ପୁଣି କମିପାରେ ରେପୋ ରେଟ୍; ୭-୮-୯ରେ RBI ମୁଦ୍ରା ନୀତି ସମୀକ୍ଷା ବୈଠକ
1 min read
ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ ମୁଦ୍ରା ନୀତି ସମୀକ୍ଷା ବୈଠକ ଆଗାମୀ ୭,୮ ଏବଂ ୯ ଅକ୍ଟୋବରରେ ହେବ । ମଙ୍ଗଳବାର ଆରବିଆଇ ପକ୍ଷରୁ ଏନେଇ ଏକ ବିଜ୍ଞପ୍ତି ପ୍ରକାଶ ପାଇଛି । ଦ୍ୱି-ମାସିକ ମୁଦ୍ରା ନୀତି ବୈଠକ ୭ ଅକ୍ଟୋବରଠାରୁ ଆରମ୍ଭ ହେବ । ବୈଠକର ଶେଷ ଦିନରେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ସାମ୍ବାଦିକ ସମ୍ମିଳନୀ ଡକାଇ ବୈଠକରେ ନିଆଯାଇଥିବା ନିଷ୍ପତ୍ତି ବିଷୟରେ ସୂଚନା ଦେବେ । ଏହା ପୂର୍ବରୁ ଆରବିଆଇ ମନିଟାରି ପଲିସି କମିଟିର ୩ ସଦସ୍ୟଙ୍କ ନିଯୁକ୍ତି ଦିଆଯାଇଛି । ସରକାର ସୋମବାର ଦିନ ୩ଜଣ ପ୍ରତିଷ୍ଠିତ ଅର୍ଥନୀତିଜ୍ଞଙ୍କୁ ଆରବିଆଇ ମନିଟରି ପଲିସି କମିଟିର ରେଟ୍ ସେଟିଂ ମନିଟରି ପଲିସି କମିଟିର ସଦସ୍ୟ ଭାବେ ନିଯୁକ୍ତି କରିଛନ୍ତି । ଏଥିରେ PMEASର ସଦସ୍ୟ ଅସୀମା ଗୋଏଲ, ନେସନାଲ କାଉଁସିଲ ଫର ଆପ୍ଲାଏଡ୍ ଇକୋନୋମିକ୍ ରିସର୍ଚ୍ଚର ସିନିୟର ଆଡଭାଇଜର ସଶାଙ୍କ ଭିଡ଼େ ଏବଂ IIM ଅହମ୍ମଦାବାଦର ପ୍ରଫେସର ଜୟନ୍ତ ଆର ବର୍ମା ନୂଆ ସଦସ୍ୟ ହୋଇଛନ୍ତି । ସୂଚନା ଅନୁସାରେ ପ୍ରଧାନମନ୍ତ୍ରୀଙ୍କ ଅଧକ୍ଷତାରେ ଗଠିତ ସମିତି ଏହି ସଦସ୍ୟମାନଙ୍କୁ ମଞ୍ଜୁରି ଦେଇଛି।
ଆରବିଆଇ ଅଧିନିୟମ ଅନୁସାରେ, ୩ ଜଣ ନୂଆ ସଦସ୍ୟଙ୍କ ନିଯୁକ୍ତି ୪ବର୍ଷ ପାଇଁ ହେବ । ତେବେ ଗତ ସେପ୍ଟେମ୍ବର ୨୯, ୩୦ ଏବଂ ଅକ୍ଟୋବର ୧ରେ ହେବାକୁ ଥିଲା ମୁଦ୍ରା ନୀତି ବୈଠକ । କିନ୍ତୁ ଆରବିଆଇ ଏମପିସିର ପୂର୍ବ ବୈଠକ ଗୁଡ଼ିକୁ ସ୍ଥଗିତ ରଖିଥିଲା । କାରଣ ସ୍ୱତନ୍ତ୍ର ସଦସ୍ୟଙ୍କ ନିଯୁକ୍ତିରେ ବିଳମ୍ବ ହୋଇଥିଲା । ସେତେବେଳେ ଆରବିଆଇ ପକ୍ଷରୁ କୁହାଯାଇଥିଲା ଯେ, ଏମପିସିର ବୈଠକ ତାରିଖକୁ ଘୁଞ୍ଚାଯାଇଛି ।
ଯେଉଁମାନଙ୍କ ବଦଳରେ ନୂଆ ସଦସ୍ୟମାନେ ଆସିଛନ୍ତି ସେମାନେ ହେଲେ ଚେତନ ଘାଟେ, ପାମି ଦୁଆ ଏବଂ ରବିନ୍ଦ୍ର ଢୋଲକିଆ । ଚେତନ ଘାଟ ହେଉଛନ୍ତି ଭାରତୀୟ ପରିସଂଖ୍ୟାନ ପ୍ରତିଷ୍ଠାନର ଜଣେ ପ୍ରଫେସର । ସେହିଭଳି ପାମି ଦୁଆ ଦିଲ୍ଲୀ ସ୍କୁଲ ଅଫ୍ ଇକୋନୋମିକ୍ସର ନିର୍ଦ୍ଦେଶକ ହୋଇଥିବା ବେଳେ ରବୀନ୍ଦ୍ର ଢୋଲକିଆ ଅହମ୍ମଦାବାଦ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ମ୍ୟାନେଜମେଣ୍ଟର ପ୍ରଫେସର ଅଛନ୍ତି ।
୨୦୧୬ରେ, ସରକାର ଆରବିଆଇ ଗଭର୍ଣ୍ଣର ଠାରୁ ଆରମ୍ଭ କରି ୬ ସଦସ୍ୟ ବିଶିଷ୍ଟ MPC ପର୍ଯ୍ୟନ୍ତ ସୁଧ ହାର ସେଟିଂର ଭୂମିକା ସ୍ଥିର କରିଥିଲେ । ଆରବିଆଇ ଗଭର୍ଣ୍ଣରଙ୍କ ନେତୃତ୍ୱରେ ପ୍ୟାନେଲର ଅଧା ଅଂଶ ବାହ୍ୟ ସ୍ୱତନ୍ତ୍ର ସଦସ୍ୟଙ୍କୁ ନେଇ ଗଠିତ । ଆରବିଆଇ ଅଧିନିୟମ ଅନୁଯାୟୀ, ବାହ୍ୟ ସଦସ୍ୟମାନେ ୪ ବର୍ଷର ଅବଧି ପାଇଁ କାର୍ଯ୍ୟ କରିପାରିବେ ଏବଂ ପୁନ ନିଯୁକ୍ତି ପାଇଁ ଯୋଗ୍ୟ ହୋଇପାରିବେ ନାହିଁ । ଏମପିସିର ଅନ୍ୟାନ୍ୟ ପଦବୀରେ ଥିବା ସଦସ୍ୟମାନେ ହେଉଛନ୍ତି ରିଜର୍ଭ ବ୍ୟାଙ୍କ ଗଭର୍ଣ୍ଣର, ଡେପୁଟି ଗଭର୍ଣ୍ଣର ଏବଂ ଆରବିଆଇର ଜଣେ କେନ୍ଦ୍ରୀୟ ଅଧିକାରୀ ।
କରୋନା ମହାମାରୀ ଏବଂ ଲକଡାଉନ୍ କାରଣରୁ ଅର୍ଥ ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି । ଏହାକୁ ସୁଧାରିବା ଏକ ବଡ଼ ଚ୍ୟାଲେଞ୍ଜ ନିଶ୍ଚିତ । ତେବେ ଅର୍ଥ ବ୍ୟବସ୍ଥାକୁ ସୁଧାରିବା ପାଇଁ କିଛି ଅଣପାରମ୍ପିକ ପଦକ୍ଷେପ ନିଆଯାଇପାରେ ବୋଲି ଆଶା କରାଯାଉଛି । ଯଦି ସଂଖ୍ୟା ଉପରେ ନଜର ପକାଇବା ତେବେ ଗତ ଫେବ୍ରୁଆରୀରୁ ଆଜି ସୁଦ୍ଧା ଆର୍ବିଆଇ ପକ୍ଷରୁ ରେପୋ ରେଟ୍ରେ ୧.୧୫ ପ୍ରତିଶତ ହ୍ରାସ କରାଯାଇ ସାରିଛି । ତେବେ ଆଗାମୀ ଅକ୍ଟୋବର ୯ ରେ ଆରବିଆଇ ପକ୍ଷରୁ ରେପୋ ରେଟ୍ରେ ପୁଣି ୦.୨୫ ପ୍ରତିଶତ ହ୍ରାସ କରାଯାଇପାରେ ।
