ଭତ୍ତା ଆବେଦନ ପାଇଁ ପଞ୍ଚାୟତ କାର୍ଯ୍ୟାଳୟ ଯିବାକୁ ପଡ଼ିବ ନାହିଁ, ଅନଲାଇନରେ କରିପାରିବେ ଆବେଦନ

ଭୁବନେଶ୍ୱର: ଏଣିକି ଆଉ ଭତ୍ତା ଆବେଦନ ପାଇଁ ପଞ୍ଚାୟତ କାର୍ଯ୍ୟାଳୟ ଯିବାକୁ ପଡ଼ିବ ନାହିଁ। ଭିନ୍ନକ୍ଷମ, ବିଧବା ଓ ତୃତୀୟଲିଙ୍ଗଙ୍କ ପାଇଁ ଅନଲାଇନ ଆବେଦନ ସୁବିଧା ଆରମ୍ଭ କରିଛି ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ। ଉଭୟ କେନ୍ଦ୍ର ଓ ରାଜ୍ୟ ପେନସନ ପାଇଁ ଏହା ଲାଗୁ ହେଲା। ଏ ନେଇ ବିଭାଗୀୟ ସଚିବଙ୍କ ପକ୍ଷରୁ ସମସ୍ତ ଜିଲ୍ଲାପାଳଙ୍କୁ ପତ୍ର ଲେଖାଯାଇଛି।

କରୋନା ମହାମାରୀ ପାଇଁ ଘରୁ ନବାହାରି ଘରେ ବସି ସୁରକ୍ଷିତ ଭାବେ ଆବେଦନ କରିବାକୁ ଏହା ଆରମ୍ଭ କରାଯାଇଛି। ଆବଶ୍ୟକସ୍ଥଳେ ଜନସେବା କେନ୍ଦ୍ର ଆବେଦନ କରିବାରେ ସାହାଯ୍ୟ କରିବେ। ଓଡ଼ିଶାରେ ମଧୁବାବୁ ପେନସନ ଯୋଜନାରେ ୨୮ ଲକ୍ଷ ହିତାଧିକାରୀ ଥିବାବେଳେ ଜାତୀୟ ସାମାଜିକ ପେନସନ ଯୋଜନାରେ ୨୦ ଲକ୍ଷ ହିତାଧିକାରୀ ଅଛନ୍ତି ।

SSEPD ବିଭାଗ ଏହାର ସମସ୍ତ ଯୋଜନା ଅନଲାଇନରେ ଉପଲବ୍ଧ କରାଇଛି | ବୃଦ୍ଧ ପୁରୁଷ ଏବଂ ମହିଳା, ଭିନ୍ନକ୍ଷମ, ଟ୍ରାନ୍ସଜେଣ୍ଡର ଇତ୍ୟାଦି ହିତାଧିକାରୀ ମାନେ ଏଥିରେ ଅନ୍ତର୍ଭୁକ୍ତ ଅଛନ୍ତି । ଏହି କାର୍ଯ୍ୟକ୍ରମ ଜରିଆରେ ଯେକେହି ବି NSAP & MBPY ଅଧୀନରେ ସାମାଜିକ ସୁରକ୍ଷା ପେନ୍ସନ୍ ପାଇଁ ଆବେଦନ କରିପାରିବେ ।

ଜଣେ ବ୍ୟକ୍ତିଙ୍କ ଦ୍ୱାରା ଆବେଦନ ଦାଖଲ ଠାରୁ ଆରମ୍ଭ କରି  ମଞ୍ଜୁର ପର୍ଯ୍ୟନ୍ତ ପ୍ରକ୍ରିୟା ଏଠାରେ ଉପଲବ୍ଧ କରାଯାଇଛି । ପ୍ରାଧିକରଣ ଅନଲାଇନରେ କରାଯାଇଛି ଏବଂ ଆବେଦନକାରୀ ତାଙ୍କର ଅପଡେଟ୍ ସ୍ଥିତି ପାଇପାରିବେ । ସାମ୍ପ୍ରତିକ କରୋନା ମହାମାରୀକୁ ଦୃଷ୍ଟିରେ ରଖି ଏହି ଅନଲାଇନ୍ ସିଷ୍ଟମ୍ ଏକ ଜରୁରୀ ସୁରକ୍ଷା ଆବଶ୍ୟକତା ବୋଲି କୁହାଯାଇଛି ।