ଆଡ଼ପ ଅବଢ଼ା ଭଳି ଫୋନ୍ କଲରେ ବୁକିଂ କରି ହେବ ନୀଳାଚଳ ଅବଢ଼ା

ପୁରୀ: ବାହାରିଲା ନୀଳାଚଳ ଅବଢ଼ା । ନବଦିନାତ୍ମକ ଯାତ୍ରା ସାରି ଶ୍ରୀଜିଉ ରତ୍ନବେଦୀକୁ ଫେରି ଆସିବା ପରେ ବାହାରିଛି ନୀଳାଚଣ ଅବଢ଼ା । କୋଭିଡ୍ କଟକଣା ଯୋଗୁଁ ଶ୍ରଦ୍ଧାଳୁଙ୍କ ମନ୍ଦିର ମନା ହୋଇଛି । ତେଣୁ ଶ୍ରୀଗୁଣ୍ଡିଚା ମନ୍ଦିରରେ ଯେଉଁଭଳି ଆଡ଼ପ ଅବଢ଼ା ମିଳୁଥିଲା ସେହିଭଳି ବ୍ୟବସ୍ଥା ହେବ । ଉତ୍ତରପାର୍ଶ୍ୱ ମଠରେ ଅସ୍ଥାୟୀ କାଉଣ୍ଟରରେ ମିଳିବ ନୀଳାଚଳ ଅବଢ଼ା । ଶ୍ରୀଗୁଣ୍ଡିଚା ମନ୍ଦିର ଭଳି ମୋବାଇଲ କଲ୍ ମାଧ୍ୟମରେ ମଧ୍ୟ ଭକ୍ତ ମାନେ ଅବଢ଼ା ବରାଦ ଦେଇପାରିବେ । ଏନେଇ ସୁଆର ମହାସୁଆର ନିଯୋଗ ପକ୍ଷରୁ ପ୍ରଶାସନ ସହ ଆଲୋଚନା ସରିଛି ।

ଗତକାଲି ଘୋଷଯାତ୍ରା ସାରି ନୀଳକନ୍ଦରକୁ ଫେରିଛନ୍ତି ନୀଳାଦ୍ରିନାଥ । ସଅଳ ନୀତିକାନ୍ତି ସରିବା ପରେ ସଅଳ ହୋଇଥିଲା ପହଣ୍ଡି । ଗୋଟି ପହଣ୍ଡିରେ ଶ୍ରୀମନ୍ଦିରକୁ ବିଜେ କରିଥିଲେ ସୁଦର୍ଶନ, ବଳଭଦ୍ର ଓ ସୁଭଦ୍ରା ।  ଶ୍ରୀଜଗନ୍ନାଥ ଯିବାବେଳେ ସିଂହଦ୍ୱାର ବନ୍ଦ ହୋଇଥିଲା । ତେବେ, ରସଗୋଲା ଦେଇ ମାତା ଲକ୍ଷ୍ମୀଙ୍କ ମାନଭଞ୍ଜନ କରିବା ପରେ ଶ୍ରୀମନ୍ଦିରକୁ ମହାପ୍ରଭୁ ପ୍ରବେଶ କରିଥିଲେ ।

ଚଳିତବର୍ଷ ସୁପ୍ରିମକୋର୍ଟଙ୍କ ନିର୍ଦ୍ଦେଶ ମୁତାବକ କୋଭିଡ୍ କଟକଣା ମାନି ରଥଯାତ୍ରା ହୋଇଥିଲା । ଭକ୍ତବିନା ବଡ଼ଦାଣ୍ଡକୁ ଆସିଥିଲେ ମହାପ୍ରଭୁ ଜଗନ୍ନାଥ । କୋଭିଡ୍ ଟେଷ୍ଟ ପରେ ନେଗେଟିଭ୍ ଆସିଥିବା ସେବାୟତ ରଥ ଟଣାରେ ନିୟୋଜିତ ହୋଇଥିଲେ । ସୁପ୍ରିମକୋର୍ଟଙ୍କ ନିର୍ଦ୍ଦେଶର ୧୨ ଘଣ୍ଟା ମଧ୍ୟରେ ରାଜ୍ୟ ସରକାର ସମସ୍ତ ପ୍ରସ୍ତୁତି ସାରିଥିଲେ । କୋଭିଡ୍ କଟକଣା ଭିତରେ ଶୃଙ୍ଖଳାର ସହ ରଥଯାତ୍ରା ସରିଛି । ମୁଖ୍ୟମନ୍ତ୍ରୀ ଏଥିପାଇଁ ସମସ୍ତ ସେବାୟତ, ଶ୍ରଦ୍ଧାଳୁ ଓ ରାଜ୍ୟବାସୀଙ୍କୁ ଧନ୍ୟବାଦ ଦେଇଛନ୍ତି । କରୋନା ପାଇଁ ଜୁଲାଇ ୩୧ ଯାଏଁ ମନ୍ଦିରରେ ଶ୍ରଦ୍ଧାଳୁଙ୍କ ଦର୍ଶନ ଉପରେ ସରକାର କଟକଣା ଜାରି କରିଛନ୍ତି ।

https://youtu.be/9yf5mmjbOpU

ସରିଲା ନବଦିନାତ୍ମକ ଯାତ୍ରାର ଅନ୍ତିମ ପର୍ବ: ରତ୍ନବେଦୀରେ ବିରାଜିଲେ ମହାପ୍ରଭୁ