ବ୍ରାହ୍ମଣ ନିଯୋଗ ସହ ଆଲୋଚନା ବିଫଳ: ୭ ଦିନ ଯାଏଁ ବନ୍ଦ ରହିବ ପ୍ରଭୁ ଲିଙ୍ଗରାଜଙ୍କ ନୀତିକାନ୍ତି!

ଭୁବନେଶ୍ୱର: ମହାପ୍ରଭୁ ଲିଙ୍ଗରାଜଙ୍କ ନୀତିକାନ୍ତି ବନ୍ଦ ପ୍ରସଂଗ । ବ୍ରାହ୍ମଣ ନିଯୋଗ ସହ ମନ୍ଦିର ଟ୍ରଷ୍ଟର ଆଲୋଚନା ବିଫଳ । ୭ ଦିନ ପାଇଁ ନୀତିକାନ୍ତି ବନ୍ଦ ପାଇଁ ନିଷ୍ପତ୍ତି ନେଇଛି ବ୍ରାହ୍ମଣ ନିଯୋଗ । ଏହି ସମୟରେ ଉଭୟ ଲିଙ୍ଗରାଜ ଓ ରାମେଶ୍ୱର ମନ୍ଦିରରେ ସ୍ୱତନ୍ତ୍ର ପୂଜା ଅନୁଷ୍ଠିତ ହୋଇଥାଏ ।

କିନ୍ତୁ ଆଗାମୀ ୭ ଦିନ ଯାଏଁ ହୋଇପାରିବନାହିଁ । ତେବେ ଏହାର ବିକଳ୍ପର ବିକଳ୍ପ ବ୍ୟବସ୍ଥା ନେଇ ଅତ୍ୟନ୍ତ ଖାମଖିଆଲଭାବେ ମତ ରଖିଛନ୍ତି ବ୍ରାହ୍ମଣ ନିଯୋଗ ସମ୍ପାଦକ ବିରଞ୍ଚି ନାରାୟଣ ପତି । ସେ କହିଛନ୍ତି, ଯେଉଁ ରାଜା ତଥା ମନ୍ଦିର ନିର୍ମାତା ଏହି ନୀତିକାନ୍ତି ଆରମ୍ଭ କରିଥିଲେ ତାଙ୍କ ପାଖରେ  ଏହାର ବିକଳ୍ପ ଥିବ ।

ଅପରପକ୍ଷରେ ୭ ଦିନ ଯାଏଁ ନୀତିକନ୍ତି ବନ୍ଦ ହେବନି । ଆମେ ଆଉ ଥରେ ସେମାନଙ୍କ ସହ ଆଲୋଚନା କରିବୁ । କୋଭିଡ-୧୯ ପାଇଁ ଜାନିଯାତ୍ରା ବନ୍ଦ କରିବାକୁ କୁହାଯାଇଛି । ନୀତିକାନ୍ତି ନୁହେଁ । ପୁଣି ଥରେ ବିକଳ୍ପ ବ୍ୟବସ୍ଥା ନେଇ ଆଲୋଚନା କରିବୁ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି ଲିଙ୍ଗରାଜ ମନ୍ଦିର ଟ୍ରଷ୍ଟ ସଦସ୍ୟ ତଥା ବିଏମ୍‌ସି ଅତିରିକ୍ତ କମିଶନର ଅବନୀ ପଟ୍ଟନାୟକ ।

ସୂଚନା ଯୋଗ୍ୟ ଆଜି ମହାପ୍ରଭୁଙ୍କ ଋକୁଣା ରଥଯାତ୍ରା ଅନୁଷ୍ଠିତ ହେବାକୁ ଥିଲା । କିନ୍ତୁ କୋଭିଡ-୧୯ର ଭୟାବହତାକୁ ନଜରରେ ରଖି ଏହା ନକରିବାକୁ ମନ୍ଦିର ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଥିଲା । ଏହାପରେ ଅର୍ଥାତ ଗତକାଲି ଠାରୁ ବନ୍ଦ ରହିଛି ମହାପ୍ରଭୁ ଲିଙ୍ଗରାଜଙ୍କ ନୀତିକାନ୍ତି ।