ଦେଶର ପ୍ରଥମ କରୋନା ପରୀକ୍ଷଣ କିଟକୁ ICMRର ଅନୁମତି, ୨୦ ମିନିଟରେ ମିଳିବ ରେଜଲ୍ଟ
1 min read
ନୂଆଦିଲ୍ଲୀ: ଦେଶରେ ବଢ଼ୁଥିବା କରୋନା ସଂକ୍ରମଣ ଭିତରେ ଆସିଛି ଆଶ୍ୱସ୍ତକର ଖବର । ଦିଲ୍ଲୀର ଏକ ଫାର୍ମାସିଟ୍ୟୁକାଲ କମ୍ପାନୀ ଭାରତର ପ୍ରଥମ ରାପିଡ୍ ଟେଷ୍ଟ କିଟ୍ ପ୍ରସ୍ତୁତ କରିଛି । କୁହାଯାଉଛି ଏହି କିଟ୍ ଜରିଆରେ ପ୍ରାୟ ୨୦ ମିନିଟ୍ ମଧ୍ୟରେ ରେଜଲ୍ଟ ମିଳିବ । ଅର୍ଥାତ୍ ମାତ୍ର ୨୦ ମିନିଟରେ ଜାଣି ହେବ ଆପଣ କରୋନା ପଜିଟିଭ୍ ନା ନେଗେଟିଭ୍ । ଆଇସିଏମ୍ଆର ଏହି କରୋନା ପରୀକ୍ଷଣ କିଟକୁ ଅନୁମତି ପ୍ରଦାନ କରିଛି । କିଟର ମୂଲ୍ୟ ପାଖାପାଖି ୨୦୦ ଟଙ୍କା ଥିବା କୁହାଯାଉଛି ।
ଭାରତର ପ୍ରଥମ ପଏଣ୍ଟ-ଅଫ୍-କେୟାର (POC) ରାପିଡ୍ ଟେଷ୍ଟ କିଟକୁ ମେଡିକେୟାର ପ୍ରସ୍ତୁତ କରିଛି । ଏହି କମ୍ପାନୀ ଲାବରେ ଗର୍ଭାବସ୍ଥା ଯାଞ୍ଚ କିଟ୍, HIV ଏଡ୍ସ, ମାଲେରିଆ ଓ ଡେଙ୍ଗୁ ପାଇଁ POC ଡାଏଗ୍ନୋଷ୍ଟିକ କିଟ୍ ମଧ୍ୟ ତିଆରି କରିଥାଏ । ମେଡିକେୟାର ମୁଖ୍ୟ କାର୍ଯ୍ୟକାରୀ ଅଧିକାରୀ ଆନନ୍ଦ ଶେଖରୀ କହିଛନ୍ତି- POC କିଟ୍ ଜରିଆରେ ୨୦ ମିନିଟ୍ ମଧ୍ୟରେ ଫଳାଫଳ ଜାଣି ହେବ ।
ଏହି କିଟରେ ଟେଷ୍ଟ ପାଇଁ ଆଙ୍ଗୁଠିରୁ ରକ୍ତ ନମୁନା ନିଆଯିବ. ସେପ୍ଟେମ୍ବର ସୁଦ୍ଧା କମ୍ପାନୀ ୨ ଲକ୍ଷ କିଟ୍ ଲଞ୍ଚ କରିବା ପାଇଁ ଯୋଜନା କରିଛି । ଭାରତରେ ଏବେ ଆଣ୍ଟିବଡି ଯାଞ୍ଚ ପାଇଁ ଷ୍ଟାଣ୍ଡାର୍ଡ Q COVID-19 Agର ବ୍ୟବହାର କରାଯାଉଛି । ସାଧାରଣତଃ ଏହାକୁ RT-PCR ଟେଷ୍ଟ ଭାବେ ଜଣାଯାଇଥାଏ ।
ଏହାର ପରୀକ୍ଷଣ ରେଜଲ୍ଟ ଗୋଟିଏ ଦିନ ଭିତରେ ଆସିଥାଏ । ଏହି କିଟ୍ ଶରୀର ମଧ୍ୟରେ ଥିବା ଆଣ୍ଟିବଡି ସନ୍ଧାନ କରେ । ସଂକ୍ରମିତ ହୋଇଥିବା ବ୍ୟକ୍ତିଙ୍କ ଶରୀରରେ ଆଣ୍ଟିବଡି ସୃଷ୍ଟି ହୋଇଥାଏ । ଯଦି ଶରୀରରେ ଆଣ୍ଟିବଡ଼ି ମିଳେ ତେବେ ସେହି ବ୍ୟକ୍ତି ଏବେ କରୋନାରେ ସଂକ୍ରମିତ ଅଥବା ପୂର୍ବରୁ ସଂକ୍ରମିତ ହୋଇ ସାରିଛନ୍ତି ବୋଲି ଧରାଯାଏ ।
