ଏକଦା ବିଜେପିର ପ୍ରଭାବଶାଳୀ ନେତା ଯଶବନ୍ତ ସିଂହଙ୍କୁ ବିଦା କରିଥିଲା ଦଳ, ଜାଣନ୍ତୁ କାହିଁକି
ନୂଆଦିଲ୍ଲୀ: ପୂର୍ବତନ କେନ୍ଦ୍ରମନ୍ତ୍ରୀ ଯଶବନ୍ତ ସିଂହ ଆଉନାହାନ୍ତି । ୧୯୬୦ ମସିହାରେ ସେନାର ମେଜର ପଦବୀରୁ ଇସ୍ତଫା ଦେଇ ରାଜନୀତିରେ ପାଦ ଥାପିଥିଲେ ଯଶବନ୍ତ । ଅଟଳ ବିହାରୀ ବାଜପେୟୀଙ୍କ ନେତୃତ୍ୱାଧିନ ଏନ୍ଡିଏ ସରକାରରେ ସେ ବହୁ ଗୁରୁତ୍ୱପୂଣ୍ଣ ଦାୟିତ୍ୱରେ ଅବସ୍ଥାପିତ ଥିଲେ । ୧୯୯୮ରୁ ୨୦୦୪ ଯାଏଁ ଅର୍ଥମନ୍ତ୍ରୀ, ପ୍ରତିରକ୍ଷା ଓ ବିଦେଶ ମନ୍ତ୍ରାଳୟର ନେତୃତ୍ୱ ନେଇଥିଲେ ଯଶବନ୍ତ ।
ଯଶୋବନ୍ତ ସିଂହ ନିଜ ରାଜନୈତିକ କ୍ୟାରିୟରରେ ବହୁ ଉତ୍ଥାନ୍ ଓ ପତନ ଦେଇ ଗତିକରିଛନ୍ତି । ବହୁ ବିବାଦର ମଧ୍ୟ ସାମ୍ନା କରିଛନ୍ତି । ୧୯୯୯ ମସିହାରେ ଏୟାର ଇଣ୍ଡିଆ ବିମାନ ଅପହରଣ ଘଟଣାରେ ଯାତ୍ରୀଙ୍କୁ ମୁକ୍ତ କରିବା ଲାଗି ଆତଙ୍କବାଦୀଙ୍କ ସହ କାନ୍ଧାର ଯିବାକୁ ନେଇ ସେ ବହୁ ସମାଲୋଚନାର ଶରବ୍ୟ ହୋଇଥିଲୋ ।
ଯଶୋବନ୍ତ ସିଂହ ସର୍ବଦା ଅଟଳ ବିହାରୀ ବାଜପେୟୀଙ୍କ ବିଶ୍ୱସ୍ତ ଓ ନିକଟତର ରହିଥିଲେ । ସେ ବ୍ରଜେଶ ମିଶ୍ର ଏବଂ ପ୍ରମୋଦ ମହାଜନଙ୍କ ସହିତ ବାଜପେୟୀଙ୍କ ଟିମରେ ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ । ବାଜପେୟୀ ସରକାରରେ ଅତି ଗୁରୁତ୍ୱପୂର୍ଣ୍ଣ ପଦବୀରେ ଥିବା ଏହି ପ୍ରଭାବଶାଳୀ ନେତାଙ୍କୁ ଏକଦା ଦଳରୁ ନିଲମ୍ୱିତ ମଧ୍ୟ ହେବାକୁ ପଡ଼ିଥିଲା । ୨୦୦୯ ମସିହାରେ ନିଜ ପୁସ୍ତକ ‘ଜିନ୍ନା: ଭାରତ ବିଭାଜନ ଏବଂ ସ୍ୱତନ୍ତ୍ରତା’ରେ ପାକିସ୍ତାନ ସହ ମହମ୍ମଦ ଅଲ୍ଲୀ ଜିନ୍ନାଙ୍କୁ ପ୍ରଶଂସା କରିଥିଲେ । ଯାହାକୁ ନେଇ ତୀବ୍ର ଅସନ୍ତୋଷ ଦେଖାଦେଇଥିଲା । ଏଥିଲାଗି ତାଙ୍କୁ ଦଳ ବିଦା ହେବାକୁ ପଡ଼ିଥିଲା । ସେ ତାଙ୍କ ପୁସ୍ତକରେ ସର୍ଦ୍ଦାର ପଟେଲ ଏବଂ ପଣ୍ଡିତ ନେହେରୁଙ୍କୁ ଦେଶ ବିଭାଜନ ନେଇ ଦାୟୀ କରିଥିଲେ । ବିଶେଷ କରି ଏହା ରାଷ୍ଟ୍ରୀୟ ସ୍ୱଂୟ ସେବକ ସଂଘ ( ଆରଏସ୍ଏସ)କୁ ପସନ୍ଦ ନଥିଲା ।
