ପୁଣି ଜଣେ ସାଧୁଙ୍କୁ ହତ୍ୟା, କାର୍ ଭିତରେ ପୁରାଇ ନେଉଥିଲା ଅଭିଯୁକ୍ତ…
ମହାରାଷ୍ଟ୍ରର ପାଲଘରରେ ସାଧୁଙ୍କୁ ହତ୍ୟା ପରେ ଏବେ ଆଉ ଜଣେ ସାଧୁଙ୍କୁ ହତ୍ୟା କରାଯାଇଛି । ଯାହାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି ହୋଇଛି । ପାଲ୍ଘରରେ ମବ୍ ଲିଞ୍ଚିଂରେ ଦୁଇ ସାଧୁଙ୍କୁ ହତ୍ୟା ପରେ ଏବେ ନନ୍ଦେଡରେ ଲିଙ୍ଗାୟତ ସମ୍ପ୍ରଦାୟର ଜଣେ ସାଧୁଙ୍କୁ ହତ୍ୟା କରାଯାଇଛି । ଯାହାକି ଅତ୍ୟନ୍ତ ସମ୍ବେଦନଶୀଳ ପ୍ରସଙ୍ଗ ପାଲଟିଛି । ସାଧୁଙ୍କ ନାଁ ରୁଦ୍ର ପାଶୁପତି ମହାରାଜ ବୋଲି ଜଣାପଡ଼ିଛି । ପୋଲିସର କହିବାନୁଯାୟୀ, ଲିଙ୍ଗାୟତ ସମାଜର ଜଣେ ବ୍ୟକ୍ତି ସାଇନାଥ ରାମ ଏହି ସାଧୁଙ୍କୁ ହତ୍ୟା କରିଛି । ସାଧୁଙ୍କ ବ୍ୟତୀତ ଅନ୍ୟ ଜଣେ ବ୍ୟକ୍ତିଙ୍କୁ ମଧ୍ୟ ସେହି ଅଞ୍ଚଳରେ ହତ୍ୟା କରାଯାଇଛି । ସେହି ଅଭିଯୁକ୍ତ ସାଇନାଥଙ୍କ ସହଯୋଗୀ ବୋଲି ପୋଲିସ ଅନୁମାନ କରୁଛି ।
ରାତି ପ୍ରାୟ ୧୨ ଟାରୁ ୧୨.୩୦ ମଧ୍ୟରେ ସାଧୁଙ୍କୁ ହତ୍ୟା କରାଯାଇଛି । ଅଭିଯୁକ୍ତ ଆଶ୍ରମରେ ସାଧାରଣ ଭାବେ ଫାକଟ ଏବଂ କବାଟ ଦେଇ ପ୍ରବେଶ କରିଥିଲା । ସାଧୁଙ୍କୁ ହତ୍ୟା କରିବା ପରେ ଅଭିଯୁକ୍ତ ସାଇନାଥଙ୍କ ମୃତଦେହକୁ ଲୁଚାଇବାକୁ ମଧ୍ୟ ଚେଷ୍ଟା କରିଥିଲା । ସେ ସାଧୁଙ୍କ ମୃତଦେହକୁ ତାଙ୍କ କାରରେ ଲୁଚାଇ ନେବାକୁ ଚେଷ୍ଟା କରିଥିଲା, ହେଲେ କାର୍ଟି ଫାଟକ ନିକଟରେ ହିଁ ଫସି ଯାଇଥିଲା । ଫଳରେ ଆଶ୍ରମ ଛାତ ଉପରେ ଶୋଇଥିବା ଦୁଇ ସେବକଙ୍କ ନିଦ ଭାଙ୍ଗିଯାଇଥିଲା । ସେମାନେ ଦୌଡ଼ି ଆସି ଅଭିଯୁକ୍ତକୁ କାବୁ କରିବାକୁ ଚେଷ୍ଟା କରିଥିଲେ । ହେଲେ ଅଭିଯୁକ୍ତ ଖସି ପଳାଇବାରେ ସକ୍ଷମ ହୋଇଥିଲା । ଏହା ମଧ୍ୟରେ ରବିବାର ସକାଳେ ଜିଲ୍ଲା ପରିଷଦ ସ୍କୁଲ ନିକଟରେ ଆଉ ଏକ ମୃତଦେହ ମିଳିଥିଲା ।
ଅନ୍ୟ ମୃତ ବ୍ୟକ୍ତି ହେଉଛନ୍ତି ଅଭିଯୁକ୍ତର ସହଯୋଗୀ
ଦ୍ୱିତୀୟ ମୃତକ ଜଣକ ହେଉଛନ୍ତ ଭଗବାନ ରାମ ସିନ୍ଦେ । ପୋଲିସର କହିବାନୁଯାୟୀ ଅଭିଯୁକ୍ତ ସାଇନାଥର ସହଯୋଗୀ ଏବଂ ସ୍କୁଲ ନିକଟରେ ତାର ମୃତଦେହ ଉଦ୍ଧାର କରାଯାଇଛି । ଅଭିଯୁକ୍ତ ମଧ୍ୟ ଲିଙ୍ଗାୟତ ସମାଜର ବୋଲି ଜଣାପଡ଼ିଛି । ତେବେ ଅଭିଯୁକ୍ତ କାହିଁକି ସାଧୁଙ୍କୁ ହତ୍ୟା କଲା ଏବଂ ଏହା ପରେ ସେ ତାଙ୍କ ସାଥୀକୁ ମଧ୍ୟ ହତ୍ୟା କଲା କି ? ଏନେଇ ପୋଲିସ ତଦନ୍ତ ଚଳାଇଛି । ସାଧୁ ମହାରାଜ ୨୦୦୮ରେ ନିର୍ବାଣୀ ମଠ ପ୍ରତିଷ୍ଠାନକୁ ଆସିଥିଲେ । ଏହି ମଠ ପ୍ରାୟ ଶହେ ବର୍ଷ ପୁରୁଣା ମଠ ଅଟେ ।
