୧୨ ଘଣ୍ଟାର ଇସ୍ତଫା ନାଟକ, ଦଳକୁ ଫେରିଲେ ଜଗନ୍ନାଥ
ଭୁବନେଶ୍ୱର: ଭୁବନେଶ୍ୱର ଜିଲ୍ଲା ସଭାପତି ନିଯୁକ୍ତି ପରେ ବିଜେପିରେ ଦେଖିବାକୁ ମିଳିଛି ପଲ୍ଟିକାଲ ଡ୍ରାମା । ବାବୁ ସିଂଙ୍କ ଜିଲ୍ଲା ସଭାପତି ନିଯୁକ୍ତି ହେବାର କିଛି ସମୟ ପରେ ଜଗନ୍ନାଥ ପ୍ରଧାନ ଏକ ସାଧା କାଗଜରେ ଦଳରୁ ଇସ୍ତଫା ଦେଇଥିଲେ । ହେଲେ ଇସ୍ତଫାର ୧୨ ଘଣ୍ଟା ନ ପୁରୁଣୁ ପୁଣି ଥରେ ଦଳକୁ ଫେରିଛନ୍ତି । ଜଗନ୍ନାଥଙ୍କ ଏପରି ପଲ୍ଟିକାଲ ଷ୍ଟଣ୍ଟକୁ କେହି ଡ୍ରାମା ତ କେହି ବ୍ଲାକମେଲିଂର ନାଁ ଦେଇଛନ୍ତି । ଆଜି ବାବୁ ସିଂଙ୍କୁ ଦଳୀୟ କର୍ମୀ ବିଜେପି କାର୍ଯ୍ୟାଳୟ ବାହାରେ ସମ୍ବର୍ଦ୍ଧିତ କରିଥିଲେ । ଏହା ପରେ ବାବୁ ସିଂ ଧାଇଁଲେ ଜଗନ୍ନାଥଙ୍କ ଘରକୁ । ଜଗନ୍ନାଥଙ୍କ ଘରେ ବି ସମର୍ଥକଙ୍କ ଭିଡ଼ ଜମିଥିଲା । ବହୁ ସମୟ ଧରି ଚାଲିଲା ଡ୍ରାମା । ଶେଷରେ କୋଳାକୋଳି ହେଲେ ବାବୁ ଓ ଜଗନ୍ନାଥ ।
ଭୁବନେଶ୍ୱର ବିଜେପିର ପୁରୁଖା ନେତା ଜଗନ୍ନାଥ । ହେଲେ ତାଙ୍କ ସହ ବିନା ଆଲୋଚନାରେ ବାବୁ ସିଂଙ୍କୁ ସଭାପତି କରିବାରୁ ଅଭିମାନ କରିଥିଲେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଆଲୋଚନା ପରେ ଇସ୍ତଫା ପ୍ରତ୍ୟାହାର କରିଥିବା ଜଗନ୍ନାଥ କହିଛନ୍ତି । ତେବେ ନିଜେ ନ ହେଲେ ବି ପୂର୍ବତନ ଭୁବନେଶ୍ୱର ଜିଲ୍ଲା ସଭାପତି ହରେକୃଷ୍ଣ ଖୁଣ୍ଟିଆଙ୍କୁ ପୁଣି ଥରେ ଦାୟିତ୍ୱ ମିଳିବା ନେଇ ଜଗନ୍ନାଥ ଆଶାବାଦୀ ଥିବା ଚର୍ଚ୍ଚା ହେଉଛି । ହେଲେ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ କ୍ୟାମ୍ପର ବାବୁ ସିଂଙ୍କୁ ଦାୟିତ୍ୱ ମିଳିବାରୁ ସେ ଅସନ୍ତୁଷ୍ଟ ଥିଲେ । ଅପରାଜିତା ଆସି ଭେଟିବା ପରେ ମାନଭଞ୍ଜନ କଲେ ଜଗନ୍ନାଥ ।
