ଉତ୍ତରପ୍ରଦେଶର ଏହି ମନ୍ଦିରରେ ପୂଜା ପାଆନ୍ତି ଉଭୟ ରାମ ଓ ରାବଣ, ଜାଣନ୍ତୁ କ’ଣ ରହିଛି ଏହି ବିରଳ କାହାଣୀ
ନୋଏଡ଼ା: ଶିବପୁରାଣରେ ଗୌତମ ବୁଦ୍ଧ ନଗରର ବିସରଖ ଗାଁ ବିଷୟରେ ବର୍ଣ୍ଣନା ହୋଇଛି । କୁହାଯାଏ, ବିସରଖ ଗାଁରେ ଋଷି ବିଶ୍ରବାଙ୍କର ଏକ ପୂତ୍ର ସନ୍ତାନ ଜନ୍ମ ହୋଇଥିଲା, ଯାହାର ନାମ ଥିଲା ରାବଣ । ବିଶ୍ରବା ଋଷି ଗାଁରେ ଏକ ଅଷ୍ଟଭୂଜୀ ଶିବଲିଙ୍ଗ ସ୍ଥାପନ କଲେ । ଏହା ଆଜି ମଧ୍ୟ ପୂରା ବୈଭବ ସହିତ ସେଠାରେ ବିଦ୍ୟମାନ । ଗାଁରେ ରାମ ଏବଂ ରାବଣଙ୍କୁ ପୂଜା ତ କରାଯାଏ, କିନ୍ତୁ ରାମଲୀଳାର ଆୟୋଜନ କରାଯାଏ ନାହିଁ । ପ୍ରତିବର୍ଷ ଭଳି ଏହିଥର ଦଶହରାରେ ରାମ ଏବଂ ରାବଣଙ୍କୁ ପୂଜା କରାଯିବ ।
ଶ୍ରୀ ମୋହନ ଯୋଗ ଆଶ୍ରମ ଟ୍ରଷ୍ଟ ବିସରଖ ଧାମର ଟ୍ରଷ୍ଟି ଆଚାର୍ଯ୍ୟ ଅଶୋକାନନ୍ଦ ମହାରାଜ କହିଛନ୍ତିଯେ, ପ୍ରତିବର୍ଷ ଭଳି ଏ ବର୍ଷ ମଧ୍ୟ ରାମ ଓ ରାବଣଙ୍କ ଖାସ ପୂଜା କରାଯିବ । ପୂଜା ସମୟରେ ସାମାଜିକ ଦୂରତା ବଜାୟ ରଖିବା ସହିତ ଅନ୍ୟ ସମସ୍ତ ନିୟମ ପାଳନ କରାଯିବ । ଦଶହରା ଦିନ ପୂଜାର୍ଚ୍ଚନା କରିବା ପାଇଁ ବିଭିନ୍ନ ସ୍ଥାନରୁ ଶ୍ରଦ୍ଧାଳୁ ଆସନ୍ତି । ତେବେ ଏହା ପ୍ରଥମ ମନ୍ଦିର ଯେଉଁଠି ରାମ ଓ ରାବଣ ପୂରା ବୈଭବ ସହିତ ବିଦ୍ୟମାନ ହୋଇଥିବା କହିଛନ୍ତି ଟ୍ରଷ୍ଟିର ଆଚାର୍ଯ୍ୟ ।
ଏଠାରେ ନା ରାମଲୀଳା ହୁଏ ନା ରାବଣ ପୋଡ଼ି । ଅବଶ୍ୟ ବହୁ ବର୍ଷ ପୂର୍ବେ ଗାଁରେ ରାମଲୀଳାର ଆୟୋଜନ କରାଯାଉଥିଲା । ସେହି ସମୟରେ ଗାଁରେ ଜଣଙ୍କର ମୃତ୍ୟୁ ହୋଇଗଲା । ଯେଉଁଥିପାଇଁ ରାମଲୀଳା ଅଧା ରହିଗଲା । ଦ୍ୱିତୀୟ ଥର ପାଇଁ ଗାଁ ଲୋକ ରାମଲୀଳାର ଆୟୋଜନ କରିଥିଲେ, କିନ୍ତୁ ପୂର୍ବଥର ଭଳି ସେହିଥର ମଧ୍ୟ କୌଣସି କାରଣରୁ ତାହା ସଂପୂର୍ଣ୍ଣ ହୋଇପାରିଲା ନାହିଁ । ବାରମ୍ବାର ବିଘ୍ନ ଘଟୁଥିବାରୁ ସେହି ଦିନଠାରୁ ରାମଲୀଳା ବନ୍ଦ ହୋଇଗଲା ।
ବିସରଖ ଗାଁରେ ଏକ ଶିବମନ୍ଦିର ରହିଛି । କୁହାଯାଏ, ସେଠାରେ ଥିବା ଅଷ୍ଟଭୂଜୀ ଶିବଲିଙ୍ଗକୁ ରାବଣଙ୍କ ବାପା ସ୍ଥାପନ କରିଥିଲେ । ତାହାର ଗଭୀରତା କେତେ ଆଜି ପର୍ଯ୍ୟନ୍ତ ଜଣାପଡ଼ି ନାହିଁ । ଅଶୋକ ମହାରାଜଙ୍କ କହିବା ଅନୁସାରେ ରାବଣ ମଧ୍ୟ ଏହି ଅଷ୍ଟଭୂଜୀ ଶିବଲିଙ୍ଗକୁ ପୂଜା କରୁଥିଲା । ରାବଣର ପୂଜାରେ ଖୁସି ହୋଇ ପ୍ରଭୁ ଶିବ ତାକୁ ବୁଦ୍ଧିମାନ ଏବଂ ପରାକ୍ରମୀର ହେବାର ଦେଇଥିଲେ । ତେବେ ଖୋଳିଲେ ଆଜି ମଧ୍ୟ ସେଠାରେ ଶିବଲିଙ୍ଗ ବାହାରେ ବୋଲି ଏଠାରେ ପୂଜା କରିବାକୁ ପ୍ରତିଦିନ ଶ୍ରଦ୍ଧାଳୁଙ୍କ ଭିଡ଼ ଜମେ ।
