ଚିରାଗ ପାଶୱାନ୍ ଦାବି: ନିର୍ବାଚନ ପରେ ନୀତୀଶ ଛାଡ଼ିବେ ଏନଡିଏ, ୨୦୨୪ରେ ପ୍ରଧାନମନ୍ତ୍ରୀ ମୋଦୀଙ୍କୁ କରିବେ ଚ୍ୟାଲେଞ୍ଜ
ପାଟନା: ବିହାର ନିର୍ବାଚନକୁ ନେଇ ବଢ଼ିବାରେ ଲାଗିଛି ଉତ୍କଣ୍ଠା । ଦିନକୁ ଦିନ ରୋମାଞ୍ଚକର ହେବାକୁ ଲାଗିଛି ବିହାର ନିର୍ବାଚନ । ରାଜନୈତିକ ଦଳ ମାନଙ୍କର ଭିତିରି କଥା ପଦାରେ ପଡ଼ିବାରେ ଲାଗିଛି । ଯେଉଁଥିପାଇଁ ଆଗାମି ଦିନରେ ଇଲେକ୍ସନର ଅଙ୍କ ବାହାରିବା ପରେ ରାଜନୈତିକ କ୍ଷେତ୍ରରେ ପରିବର୍ତ୍ତନ ହୋଇପାରେ । ତେବେ ଲୋକ ଜନଶକ୍ତ ପାର୍ଟି (ଏଲଜେପି) ର ସଭାପତି ଚିରାଗ ପାଶୱାନଙ୍କ ମତକୁ ନେଇ ଏବେ ଚର୍ଚ୍ଚା ଜୋର ଧରିଛି । ରବିବାର ପାଶୱାନ ଦାବି କରିଛନ୍ତି ଯେ ମୁଖ୍ୟମନ୍ତ୍ରୀ ନୀତିଶ କୁମାର ବିଜେପି ଠାରୁ ଅଲଗା ହୋଇପାରନ୍ତି ।
ନିର୍ବାଚନର ଫଳାଫଳ ପରେ ରାଜ୍ୟର ମୁଖ୍ୟ ବିରୋଧୀ ଦଳ ଆରଜେଡିଙ୍କ ନେତୃତ୍ୱରେ ଗଠିତ ମହାସଂଘରେ ଯୋଗ ଦେଇପାରନ୍ତି ନୀତିଶ । ୨୦୨୪ ଲୋକସଭା ନିର୍ବାଚନରେ ଏନଡିଏକୁ ଚ୍ୟାଲେଞ୍ଜ କରିବାକୁ ଆଉ ଏକ ପ୍ରୟାସ କରିବ । ବିହାର ବିଧାନସଭା ନିର୍ବାଚନରେ ଏକା ପ୍ରତିଦ୍ୱନ୍ଦ୍ୱିତା କରିବାକୁ ନିଷ୍ପତ୍ତି ନେଇଥିବା ଚିରାଗ ପାଶୱାନ୍ ଏହି ନିର୍ବାଚନ ପରେ ନୀତୀଶଙ୍କୁ ମୁଖ୍ୟମନ୍ତ୍ରୀ ଭାବରେ ଗ୍ରହଣୀୟ ନୁହଁ ବୋଲି ଦାବି କରିଆସୁଛନ୍ତି । ଏହାସହ ଚଳିତ ବିଧାନସଭା ନିର୍ବାଚନ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ହାତକୁ ମଜବୁତ କରିବାକୁ ସେ ବିଜେପିକୁ ସମର୍ଥନ କରିବାକୁ ଚାହୁଁଛନ୍ତି ବୋଲି ଏହା ମଧ୍ୟ ଚର୍ଚ୍ଚା ହେଉଛି ।
ଚିରାଗ ପାଶୱାନ୍ ଦାବି କରିଛନ୍ତି ଯେ ବାରମ୍ବାର ଓଲଟିବା କାରଣରୁ ‘ପଲଟୁରା’ ନାମରେ ପରିଚିତ ନୀତୀଶ କୁମାର ତାଙ୍କୁ ଏହି ନିର୍ବାଚନ ପରେ ପୁଣି ଥରେ ସଲଟି ପାରନ୍ତି । ଆରଜେଡି ମୁଖ୍ୟ ଲାଲୁ ପ୍ରସାଦଙ୍କ ସହ ଦୀର୍ଘ ରାଜନୈତିକ ଯୁଦ୍ଧ ପରେ ସେ ବିହାରରେ କ୍ଷମତାକୁ ଆସିଥିଲେ ।
କିଛି ବର୍ଷ ପରେ ସେ ପୁରୁଣା ସହଯୋଗୀ ବିଜେପି ସହିତ ଅଲଗା ହୋଇ ନିଜର ପ୍ରତିଦ୍ୱନ୍ଦ୍ୱୀ ସହିତ ଏକ ମେଣ୍ଟ ଗଠନ କରିଥିଲେ। କେବଳ ଏତିକି ନୁହେଁ, ୨୦୧୪ ଲୋକସଭା ନିର୍ବାଚନ ପୂର୍ବରୁ ନରେନ୍ଦ୍ର ମୋଦୀଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ନୀତିଶଙ୍କ ବିରୋଧକୁ ସ୍ମରଣ କରି ଚିରାଗ ଏହା ମଧ୍ୟ ମନେ ପକାଇଛନ୍ତି ଯେ ଜାତୀୟ ସ୍ତରରେ ନିଜକୁ ପ୍ରଧାନମନ୍ତ୍ରୀଙ୍କ ପାଇଁ ଏକ ସମ୍ଭାବ୍ୟ ଚ୍ୟାଲେଞ୍ଜର୍ ଭାବରେ ପ୍ରୋଜେକ୍ଟ କରିବେ ।
ପାଞ୍ଚ ବର୍ଷ ପୂର୍ବେ ଅନୁଷ୍ଠିତ ବିଧାନସଭା ନିର୍ବାଚନରେ ନୀତିଶ ମୋଦିଙ୍କ ବିରୋଧରେ କେତେ କଣ ବିରୋଧି ନାରା ଦେଇଥିଲେ । ସୂଚନାଯୋଗ୍ୟ ଯେ ଚିରାଗ ପାଶୱାନଙ୍କ ସ୍ୱର୍ଗତ ପିତା ତଥା ଏଲଜେପିର ପ୍ରତିଷ୍ଠାତା ରାମ ଭିଲାସ ପାସୱାନ ୨୦୧୪ ଲୋକସଭା ନିର୍ବାଚନ ପୂର୍ବରୁ ଏନଡିଏରେ ଯୋଗ ଦେଇଥିଲେ ।
