ସମସ୍ତଙ୍କୁ ଚକିତ କରୁଛି ୪ ବର୍ଷର ବାଳକର ସନ୍ତରଣ, ଦେଖିଲେ ଆପଣ ବି ହୋଇଯିବେ ଆଶ୍ଚର୍ଯ୍ୟ

ଝାରସୁଗୁଡ଼ା: ଚକିତ କରୁଛି ୪ ବର୍ଷର ଛୁଆ । ଯେଉଁଠି ପାଣିକୁ ଦେଖିଲେ ୪୦ ବର୍ଷିଅଙ୍କୁ ବି ଡର ଲାଗେ । ସେଠି ୪ ବର୍ଷର ଛୁଆ ପାଣିକୁ ଦେଖିଲେ ବେଶ୍ ଖୁସି ହୋଇଯାଉଛି । ଆପଣ ଭାବୁଥିବେ ଛୁଆଟି ପାଣିରେ ଖେଳିବା ପାଇଁ ଖୁସି ହେଉଥିବ । ଜମା ନୁହେଁ ବରଂ ସନ୍ତରଣ ପ୍ରତି ଛୁଆଟିର ରହିଛି ଅଦ୍ୟମ ଆଗ୍ରହ । ସନ୍ତରଣରେ ସମସ୍ତଙ୍କୁ ଚକିତ କରୁଛି ଝାରସୁଗୁଡ଼ା ଜିଲ୍ଲା ଲଖନପୁରର କୁନି ପୁଅ ଦୁର୍ଗା ପ୍ରସାଦ ।

ଦୁର୍ଗାକୁ ମାତ୍ର ୪ ବର୍ଷ । ହେଲେ ତା ପ୍ରତିଭା ଦେଖି ସମସ୍ତେ ବିସ୍ମିତ । ଦୁର୍ଗାର ସନ୍ତରଣ ଆଗରେ ହାର୍ ମାନୁଛନ୍ତି ସମସ୍ତେ । ଯୁବକ ତ ଯୁବକ ବୟସ୍କ ବି ଦୁର୍ଗାର ସନ୍ତରଣକୁ କରୁଛନ୍ତି ସଲାମ୍ । ଲଖନପୁର ବ୍ଲକ ଅନ୍ତର୍ଗତ ଭଅଁରାଚକା ଗାଁର ସସ୍ମିତା ଧୂରୁଆଙ୍କ କୁନି ପୁଅ ଦୁର୍ଗା । ଗାଁ ପୋଖରୀର ଏ ମୁଣ୍ଡରୁ ସେ ମୁଣ୍ଡ ୧୦୦ ମିଟର ଦୂରତାକୁ ଅତି ସହଜରେ ପହଁରି ପହଁରି ଅତିକ୍ରମ କରି ପାରୁଛି ଏହି ବାଳକ । ଦୁର୍ଗାର ଏହି ଜଳକ୍ରୀଡ଼ି ଦେଖିବାକୁ ଗାଁ ପୋଖରୀରେ ବି ଲାଗୁଛି ଭିଡ଼ ।

୪ ବର୍ଷରୁ ସନ୍ତରଣରେ ଦକ୍ଷତା ଦେଖାଇଥିବା ଦୁର୍ଗା ସନ୍ତରଣର ପ୍ରଶିକ୍ଷଣ ନେଇନି କି ତାକୁ କେହି ପହଁରିବା ଶିଖାଇ ନାହାଁନ୍ତି । ଗାଁରେ ପୋଖରୀରେ ଗାଧୋଇବା ବେଳେ ନିଜେ ସେ ସନ୍ତରଣ ଶିଖିଥିବା କହିଛନ୍ତି ପରିବାର ଲୋକ । ପିଲାଟି ବେଳରୁ ଦୁର୍ଗାର ସନ୍ତରଣ ପ୍ରତି ରହିଛି ଅହେତୁକ ଆଗ୍ରହ । ପୁଅକୁ ସନ୍ତରଣରେ ଉଚ୍ଚକୋଟିର ପ୍ରଶିକ୍ଷଣ ଦେବାକୁ ଇଚ୍ଛା ଥିଲେ ମଧ୍ୟ ଅର୍ଥର ଅଭାବ ଥିବା ମାଆ ସୁସ୍ମିତା ଧୂରୁଆ କହିଛନ୍ତି । ଦୁର୍ଗାକୁ ସରକାରୀ ପ୍ରଶିକ୍ଷଣ ମିଳିଲେ ଆଗକୁ ଦେଶ ପାଇଁ ଦୁର୍ଗା ଗୌରବ ଆଣିବ ବୋଲି ଆଶା ରଖିଛି ପରିବାର ।