ସସ୍ମିତଙ୍କ ପାଲଟା ପ୍ରଶ୍ନ: କେଉଁ ବିଜେପି ଶାସିତ ରାଜ୍ୟରେ ହୋଇଛି ସଂଙ୍ଗରୋଧ କେନ୍ଦ୍ର
1 min read
ଭୁବନେଶ୍ୱର: କେନ୍ଦ୍ର ସରକାରଙ୍କ ସଂସ୍ଥା ଆଇସିଏମ୍ଆର ପକ୍ଷରୁ କୋଭିଡ-୧୯ ଟେଷ୍ଟିଂ ନେଇ ଗାଇଡଲାଇନ ଜାରି କରାଯାଇଛି । ସେହି ଗାଇଡଲାଇନ୍ରେ କରୋନା ଲକ୍ଷଣ ଥିବା ରୋଗୀଙ୍କ ଚିକିତ୍ସା କରିବାକୁ ନିର୍ଦ୍ଦେଶ ରହିଛି । ଏହି ଗାଇଡଲାଇନ୍ ଅନୁଯାୟୀ ରାଜ୍ୟରେ କୋଭିଡ ଟେଷ୍ଟିଂ କରାଯାଉଛି ।
ଏଥିସହିତ ଗାଇଡଲାଇନ୍ ଅନୁଯାୟୀ ରାଜ୍ୟରେ ରେଣ୍ଡଲ ସାମ୍ପଲ ଟେଷ୍ଟିଂ ମଧ୍ୟ ଜାରି ରହିଛି । ଉଭୟ ବିଜେପି ଓ କଂଗ୍ରେସ ଶାସିତ ରାଜ୍ୟରେ ମଧ୍ୟ ଏହା ଅନୁଯାୟୀ ଟେଷ୍ଟିଂ କରାଯାଉଛି । ଏହାର ପରିଣାମ ସ୍ୱରୂପ ରାଜ୍ୟରେ କରୋନା ସ୍ଥିତି ନିୟନ୍ତ୍ରଣାଧିନ ରହିଛି ବୋଲି ସୂଚନା ଦେଇଛନ୍ତି ବିଜେଡି ମୁଖପାତ୍ର ଡ. ସସ୍ମିତ ପାତ୍ର ।
କୋଭିଡ ଟେଷ୍ଟିଂ ନେଇ ରାଜ୍ୟ ପକ୍ଷରୁ ହୋଇଥିବା ଅଭିଯୋଗର ଜବାବ ରଖି ଶ୍ରୀ ପାତ୍ର ଆହୁରୀ କହିଛନ୍ତି ଯେ, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ରାଜ୍ୟରେ ଦୈନିକ ୧୫ ହଜାର ନମୁନା ପରୀକ୍ଷଣ ବ୍ୟବସ୍ଥା କରାଯାଇଛି । କିନ୍ତୁ ଆଇସିଏମ୍ଆର ଗାଇଡଲାଇନ୍ ଅନୁଯାୟୀ ରାଜ୍ୟରେ ନମୁନା ପରୀକ୍ଷଣ ଚାଲିଛି ।
ଅପରପକ୍ଷରେ ରାଜ୍ୟରେ କୋଭିଡ ଟେଷ୍ଟିଂ ନେଇ ବିଜେପିର ଅଭିଯୋଗକୁ ନିନ୍ଦା କରିଛନ୍ତି ଡ. ପାତ୍ର । ବିଜେପି ଏଭଳି ଅଭିଯୋଗ କରିବା ପୂର୍ବରୁ ତାଙ୍କ ପାର୍ଟି ଦ୍ୱାରା ଶାସିତ କେନ୍ଦ୍ର ସରକାରଙ୍କ ସଂସ୍ଥା ଆଇସିଏମ୍ଆରର ଗାଇଡଲାଇନ୍କୁ ଅନୁଧ୍ୟାନ କରୁ । ଏବଂ ଏଭଳି ଗମ୍ଭୀର ବିଷୟକୁ ନେଇ ରାଜନୀତି ନକରିବାକୁ ପରାମର୍ଶ ଦେଇଛନ୍ତି । ଏବେବି ଓଡ଼ିଶାରେ ସ୍ଥିତି ଭଲ ରହିଛି । ରାଜ୍ୟ ସରକାରଙ୍କ ତ୍ୱରିତ ପଦକ୍ଷେପ ଓ ସଙ୍ଗରୋଧ କେନ୍ଦ୍ର ଭଳି ଅଭୂତପୂର୍ବ ବ୍ୟବସ୍ଥା ବଳରେ ଏପରି ହୋଇପାରିଛି । ଯାହା ଅନ୍ୟ କୌଣସି ରାଜ୍ୟରେ ହୋଇନାହିଁ ।
