ୟ ଏମିତି କିଛି ଅନ୍ଧବିଶ୍ୱାସର ଶିକାର ହୋଇ ବିଫଳ ହୋଇଛନ୍ତି ୯ ଜଣ ବ୍ୟକ୍ତି ।
ବିଳମ୍ବିତ ରାତିରେ ଖେଳ ପଡ଼ିଆ ମଝିରେ ଚାଲିଥିଲା ତନ୍ତ୍ରସାଧନା । ପାଖରେ ଥିଲା ମଣିଷ ହାଡ଼, ନଡ଼ିଆ, ସିନ୍ଦୁର, ଝୁଣା, ଧୂପ ଆଦି ସାମଗ୍ରୀ । ତନ୍ତ୍ରମନ୍ତ୍ର ପାଠ ସହ ଫାଉଡ଼ାରେ ଖୋଳା ଚାଲିଥିଲା ମାଟି । କାରଣ ଖେଳ ପଡ଼ିଆରୁ ମିଳିଥାନ୍ତା ଗୁପ୍ତଧନ । ହେଲେ ସବୁକିଛି ଭଣ୍ଡୁର ହୋଇଗଲା । ଗୁପ୍ତଧନ ସେଇ ମାଟି ଭିତରେହିଁ ରହିଗଲା ।
ପୂଜା ଚାଲିଥିବା ବେଳେ ଚାଷ ଜମିକୁ ପାଣି ମଡ଼ାଇ ବାକୁ ଯାଇଥିବା ବେଳେ କିଛି ଲୋକ ଖେଳ ପଡ଼ିଆ ଖୋଳୁଥିବା ଦେଖି ସ୍ଥାନୀୟ ଲୋକଙ୍କୁ ଜଣାଇଥିଲେ । ଏହା ଜାଣିବା ପରେ ସ୍ଥାନୀୟ ଲୋକେ ଏକାଠି ହୋଇ ଘଟଣା ସ୍ଥଳରେ ପହଞ୍ଚିଥିଲେ । ତାନ୍ତ୍ରୀକ ମାନଙ୍କୁ କାବୁ କରିବା ବେଳେ ୭ ଜଣ ଖସି ପଳାଇଥିବା ବେଳେ କେବଳ ୨ ଜଣ ଧରାପଡ଼ିଥିଲେ । ଧରାପଡ଼ିବା ପରେ ସବୁ କଥା ସାମ୍ନାକୁ ଆସିଥିଲା । ଗୁପ୍ତଧନ ପାଇଁ ବିଲ ଖୋଳୁଥିଲେ ବୋଲି କହିଥିଲେ ୨ ଗୁଣିଆ ।
ତନ୍ତ୍ର ପୂଜା ପାଠ ପାଇଁ ଆବଶ୍ୟକ ପୁସ୍ତକ, ମଣିଷ ହାଡ଼ ଓ ତିନୋଟି ବାଇକ୍ ଜବତ କରି ଗ୍ରାମବାସୀ ପୋଲିସକୁ ଖବର ଦେଇଥିଲେ । ପୋଲିସ ଘଟଣା ସ୍ଥଳରେ ପହଞ୍ଚି ପ୍ରଥମିକ ତଦନ୍ତ ଆରମ୍ଭ କରିଛି । ତେବେ ତନ୍ତ୍ରିକ ମାନେ ଜୁନାଗଡ଼ ଓ କଲମପୁର ଅଞ୍ଚଳର ବୋଲି ପ୍ରାଥମିକ ତଦନ୍ତ ରୁ ଜଣା ପଡ଼ିଛି ।
