ଘନଘନ କମ୍ୱିଂରେ ମାଓବାଦୀଙ୍କ ଛତ୍ରଭଙ୍ଗ: ମାଓ ଉପଦ୍ରୁତ ତାଲିକାରୁ ବାଦ୍ ପଡ଼ିଲା ଆଉ ୫ ଜିଲ୍ଲା
ସମ୍ୱଲପୁର/ ବୌଦ୍ଧ/ ଭୁବନେଶ୍ୱର: ରାଜ୍ୟରେ କମୁଛି ମାଓ କାର୍ଯ୍ୟକଳାପ । ଉପାନ୍ତ ଅଞ୍ଚଳରେ ଉନ୍ନୟନ କାମ ସାଙ୍ଗକୁ ପୋଲିସ୍ର ଦୃଢ଼ ଜବାବି ପଦକ୍ଷେପ ପାଇଁ ମାଓହିଂସା କମିଛି । ଏଥିପାଇଁ ଆଜି ୫ଟି ଜିଲ୍ଲାକୁ ରାଜ୍ୟ ସରକାର ମାଓମୁକ୍ତ ଘୋଷଣା କରିଛନ୍ତି । ମୋଟ୍ ୧୯ଟି ଜିଲ୍ଲାକୁ ମାଓ ଉପଦ୍ରୁତ ଘୋଷଣା କରାଯାଇଥିବା ବେଳେ ପୂର୍ବରୁ ୬ଟି ଜିଲ୍ଲାକୁ ମାଓମୁକ୍ତ ଘୋଷଣା କରାଯାଇଥିଲା ।
ବାକି ୮ ଜିଲ୍ଲାରେ ମାଓବାଦୀମାନେ ହିଂସା ଛାଡି ମୁଖ୍ୟସ୍ରୋତରେ ସାମିଲ ହେବାକୁ ପୋଲିସ ଡିଜି ଅପିଲ କରିଛନ୍ତି । ଦୁର୍ବଳ ହେଉଛି ଲାଲ୍ବାହିନୀ । ଘନଘନ କମ୍ବିଂ ଫଳରେ ମାଓବାଦୀଙ୍କ ଛତ୍ରଭଙ୍ଗ । କମୁଛି ମାଓହିଂସା। ମାଓମୁକ୍ତ ରାଜ୍ୟ ପାଇଁ ପୋଲିସ ଡିଜିଙ୍କ ଷ୍ଟ୍ରାଟେଜି । ମାଓ ଉପଦ୍ରୁତ ତାଲିକାରୁ ବାଦ୍ ପଡିଲା ଆଉ ୫ ଜିଲ୍ଲା ।
ରାଜ୍ୟରେ କମିବାରେ ଲାଗିଛି ମାଓବାଦୀ କାର୍ଯ୍ୟକଳାପ । ଗତ ୫ ବର୍ଷରେ ୫ ଜିଲ୍ଲାରେ ଘଟିନାହିଁ ମାଓହିଂସା । ଏଥିପାଇଁ ସିକ୍ୟୁରିଟି ରିଲେଟେଡ୍ ଏକ୍ସପେଣ୍ଡିଚର ବା ଏସ୍ଆରଇ ତାଲିକାରୁ ଅନୁଗୁଳ, ବୌଦ୍ଧ, ସମ୍ବଲପୁର, ଦେବଗଡ଼ ଏବଂ ନୟାଗଡ଼ ଜିଲ୍ଲାକୁ ରାଜ୍ୟ ସରକାର ମାଓମୁକ୍ତ ଘୋଷଣା କରିଛନ୍ତି । ୨୦୧୫ ମସିହାରୁ ବୌଦ୍ଧ ଏବଂ ସମ୍ବଲପୁରରେ କୌଣସି ମାଓହିଂସା ଘଟିନାହିଁ ।
୨୦୧୭ ରୁ ବାକି ୩ଟି ଜିଲ୍ଲାରେ ମାଓବାଦୀଙ୍କ ପତ୍ତା ନାହିଁ । ଏଥିପାଇଁ ଏହି ୫ଟି ଜିଲ୍ଲାକୁ ମାଓମୁକ୍ତ ଜିଲ୍ଲା ଘୋଷଣା କରାଯାଇଛି । ମାଓ ଉପଦ୍ରୁତ ଅଞ୍ଚଳରେ ରାଜ୍ୟ ସରକାରଙ୍କ ବିକାଶମୂଳକ କାର୍ଯ୍ୟ ଏବଂ ପୋଲିସ୍ର ବଳିଷ୍ଠ ସୁରକ୍ଷା ବ୍ୟବସ୍ଥା ଯୋଗୂ ଧୀରେଧୀରେ ମାଓବାଦୀ ଆଦର୍ଶ ପ୍ରତି ଜନସାଧାରଣ ବିମୁଖ ହେଉଛନ୍ତି ।
ମାଓ ସଂଗଠନର ଜନବିରୋଧୀ କାର୍ଯ୍ୟ ପାଇଁ ୨୦୨୦ ମସିହାରେ ୧୭ ଜଣ ମାଓବାଦୀ ଆତ୍ମସମର୍ପଣ କରିଛନ୍ତି । ଏବେ ଯେଉଁ ଅଞ୍ଚଳରେ ମାଓବାଦୀ ସକ୍ରିୟ ଅଛନ୍ତି ସେଠାରେ କମ୍ବିଂ ଜୋରଦାର କରାଯିବ ।
ଅଧିକ ସୁରକ୍ଷା ବଳ ନିୟୋଜିତ କରାଯିବ ବୋଲି ପୋଲିସ୍ ଡିଜି କହିଛନ୍ତି । ମାଓବାଦୀମାନଙ୍କୁ ମୁଖ୍ୟ ସ୍ରୋତରେ ସାମିଲ ହୋଇ ରାଜ୍ୟ ସରକାରଙ୍କ ଥଇଥାନ ଯୋଜନାର ଲାଭ ଉଠାଇବାକୁ ଡିଜି ପରାମର୍ଶ ଦେଇଛନ୍ତି ।
ଓଡ଼ିଶାରେ ଗତ ୩ ଦଶନ୍ଧି ଧରି ଜୋରଦାର ମାଓହିଂସା ଜାରିରହିଥିଲା । ୨୦୧୨ ମସିହାରେ ରାଜ୍ୟର ୧୯ ଜିଲ୍ଲାକୁ ମାଓ ଉପଦ୍ରୁତ ଘୋଷଣା କରାଯାଇଥିବା ବେଳେ ୨୦୧୮ରେ ୬ ଓ ଏବେ ୫, ଦୁଇବର୍ଷରେ ୧୧ଟି ଜିଲ୍ଲାକୁ ମାଓମୁକ୍ତ ଘୋଷଣା କରାଯାଇଛି ।
