ଯୁଦ୍ଧକାଳୀନ ଭିତ୍ତିରେ ସୀମାରେ ନିଜର ଶକ୍ତି ବଢାଇଛି ଭାରତ,ହାଇ ଆଲର୍ଟରେ ତିନି ସେନା

ଲଦାଖ: ଗଲୱାନ୍‌ ଘମାସାନ ପରେ ହାଇଆଲର୍ଟରେ ସେନା । ଜଳ, ସ୍ଥଳ, ଆକାଶ ସବୁଠି ସେନା ସଜାଗ । ଚୀନ୍‌ ସହ ସୀମା ବିବାଦକୁ ନଜରରେ ରଖି ଭାରତ ଯୁଦ୍ଧକାଳୀନ ଭିତ୍ତିରେ ସୀମାରେ ନିଜର ଶକ୍ତି ବଢାଇଛି ଓ ବ୍ୟାପକ ଯୁଦ୍ଧାସ୍ତ୍ର ପରିବହନ ଆରମ୍ଭ କରିଛି । ଚୀନ୍‌ ସୀମାରେ ଥିବା ୩ହଜାର ୪୮୮ କିଲୋମିଟର ବାସ୍ତବ ସୀମା ବା LAC ନିକଟରେ ଭାରତୀୟ ସ୍ଥଳ ସେନା ଓ ବାୟୁସେନା ଆଲର୍ଟ ପୋଜିସନ୍‌ରେ ରହିଛନ୍ତି ।

 ଲଦାଖରୁ ଅରୁଣାଚଳପ୍ରଦେଶ ପର୍ଯ୍ୟନ୍ତ  LACରେ ସେନା ଯେକୈାଣସି ସ୍ଥିତିର ସାମନା କରିବାକୁ ସଜାଗ ରହିଛି । ଅରୁଣାଚଳ ପ୍ରଦେଶ, ଉତ୍ତାରଖଣ୍ଡ, ହିମାଚଳପ୍ରଦେଶ ଓ ଲଦାଖ LACର ଫରୱାଡ ଘାଟିରେ ଭାରତୀୟ ସେନା ଅତିରିକ୍ତ ସେନା ମୁତୟନ କରିସାରିଛି । ସେହିପରି LAC ଉପରେ ଭାରତୀୟ ବାୟୁସେନା ପକ୍ଷରୁ କଡା ନଜର ରଖାଯାଇଛି।

ଅନ୍ୟପଟେ ଭାରତୀୟ ମହାସାଗର ଅଞ୍ଚଳରେ ନୌସେନା ସତର୍କ ନଜର ରଖିଛି । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ସିଡିଏସ ବିପିନ ରାୱତ ଓ ତିନି ସେନା ମୁଖ୍ୟଙ୍କ ବୈଠକରେ ଏନେଇ ନିଷ୍ପତ୍ତି ନିଆଯାଇଛି । ସେପଟେ ଚୀନ୍‌ ମଧ୍ୟ LACରେ ନିଜ ସୈନ୍ୟବଳ ବଢାଇଛି । ବିଶେଷ କରି ଗଲୱାନ୍‌, ଦୌଲତ ବୈଗ ଓଲଡି, ଦେପସାଙ୍ଗ, ଚୁସୁଲ ଓ ପୂର୍ବ ଲଦାଖର ଅନ୍ୟ ଅଞ୍ଚଳରେ ଚୀନ୍‌ ଅଧିକ ସଂଖ୍ୟାରେ ସେନା ମୁତୟନ କରିଛି।