କରୋନାରେ ମୃତକଙ୍କ ଶବ ସତ୍କାର ନେଇ ଗାଇଡଲାଇନ୍: ମୃତଦେହକୁ ଦେଖିପାରିବେ ସମ୍ପର୍କୀୟ
ଭୁବନେଶ୍ୱର: ମହାମାରୀ କରୋନା ସଂକ୍ରମିଣରେ ମୃତ୍ୟୁ ବରଣ କରିଥିବା ବ୍ୟକ୍ତିଙ୍କ ଅନ୍ତିମ ସଂସ୍କାର ନେଇ କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଗାଇଡଲାଇନ୍ ଜାରି କରାଯାଇଛି । ଏ ବିଷୟରେ ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ କୁମାର ଜେନା ଜିଲ୍ଲାପାଳ ଓ ମ୍ୟୁନସିପାଲଟି କମିଶନରମାନଙ୍କୁ ଚିଠି ଅବଗତ କରାଇଛନ୍ତି । କରୋନା ସଂକ୍ରମିତଙ୍କ ମୃତ୍ୟୁ ପରେ ପରିବାରକୁ ହସ୍ତାନ୍ତର ନେଇ ସର୍ତ୍ତମୂଳକ ଅନୁମତି ଦିଆଯିବ । ମୃତଦେହ ନ ଛୁଇଁ ଧର୍ମୀୟ ବ୍ୟବସ୍ଥାରେ ସତ୍କାର ପାଇଁ ଅନୁମତି ମିଳିବ ବୋଲି ଏସ୍ଆରସି ଶ୍ରୀ ଜେନା ଚିଠିରେ ଉଲ୍ଲେଖ କରିଛନ୍ତି ।
ମୃତଦେହକୁ ଲିକ୍ ପ୍ରୁଫ୍ ପ୍ଲାଷ୍ଟିକ ବ୍ୟାଗରେ ରଖି ପରିବହନ କରିବାକୁ ନିର୍ଦ୍ଦେଶ । ବ୍ୟାଗର ବାହାର ଭାଗକୁ ୧ ପ୍ରତିଶତ ହାଇପୋକ୍ଲୋରାଇଡ୍ରେ ଡିକଣ୍ଟାମିନେଟ୍ କରାଯିବ । ଆବଶ୍ୟକ ସତର୍କତା ଅବଲମ୍ୱନ କରି ପରିବାର ଲୋକେ ମୃତଦେହ ଦେଖି ପାରିବେ । ଆତ୍ମୀୟମାନେ ହ୍ୟାଣ୍ଡ ସାନିଟାଇଜର, ମାସ୍କ ଓ ଗ୍ଲୋବସ୍ ବ୍ୟବହାର କରିବା ବାଧ୍ୟତାମୂଳକ । ମୃତଦେହକୁ ଗାଧୋଇଦେବା, ଚୁମ୍ୱନ ଓ ଆଲିଙ୍ଗନ କରିବା ସମ୍ପୂର୍ଣ୍ଣ ବାରଣ । ମୃତ ଦେହକୁ ନ ଛୁଇଁ ଧର୍ମୀୟ ବ୍ୟବସ୍ଥାରେ ସତ୍କାର କରିବାକୁ ସ୍ୱତନ୍ତ୍ର ନିର୍ଦ୍ଦେଶ । ଶେଷକୃତ୍ୟ ପରେ ପରିବାର ଲୋକେ ଚିତାଭସ୍ମ ନେଇ ପାରିବେ ।
