ଅପରାହ୍ନ ୩ଟା ସୁଦ୍ଧା ବାଲେଶ୍ୱର ଓ ତିର୍ତ୍ତୋଲରେ ହୋଇଛି ୫୫.୯୬ପ୍ରତିଶତ ମତଦାନ

ବାଲେଶ୍ୱର/ତିର୍ତ୍ତୋଲ: କୋଭିଡ୍ କଟକଣା ମଧ୍ୟରେ ବାଲେଶ୍ୱର ଓ ତିର୍ତ୍ତୋଲରେ ଚାଲିଛି ଉପନିର୍ବାଚନ ପାଇଁ ମତଦାନ । ଅପରାହ୍ନ ୩ଟା ସୁଦ୍ଧା ୫୫.୯୬ପ୍ରତିଶତ ମତଦାନ ହୋଇଥିବା ବେଳେ ବାଲେଶ୍ୱରରେ ୫୪.୮୫ପ୍ରତିଶତ ତିର୍ତ୍ତୋଲରେ ୫୭.୦୪ ପ୍ରତିଶତ ଭୋଟିଂ ହୋଇଥିବା ସୂଚନା ମିଲିଛି । ସବୁଠି ସୁରୁଖୁରୁରେ ଚାଲିଛି ମତଦାନ ପ୍ରକ୍ରିୟା  ।

ରାଜ୍ୟ ନିର୍ବାଚନ ଅଧିକାରୀ ଏନେଇ ସୂଚନା ଦେଇଛନ୍ତି । ବାଲେଶ୍ବର ସଦରରେ ତିନି ପ୍ରମୁଖ ଦଳ ମଧ୍ୟରେ କଡା ଟକ୍କର ଚାଲିଛି । ବିଜେଡିରୁ ସ୍ବରୂପ ଦାସ, ବିଜେପିରୁ ମାନସ ଦତ୍ତ ଏବଂ କଂଗ୍ରେସ ପ୍ରାର୍ଥୀ ମମତା କୁଣ୍ଡୁଙ୍କ ଭାଗ୍ୟ ନିର୍ଦ୍ଧାରଣ କରୁଛନ୍ତି ଭୋଟର । ସେହିପରି ତିର୍ତ୍ତୋଲରେ ବି ତ୍ରିମୁଖୀ ଲଢେଇ ।

ବିଜେଡି ପ୍ରାର୍ଥୀ ବିଜୟଶଙ୍କର ଦାସ, ବିଜେପି ପ୍ରାର୍ଥୀ ରାଜକିଶୋର ବେହେରା ଏବଂ କଂଗ୍ରେସରୁ ହିମାଂଶୁ ଭୂଷଣ ମଲ୍ଲିକଙ୍କ ମଧ୍ୟରେ ମୁକାବିଲା ଚାଲିଛି । ବାଲେଶ୍ୱରରେ ମତଦାନ କରୁଛନ୍ତି ୨ଲକ୍ଷ ୨୫ ହଜାରରୁ ଅଧିକ ଭୋଟର । ସେପଟେ ତିର୍ତ୍ତୋଲରେ ୯ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରୁଛନ୍ତି ୨ଲକ୍ଷ ୩୯ ହଜାରରୁ ଅଧିକ ଭୋଟର ।