ଏଥର ଶୀତ ଋତୁରେ ଉଡ଼ିବ କମ୍ ବିମାନ, ଜାଣନ୍ତୁ କେତେ ବିମାନକୁ ମିଳିଛି ମଞ୍ଜୁରୀ

ନୂଆଦିଲ୍ଲୀ: ଚଳିତ ବର୍ଷ ଶୀତ ଋତୁରେ ଦେଶରେ ୧୨ ହଜାର ୯୮୩ ଘରୋଇ ବିମାନ ଉଡିବ । ମାର୍ଚ୍ଚ ମାସ ୨୭ ତାରିଖ ପର୍ଯ୍ୟନ୍ତ ବିମାନ ଉଡ଼ାଣ ନେଇ ତାଲିକା ପ୍ରକାଶ କରିଛି ଡିଜିସିଏ ।  ପୂର୍ବବର୍ଷ ଅପେକ୍ଷା ଚଳିତ ବର୍ଷ କମ ବିମାନ ଉଡ଼ିବ । ତାଲିକାରେ ସ୍ପଷ୍ଟ କରାଯାଇଛି ଯେ, ଏଥର ମାତ୍ର ୪୪ ପ୍ରତିଶତ ବିମାନ ଉଡ଼ାଣ ପାଇଁ ଅନୁମତି ମିଳିଛି  । କରୋନା ସଂକ୍ରମଣ ଯୋଗୁଁ ଦେଶରେ ବହୁ ବିମାନ ଉଡ଼ାଣ ବନ୍ଦ ଥିବା ବେଳେ ସର୍ତ୍ତ କୋହଳ କରି ଉଡ଼ାଣ ପାଇଁ ଅନୁମତି ଦିଆଯାଇଛି  ।

ତେବେ ଦେଶର ୯୫ଟି ବିମାନ ବନ୍ଦରରୁ ଉଡ଼ାଣ ହେବ । ଲୋକଙ୍କ ବିମାନ ଯାତ୍ରା ବଢ଼ିଲେ ଆଗାମୀ ଦିନରେ ବିମାନ ସଂଖ୍ୟା ବଢ଼ା ଯାଇପାରେ ବୋଲି ଅନୁମାନ କରାଯାଉଛି  । ଗତବର୍ଷ ଶୀତଋତୁରେ ଦେଶରେ ୨୩ ହଜାର ୩୦୭ ବିମାନ ଉଡ଼ାଣ କରିଥିଲା । ଚଳିତ ବର୍ଷ ଶୀତ ଦିନରେ, ଇଣ୍ଡିଗୋର ୬,୦୦୬ ସାପ୍ତାହିକ ଘରୋଇ ବିମାନ ଉଡ଼ାଣ ପାଇଁ ଅନୁମତି ଦିଆଯାଇଛି । ଇଣ୍ଡିଗୋ ଭାରତର ସବୁଠୁ ବଡ଼ ବିମାନ ସେବା ଯୋଗାଉଥିବା କମ୍ପାନୀ । ସେହିପରି ସ୍ପାଇସଷେଟ୍ କୁ ୧୯୫୭ ଏବଂ ଗୋ ଏୟାରକୁ ୧୨୦୩ ସାପ୍ତାହିକ ଘରୋଇ ବିମାନ ଉଡ଼ାଣ ପାଇଁ ମଞ୍ଜୁରୀ ଦିଆଯାଇଛି ।

ଭାରତରେ କରୋନା ମହାମାରୀ ଯୋଗୁଁ ଦୁଇ ମାସର ବ୍ୟବଧାନ ପରେ ମେ ମାସ ୨୫ ତାରିଖରେ ଘରୋଇ ବିମାନ ଚଳାଚଳ ଆରମ୍ଭ ହୋଇଥିଲା । ଏହି ନୂତନ ବ୍ୟବସ୍ତାରେ ସବୁଠାରୁ ଅଧିକ ହ୍ରାସ ସ୍ପାଇସଜେଟର ସାପ୍ତାହିକ ବିମାନରେ ହୋଇଛି । ଯାହା ଗତ ବର୍ଷରୁ ତୁଳନାରେ ୫୫ ପ୍ରତିଶତ କମ ରହିଛି । ଏହା ପରେ ଏୟାର ଇଣ୍ଡିଆର ୫୦ ପ୍ରତିଶତ ବିମାନ କମ ଉଡୁଛି । ଏୟାର ଏଣ୍ଡିଆ ପରେ ଏହି ତାଲିକାରେ  ଇଣ୍ଡିଗୋ ଓ ଗୋ ଏୟାର ରହିଛି ।