୩୩୦୦ ଛାତ୍ରଛାତ୍ରୀ କରୋନା ସଂକ୍ରମିତ, କ୍ୱାରେଣ୍ଟାଇନରେ ୪ ହଜାର ୬ ଶହ
ୱାଶିଂଟନ୍: ସଂକ୍ରମଣ ଭିତରେ ଶିକ୍ଷାଦାନ ମହଙ୍ଗା ସାବ୍ୟସ୍ତ ହୋଇଛି । କରୋନା ଭାଇରସ୍ ସଂକ୍ରମଣର ଶିକାର ହୋଇଛନ୍ତି ସଂଖ୍ୟାଧିକ ଛାତ୍ରଛାତ୍ରୀ ଓ ଶିକ୍ଷକ । ମହାମାରୀ କରୋନା ସଂକ୍ରମଣ ଭିତରେ ଆମେରିକାରେ ସ୍କୁଲ, କଲେଜ ଖୋଲିବାକୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଷ୍ପତ୍ତି ନେଇଥିଲେ । ଶିକ୍ଷାଦାନ ଆରମ୍ଭ ହେବା ପରେ ଆମେରିକାର ୨୪ ରାଜ୍ୟର ସ୍କୁଲ, କଲେଜରୁ ପଜିଟିଭ୍ ମାମଲା ଆସୁଛି । ପ୍ରାୟ ୩ ହଜାର ୩ ଶହ ଜଣ ଛାତ୍ରଛାତ୍ରୀ ଓ କର୍ମଚାରୀ ସଂକ୍ରମିତ ହୋଇଛନ୍ତି । କେବେଳ ମିସିସିପି ରାଜ୍ୟରେ ୪ ହଜାର ଛାତ୍ରଛାତ୍ରୀ ଓ ୬ ଶହ ଶିକ୍ଷକଙ୍କୁ ସଂଗରୋଧରେ ରଖାଯାଇଛି ।
ମିସିସିପିରେ ଅଗଷ୍ଟ ୧୭ରୁ ୨୧ ଅଗଷ୍ଟ ମଧ୍ୟରେ ବିଦ୍ୟାଳୟରେ ୧୪୪ ଶିକ୍ଷକ ଏବଂ ୨୯୨ ଛାତ୍ର ସଂକ୍ରମିତ ହୋଇଥିବା ଜଣାପଡ଼ିଛି । ରାଜ୍ୟ ସ୍ୱାସ୍ଥ୍ୟ ଅଧିକାରୀ ଡାକ୍ତର ଥାମଁସ ଇ ଡଁବ୍ସଙ୍କ କହିବା ଅନୁସାରେ ୩୧ଟି ବିଦ୍ୟାଳୟରେ ସଂକ୍ରମଣର ମାମଲା ସାମ୍ନାକୁ ଆସିଛି । ପରିସ୍ଥିତିକୁ ନଜରରେ ରଖି ଛାତ୍ର, ଶିକ୍ଷକ ଏବଂ ଅନ୍ୟ କର୍ମଚାରୀଙ୍କୁ ସଙ୍ଗରୋଧରେ ରଖାଯାଇଛି ।
ଅଲବାମା ବିଶ୍ୱବିଦ୍ୟାଳୟରେ କ୍ଲାସ ଆରମ୍ଭ ହେବାର ମାତ୍ର ଏକ ସପ୍ତାହ ମଧ୍ୟରେ କରୋନାରେ ୫୬୬ ଜଣ ସଂକ୍ରମିତ ହୋଇଥିବା ଜଣାପଡ଼ିଛି । ମାର୍ଚ୍ଚ ଖରା ଛୁଟି ଶେଷ ହେବା ପରେ ୨୦ ହଜାର ଛାତ୍ରଛାତ୍ରୀ ବିଶ୍ୱବିଦ୍ୟାଳୟକୁ ଆସିବା ଆରମ୍ଭ କରିଥିଲେ । ଅନ୍ୟପକ୍ଷରେ କୋଭିଡ ସଂକ୍ରମିତଙ୍କ ସଂଖ୍ୟା ବଢିବାରୁ ଦକ୍ଷିଣ କୋରିଆର ସିୟୋଲରେ ୧୧ ସେପ୍ଟେମ୍ବର ପର୍ଯ୍ୟନ୍ତ ସ୍କୁଲ ବନ୍ଦ ରଖାଯାଇଛି ।
