କୋଭିଡ-୧୯ ସଠିକ ଖବର ପରିବେଷଣ କରିବାରେ ଓଡିଶା ଆଗୁଆ, ଆମେରିକା ବିଶ୍ୱବିଦ୍ୟାଳୟ ରିପୋର୍ଟ କ‘ଣ କହୁଛି ଜାଣନ୍ତୁ..

ଭୁବନେଶ୍ୱର: କୋଭିଡ-୧୯ ସଠିକ ରିପୋର୍ଟିଂରେ ଶ୍ରେଷ୍ଠ ୩ ଭାରତୀୟ ରାଜ୍ୟ ମଧ୍ୟରେ ଓଡିଶା । ଆମେରିକାର ଷ୍ଟାନଫୋର୍ଡ ୟୁନିଭରସିଟି ଓ ଟେକ୍ ଇଣ୍ଡଷ୍ଟ୍ରି ଏବଂ ସ୍ୱିଜରଲାଣ୍ଡର ଏରୋଜଲ ଇଣ୍ଟଷ୍ଟ୍ରି ପକ୍ଷରୁ କୋଭିଡ ୧୯କୁ ନେଇ ଏକ ସର୍ଭେ କରାଯାଇଥିଲା । ସର୍ଭେରୁ ଏହା ଜଣାପଡିଛି ଯେ, ଶ୍ରେଷ୍ଠ ୩ ଭାରତୀୟ ରାଜ୍ୟ ମଧ୍ୟରେ ଓଡିଶା ମଧ୍ୟ ରହିଛି । ମେଡ୍ରିକ୍ସଭରେ ପ୍ରକାଶିତ ରିପୋର୍ଟ ଅନୁସାରେ, କର୍ଣାଟକ, କେରଳ ଓ ଓଡିଶା କୋଭିଡ ସମ୍ବନ୍ଧୀୟ ଖବର ପରିବେଷଣ କରିବାରେ ଅଗ୍ରଣୀ ରହିଛନ୍ତି । ଠିକ ଖବର ଲୋକଙ୍କ ନିକଟରେ ପହଞ୍ଚାଇବା, ଏହାର ବିଶ୍ଳେଷଣ କରିବା, ସବିଶେଷ ବିବରଣୀ ପ୍ରଦାନ କରିବା ଏବଂ ଖବରର ଗୋପନୀୟତା ରକ୍ଷା ଆଦିକୁ ନେଇ ହୋଇଥିବା ଅନୁଧ୍ୟାନରେ ଏହି ୩ ରାଜ୍ୟ ଅଗ୍ରଣୀ ରହିଛନ୍ତି ।

ତିନିଟି ରାଜ୍ୟ ମଧ୍ୟରେ କର୍ଣ୍ଣାଟକର ସ୍କୋର ୦.୬୧, କେରଳର ୦.୫୨ ଥିବାବେଳେ ଓଡିଶାର ସ୍କୋର ରହିଛି ୦.୫୧ । କୋଭିଡ ରିପୋର୍ଟିଂ ପାଇଁ ନିଜସ୍ୱ ଡାସବୋର୍ଡ ଥିବା ସ୍ୱଳ୍ପ ରାଜ୍ୟଗୁଡିକ ମଧ୍ୟରୁ ଓଡ଼ିଶା ଅନ୍ୟତମ । ଅଧିକରୁ ଅଧିକ କୋଭିଡ-୧୯ ତଥ୍ୟ ଉପସ୍ଥାପନ କରିବାରେ ଓଡ଼ିଶା ଅଗ୍ରଣୀ ରହିଛି । ତଥ୍ୟଗୁଡିକୁ ଠିକ ଏବଂ ସ୍ପଷ୍ଟ ଭାବେ ପ୍ରଦର୍ଶିତ କରିବା ନେଇ ଓଡ଼ିଶା ଉତ୍ତମ ନିଷ୍ପତ୍ତି ଗ୍ରହଣ କରୁଛି ବୋଲି ରିପୋର୍ଟରେ କୁହାଯ଼ାଇଛି । ମହାମାରୀ ଆରମ୍ଭରୁ ଓଡିଶା କୋଭିଡ ନିୟମାବଳୀକୁ ଉଚିତ ରୂପେ ପାଳନ କରିଛି । ଯାହା ରାଜ୍ୟ ସରକାରଙ୍କୁ ଜନସ୍ୱାସ୍ଥ୍ୟ ସମ୍ବନ୍ଧୀୟ ନିଷ୍ପତ୍ତି ନେବାରେ ସହାୟକ ହୋଇ ପାରିଛି । ମହାମାରୀ ସମ୍ବନ୍ଧରେ ଲୋକଙ୍କୁ ସଠିକ ତଥ୍ୟ ପ୍ରଦାନ କରିବା ସହ ସଚେତନତା ସୃଷ୍ଟି କ୍ଷେତ୍ରରେ ଓଡିଶାର କାର୍ଯ୍ୟଧାରାକୁ ରିପୋର୍ଟରେ ପ୍ରଶଂସା କରାଯାଇଛି ।

ନନ୍ଦିଘୋଷ ବ୍ୟୁରୋ