ନକଲି ସୁନା ଇଟା ଦେଇ ୫ ଲକ୍ଷ ହଡ଼ପ: ୨ ଗିରଫ, ୧ ଲକ୍ଷ ୪୫ ହଜାଟ ଟଙ୍କା ଜବତ
ଆଠଗଡ଼: ନକଲି ସୁନା ଇଟା ଦେଇ ୫ଲକ୍ଷ ଟଙ୍କା ହଡପ ଅଭିଯୋଗରେ ୨ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ଚୌଦ୍ୱାର ପୋଲିସ । ଗିରଫ ଅଭିଯୁକ୍ତ ହେଉଛନ୍ତି ବିଜୟ ବେହେରା ଓ ସଂଗ୍ରାମ ମହନ୍ତ । ସେମାନଙ୍କ ନିକଟରୁ ୧ଲକ୍ଷ ୪୫ ହଜାର ଟଙ୍କା ଓ ୯୦୦ଗ୍ରାମ ଓଜନର ଏକ ନକଲି ସୁନା ଇଟା ଜବତ କରାଯାଇଛି । ଚୌଦ୍ୱାର ନବଗ୍ରହ ସାହିର ସୁନା କାରିଗର ସୁଜିତ କୁମାର ମହାରଣା ଏନେଇ ଗତ ୨୭ ତାରିଖରେ ଥାନାରେ ଅଭିଯୋଗ କରିଥିଲେ ।
ଚୌଦ୍ୱାର ତଳ ବଜାରର ବିଜୟ ବେହେରା ତାଙ୍କୁ ସଂଗ୍ରାମ ମହନ୍ତ ନାମକ ଜଣେ ବ୍ୟକ୍ତି ଶସ୍ତାରେ ସୁନା ଇଟା ବିକ୍ରି କରୁଥିବା କହିଥିଲେ । ସୁଜିତଙ୍କୁ ସୁନା ଇଟା ଦେଇ ପରୀକ୍ଷା କରିବାକୁ କହିଥିଲେ । ପରୀକ୍ଷାରୁ ଏହା ଅସଲି ବୋଲି ଜଣାପଡିଥିଲା । ଏହାପରେ ଗତ ୨୬ ତାରିଖରେ ସଂଗ୍ରାମଙ୍କ ମାର୍ଫତରେ ୫ଲକ୍ଷ ଟଙ୍କା ଦେଇ ୯ଶହ ଗ୍ରାମ ଓଜନର ସୁନା ଇଟା କିଣିଥିଲେ । ତେବେ ଏହାକୁ ପରୀକ୍ଷା କରିବାରୁ ଏହା ପିତଳ ବୋଲି ଜଣାପଡିଥିଲା । ଏହାପରେ ସୁଜିତ୍ ଥାନାରେ ଅଭିଯୋଗ କରିଥିଲେ । ପୋଲିସ ତଦନ୍ତ କରି ବିଜୟ ଓ ସଂଗ୍ରାମଙ୍କୁ ଗିରଫ କରିଥିବା ବେଳେ ଏଥିରେ ସମ୍ପୃକ୍ତ ଅନ୍ୟମାନଙ୍କୁ ଶୀଘ୍ର ଗିରଫ କରାଯିବ ବୋଲି କହିଛି ।
