ଆର୍ଥିକ ବର୍ଷରେ କମ୍ ରହିବ ଅଭିବୃଦ୍ଧି ହାର, ମାନିଲା ଆରବିଆଇ

ମୁମ୍ବାଇ: ୨୦୨୦-୨୧ ଆର୍ଥିକ ବର୍ଷରେ ଦେଶରେ ଅଭିବୃଦ୍ଧି ହାର (ଜିଡିପି) ନୈରାଶ୍ୟଜନକ ରହିବ । ଅର୍ଥାତ୍ ଜିଡିପି ତଳକୁ ଖସିବ । କରୋନା ଲକଡାଉନ୍ ପାଇଁ କେତେକ ରେଟିଂ ଏଜେନ୍ସି ଅଭିବୃଦ୍ଧି ହାର ଖସିବା ନେଇ ଆକଳନ କରିଥିଲେ । କିନ୍ତୁ, ଜିଡିପି ନେଇ ଆରବିଆଇ ସେତେବେଳେ କୌଣସି ଅନୁମାନ ସାଧାରଣରେ ପ୍ରକାଶ କରିନଥିଲା ।

କରୋନା ସଂକଟ ଉପରେ ବସିଥିବା ମୁଦ୍ରା ନୀତି ସମିତି ବେଠକରେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ଏକଥା କହିଛନ୍ତି । ୨୦୨୧ ଆର୍ଥିକ ବର୍ଷରେ ଅଭିବୃଦ୍ଧି ହାର ଖସିବ ଏପରିକି ଏହା ନକରାତ୍ମକ ରହିପାରେ ବୋଲି କହିଛନ୍ତି ।

କରୋନା ପାଇଁ ମୋଦି ସରକାର ୨୦ ଲକ୍ଷ କୋଟି ଟଙ୍କାର ଆର୍ଥିକ ପ୍ୟାକେଜ୍ ଘୋଷଣା କରିଛନ୍ତି । ପ୍ୟାକେଜର ବିସ୍ତୃତ ବିବରଣୀ ରଖି ସାରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଏବେ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ରେପୋ ରେଟ୍ ହ୍ରାସର ଘୋଷଣା କରିଛନ୍ତି । ହ୍ରାସ୍ ପରେ ରେପୋ ରେଟ୍ ୪ ପ୍ରତିଶତ ରହିବ । ଏଥିସହ ଆରବିଆଇ ଅତିରିକ୍ତ ଭାବେ ଭାବେ ଲୋନ୍ ଉପରେ ୩ ମାସର ମହଲତ ଦେଇଛି ।

ମହାମାରୀ କରୋନା ପାଇଁ ଦେଶରେ ଅର୍ଥନୀତି ସଂକଟ ବଢ଼ିବ ବୋଲି ପୂର୍ବରୁ ଦୁନିଆର ବଭିନ୍ନ ରେଟିଂ ଏଜେନ୍ସି ଆକଳନ କରି ଚିନ୍ତା ପ୍ରକାଶ କରିଥିଲେ । କ୍ରେଡିଟ୍ ରେଟିଂ ଏଜେନ୍ସି ମୁଡିଜ୍ ଇନଭେଷ୍ଟର୍ସ ମଧ୍ୟ ୨୦୨୦-୨୧ ବର୍ଷରେ ଭାରତର ଆର୍ଥିକ ବିକାଶ ଦର ଶୂନ ପ୍ରତିଶତ ରହିବ ବୋଲି ଆକଳନ କରିଥିଲା ।

RBIର ବଡ ଘୋଷଣା: ରେପୋ ରେଟ୍ ହ୍ରାସ ହେତୁ ଶସ୍ତା ହୋଇପାରେ ଲୋନ୍‌,ଇଏମ୍‌ଆଇ ପାଇଁ ଆଉ ୩ ମାସ ମହଲତ