ମୋଦି କ୍ୟାବିନେଟ୍ ପାସ କଲା ଦୁଇ ଅଧ୍ୟାଦେଶ,କୃଷକଙ୍କ ପାଇଁ ‘ଗୋଟିଏ ଦେଶ ଗୋଟିଏ ବଜାର’ ନୀତି
ନୂଆଦିଲ୍ଲୀ: କରୋନା ଭାଇରସ ସଂକଟ ଭିତରେ ଆଜି ପୁଣିଥରେ କେନ୍ଦ୍ର କ୍ୟାବିନେଟ୍ ବୈଠକ ଅନୁଷ୍ଠିତ ହୋଇଥିଲା । ସକାଳ ୧୧ଟାରେ ଆରମ୍ଭ ହୋଇଥିବା ବୈଠକ ଦୁଇ ଘଣ୍ଟା ଧରି ଚାଲିଥିଲା । ବୈଠକରେ ଦୁଇଟି ଅଧ୍ୟାଦେଶକୁ ମଞ୍ଜୁରୀ ମିଳିଥିଲା ।
ଏବେ କୃଷକ ନିଜ ଫସଲକୁ ସିଧା ବିକ୍ରି କରି ପାରିବେ । ଦେଶରେ କୃଷକଙ୍କ ପାଇଁ ଗୋଟିଏ ଦେଶ,ଗୋଟିଏ ବଜାର ବ୍ୟବସ୍ଥା ରହିବ । ଏହି ସମସ୍ତ ନିଷ୍ପତ୍ତି ବାବଦରେ ଅପରାହ୍ନ ୪ଟାରେ ସାମ୍ବାଦିକ ସମ୍ମିଳନୀରେ ବିସ୍ତୃତବିବରଣୀ ଦିଆଯିବ । ଏହା ଦ୍ୱାରା କୃଷକ ଦେଶର ଯେକୌଣସି ସ୍ଥାନରେ ନିଜ ଫସଲ ବିକ୍ରି କରିପାରିବେ ।
ଏହା ବ୍ୟତିତ କ୍ୟାବିନେଟ୍ କୃଷି ଉତ୍ପାଦ ଷ୍ଟକ ସୀମାକୁ ଶେଷ କରି ଦେଇଛନ୍ତି । କେବଳ ଅତି ଜରୁରୀ ପରିସ୍ଥିତିରେ ଏଭଳି କରାଯାଇ ପାରିବ । ସୂଚନାଯୋଗ୍ୟ ଯେ, ୨୦ ଲକ୍ଷ କୋଟି ଟଙ୍କାର ପ୍ୟାକେଜରେ ଏସମ୍ପର୍କରେ ଘୋଷଣା କରାଯାଇଥିଲା ।
ଚଳିତ ସପ୍ତାହରେ ଏହା ହେଉଛି ମୋଦି କ୍ୟାବିନେଟରେ ଦ୍ୱିତୀୟ ବୈଠକ । ମୋଦି ସରକାର ନିକଟରେ ଦ୍ୱିତୀୟ ପାଳିର ପ୍ରଥମ ବର୍ଷ ପୁରଣ କରିଛି । ସୋମବାର ଦିନ ହୋଇଥିବା କ୍ୟାବିନେଟ୍ ବୈଠକରେ ଏମଏସଏମଇ ସେକ୍ଟର ଓ କୃଷକଙ୍କୁ ନେଇ କିଛି ବଡ ନିଷ୍ପତ୍ତି ନିଆଯାଇଥିଲା ।
