ଜଳେଶ୍ୱରରେ ଦୁର୍ଦ୍ଦାନ୍ତ ଅପରାଧୀ ରତନ ଦାସ ଓରଫ ଜଗାକୁ ନିର୍ମମ ହତ୍ୟା… ରାଜ୍ୟ ଓ ରାଜ୍ୟ ବାହାରେ ଥିଲା ଅନେକ ମାମଲା
ଜଳେଶ୍ୱର: ଦୁର୍ଦ୍ଦାନ୍ତ ଅପରାଧୀ ରତନ ଦାସ ଓରଫ ଜଗାକୁ ନିର୍ମମ ହତ୍ୟା ଅଭିଯୋଗ ହୋଇଛି। ଗତକାଲି ବିଳମ୍ବିତ ରାତିରେ ଜଗାକୁ ବାଲେଶ୍ଵର ଜିଲ୍ଲା କମର୍ଦା ଥାନା କୁରୁଣ୍ଠିଆ ଗାଁରେ ଟ୍ରକ ଚଢାଇ ହତ୍ୟା କରାଯାଇଥିବା ସୂଚନା ମିଳିଛି । ସବୁଦିନ ଭଳି ଗତକାଲି ବିଳମ୍ବିତ ରାତିରେ ଜଗା ଗାଡ଼ିରୁ ଚାନ୍ଦା ଆଦାୟ କରୁଥିବା ବେଳେ ଗାଡି ଚାଳକଙ୍କ ସହ ଗଣ୍ଡଗୋଳ ହୋଇଥିଲା । ଏହାପରେ ଜଗାକୁ ଟ୍ରକ୍ ଚଢ଼ାଇ ହତ୍ୟା କରାଯାଇଥିବା ଅଭିଯୋଗ ହୋଇଛି । କିଏ ହତ୍ୟା କରିଛି ସେନେଇ କମର୍ଦା ପୋଲିସ ତଦନ୍ତ କରୁଛି ।
ରିପୋର୍ଟ ଅନୁସାରେ ଜଗା ନାଁରେ ରାଜ୍ୟ ତଥା ରାଜ୍ୟ ବାହାରେ ପଶ୍ଚିମବଙ୍ଗ, ଝାଡ଼ଖଣ୍ଡ, ବିହାର, ଗୋଆ ଭଳି ରାଜ୍ୟର ବିଭିନ୍ନ ଥାନାରେ ହତ୍ୟା ଉଦ୍ୟମ, ଛିନ୍ତାଇ ,ଲୁଟ୍ ,ଚୋରା ବନ୍ଧୁକ କାରବାର ଭଳି ଅନେକ ମାମଲା ରହିଛି । ଦୁର୍ଦ୍ଦାନ୍ତ ଅପରାଧୀ ରତନ ଦାସ ଓରଫ ଜଗା ଅନେକ ଦିନରୁ ନିଜ ଆତଙ୍କ ଖେଳାଇଥିଲା । ତାଙ୍କ ଭୟାନକ କାଣ୍ଡ ଯୋଗୁଁ ଲୋକେ ତାକୁ ଦେଖିଲେ ଭୟ କରୁଥିଲେ । ବିଭିନ୍ନ ସ୍ଥାନରେ ଡକାୟତି, ବନ୍ଧୁକ କାରବାର, ଚୋରୀ ନେଇ ଜଗାଙ୍କ ବିରୋଧରେ ମାମଲା ରୁଜୁ ହୋଇଥିଲା । ବାଲେଶ୍ୱର ଜିଲ୍ଲାରେ ମଧ୍ୟ ଅନେକ ଥାନାରେ ଅପରାଧୀଙ୍କ ବିରୋଧରେ କେସ୍ ଫାଇଲ କରାଯାଇଥିଲା ।
ଗତ ବର୍ଷ ଜଣେ ଔଷଧ ଦୋକାନୀଙ୍କୁ ମରଣାନ୍ତକ ଆକ୍ରମଣ କରିଥିଲେ ଜଗା । ଏହା ବ୍ୟତୀତ ଅନେକ ସ୍ଥାନରେ ସେ ସୁନା ଲୁଟ୍ ମଧ୍ୟ କରିଥିଲେ । ଗଣ୍ଡଗୋଳ ସୃଷ୍ଟି କରିବା ଓ ଧମକାଇବା ତାଙ୍କ ନିତିଦିନିଆ କାମ ଥିଲା । ଗତ କାଲି ବିଳମ୍ବିତ ରାତିରେ ମଧ୍ୟ ଜଗା ଗାଡ଼ିରୁ ଚାନ୍ଦା ଆଦାୟ କରୁଥିବା ବେଳେ ଗାଡି ଚାଳକଙ୍କ ସହ ଗଣ୍ଡଗୋଳ କରିଥିଲା । ଏଥିପାଇଁ ଜଗାର ମଥାକୁ ରଡ ସାହାଯ୍ୟରେ ଆକ୍ରମଣ କରାଯାଇଥିଲା । ଜଗାକୁ ନିଜ ଗାଁରେ ହିଁ ହତ୍ୟା କରାଯାଇଛି । ଜଗାର ଶବ ବ୍ୟବଚ୍ଛେଦ ପରେ ଘଟଣା ବିଷୟରେ ଜଣାପଡିବ । ପୋଲିସ ଏବେ ଘଟଣା ନେଇ ତଦନ୍ତ ଜାରି ରଖିଛି ।
(ସମ୍ଭୁନାଥ ଦାସ)
