କେବେ ଧିମେଇ ଯାଉଛି ତ କେବେ କ୍ଷୀପ୍ର ଗତିରେ ସ୍ଥଳଭାଗ ଆଡ଼କୁ ମୁହାଁଉଛି…

ଭୁବନେଶ୍ୱର: କେଉଁଠି ଲ୍ୟାଣ୍ଡଫଲ୍‌ କରିବ ଅମ୍ଫାନ ?  ପଶ୍ଚିମବଙ୍ଗ ନା ବାଂଲାଦେଶ ନା ଓଡ଼ିଶା ?  କେତେ ପ୍ରଭାବିତ ହେବ ଓଡ଼ିଶା ଉପକୂଳ ? .. ଏସବୁ ପ୍ରଶ୍ନ ମଧ୍ୟରେ ସମୁଦ୍ରରେ ବଳ ଗୋଟାଇ ମାଡ଼ି ଆସୁଛି ଅମ୍ଫାନ । କେବେ ଧିମେଇ ଯାଉଛି ତ କେବେ କ୍ଷୀପ୍ର ଗତିରେ ସ୍ଥଳଭାଗ ଆଡ଼କୁ ମୁହାଁଉଛି । ପାଣିପାଗ ବିଭାଗର ଆକଳନ କହୁଛି, ପଶ୍ଚିମବଙ୍ଗର ସାଗର ଦୀପ ଓ ବାଂଲାଦେଶର ହାତୀୟା ଦୀପ ମଝିରେ ବାତ୍ୟା ସ୍ଥଳଭାଗ ଛୁଇଁବ । କିନ୍ତୁ ଓଡ଼ିଶା ବିପଦଶୂନ୍ୟ ବୋଲି କହିହେବନି । ରିକର୍ଭ ପରେ ହିଁ ଚିତ୍ର ସ୍ପଷ୍ଟ ହେବ ।

୧୮ ତାରିଖ ମଧ୍ୟାହ୍ନରୁ ଦକ୍ଷିଣ ଓଡ଼ିଶା ଉପକୂଳରେ ବର୍ଷା ଓ ପବନ ଆରମ୍ଭ ହେବ । ୧୯ ତାରିଖରେ ଉପକୂଳ ଓଡ଼ିଶାରେ ପ୍ରବଳ ବର୍ଷା ସମେତ ଘଣ୍ଟାପ୍ରତି ୭୦ରୁ ୯୦ କିଲୋମିଟର ବେଗରେ ବହିବ ପବନ । ୧୯ ତାରିଖ ବେଳକୁ ଅମ୍ଫାନ ପବନର ବେଗ ୧୮୦ରୁ ୨୦୦ କିଲୋମିଟର ହେବ ବୋଲି ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ କେନ୍ଦ୍ର । ୨୦ ତାରିଖକୁ ଘଣ୍ଟାପ୍ରତି ୧୨୦ରୁ ୧୩୫ କିଲୋମିଟର ବେଗରେ ପବନ ବହିବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ପୂବାନୁମାନ କରିଛି ।

୪ଟି ଜିଲ୍ଲା ବାଲେଶ୍ୱର, ଭଦ୍ରକ, ଜଗତସିଂହପୁର ଏବଂ କେନ୍ଦ୍ରାପଡ଼ାରେ ପ୍ରବଳରୁ ଅତି ପ୍ରବଳ ବର୍ଷା ଆଶଙ୍କା ରହିଛି  । ସେପଟେ ଅମ୍ଫାନର ସ୍ଥିତି, ଗତି ଓ ପ୍ରଭାବ ନେଇ ବିଶେଷଜ୍ଞମାନେ ଆକଳନରେ ବ୍ୟସ୍ତ ଅଛନ୍ତି  ।