ବର୍ଷା ଧୋଇନେଲା ବର୍ଷକର ପରିଶ୍ରମ, ଚିନ୍ତାରେ ଚାଷୀ

ବାଲେଶ୍ୱର: ବର୍ଷା ଧୋଇ ନେଲା ବର୍ଷକର ପରିଶ୍ରମ । ମୁଣ୍ଡରେ ହାତ ଦେଇ ବସିଛି ଚାଷୀ । ବର୍ଷ ଯାକ ପରିଶ୍ରମ କରି ଯାହା ଉପାର୍ଜନ କରିଥିଲା ଅଦିନିଆ ବର୍ଷା ସବୁ ନଷ୍ଟ କରିଦେଲା । ସାରା ଦେଶରେ ଲକ୍‌ ଡାଉନ୍‌ ଯୋଗୁଁ ଚାଷୀ ହନ୍ତସନ୍ତ ହେଉଥିବା ବେଳେ ଅଦିନିଆ ବର୍ଷା ଚାଷୀଙ୍କ ମୁଣ୍ଡରେ ବୋଝ ଉପରେ ନଳିତା ବିଡ଼ା ସାଜିଛି ।

ବାଲେଶ୍ୱର ଜିଲ୍ଲା ଜଳେଶ୍ୱର ଭୋଗରାଇ ଅଞ୍ଚଳରେ ଚାଷୀ ଧାନ ସଂଗ୍ରହ କରି ଖଳାରେ ରଖିଥିଲେ । ଧାନ ବିକ୍ରି ହେବା ପୂର୍ବରୁ କାଳବୈଶାଖୀ ସବୁ ଧାନ ନଷ୍ଟ କରି ଦେଇଛି । ଖଳାରେ କ୍ୱିଣ୍ଟାଲ କ୍ୱିଣ୍ଟାଲ ଧାନ ସୁଖାଯାଇଥିବା ବେଳେ ତାହା ଓଦା ହୋଇ ନଷ୍ଟ ହୋଇଛି । କିଛି ଧାନ ଗଜା ହେବାକୁ ବସିଥିବା ବେଳେ ଆଉ କିଛି ଧାନ ବର୍ଷା ପାଣିରେ ଭାସିଯାଇଛି ।

ରାଜ୍ୟରେ ଗତ ୪-୫ ଦିନ ହେବ ବିଭିନ୍ନ ସ୍ଥାନରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି । ଉପକୂଳବର୍ତ୍ତୀ ଅଞ୍ଚଳରେ ନିୟମିତ ଭାବେ ବର୍ଷା ହେଉଥିବାରୁ ସବୁ ଫସଲ ନଷ୍ଟ ହୋଇଛି ।