spot_img

Latest Posts

IPL ୨୦୨୭ ମିନି ଅକ୍ସନ ପୂର୍ବରୁ ବଡ଼ ହଲଚଲ, ରିଟେନ୍ ଓ ରିଲିଜ୍ ତାଲିକାରେ ବଡ଼ ଓଲଟପାଲଟ!

ନନ୍ଦିଘୋଷ ବ୍ୟୁରୋ: ଆଇପିଏଲ୍ ୨୦୨୭ ମିନି ଅକ୍ସନ ପୂର୍ବରୁ ବଢ଼ିଲା କ୍ରିକେଟ୍ ପ୍ରେମୀଙ୍କ ଉତ୍ସାହ। ସମସ୍ତ ୧୦ଟି ଫ୍ରାଞ୍ଚାଇଜ୍ ନିଜ ନିଜର ରିଟେନ୍ ଓ ରିଲିଜ୍ ଖେଳାଳିଙ୍କ ଚୂଡ଼ାନ୍ତ ତାଲିକା ଜାରି କରିଛନ୍ତି। ଏଥର ରିଟେନସନ୍ ତାଲିକାରେ ଦେଖିବାକୁ ମିଳିଛି ଅନେକ ଓଲଟପାଲଟ।

ଗୋଟିଏ ପଟେ ଚେନ୍ନାଇ ସୁପର କିଙ୍ଗ୍ସର ‘ଥାଲା’ ମହେନ୍ଦ୍ର ସିଂ ଧୋନି ଖେଳାଳି ଭାବେ ଆଇପିଏଲକୁ ଅଲବିଦା କହିଥିବା ବେଳେ, ଅନ୍ୟପଟେ ଅନେକ ଷ୍ଟାର ଖେଳାଳିଙ୍କୁ ଦଳରୁ ରିଲିଜ୍ କରାଯାଇଛି। ରିଟେନସନ୍ ପୂର୍ବରୁ କିଛି ବଡ଼ ଟ୍ରେଡ୍ ମଧ୍ୟ ଦେଖିବାକୁ ମିଳିଛି। ମୁମ୍ବାଇ ଇଣ୍ଡିଆନ୍ସ ହାର୍ଦ୍ଦିକ ପାଣ୍ଡ୍ୟାଙ୍କୁ ପଞ୍ଜାବ କିଙ୍ଗ୍ସକୁ ଟ୍ରେଡ୍ କରି ତାଙ୍କ ବଦଳରେ ଅର୍ଶଦୀପ ସିଂଙ୍କୁ ଦଳରେ ସାମିଲ କରିଛି। ସେହିପରି ଋଷଭ ପନ୍ତ ପୁଣି ଥରେ ଦିଲ୍ଲୀ କ୍ୟାପିଟାଲ୍ସକୁ ଫେରିଥିବା ବେଳେ କୁଲଦୀପ ଯାଦବ ଲକ୍ଷ୍ନୌ ସୁପର ଜାଏଣ୍ଟସକୁ ଯାଇଛନ୍ତି।  ଅକ୍ସନ ପର୍ସ ବଢ଼ାଇବା ପାଇଁ ଫ୍ରାଞ୍ଚାଇଜ୍ ଗୁଡ଼ିକ ଅନେକ ଦାମୀ ଖେଳାଳିଙ୍କୁ ରିଲିଜ୍ କରିଛନ୍ତି।କେକେଆର୍ ୧୮ କୋଟି ଟଙ୍କାର ଦାମୀ ବୋଲର ମଥିଶା ପଥିରାନା, ମୁସ୍ତାଫିଜୁର ରହମାନ ଓ ଅଜିଙ୍କ୍ୟ ରାହାଣେଙ୍କ ସମେତ ୧୨ ଜଣ ଖେଳାଳିଙ୍କୁ ରିଲିଜ୍ କରିଛି। ତେବେ ଦଳ କ୍ୟାମେରନ୍ ଗ୍ରୀନଙ୍କୁ ରିଟେନ୍ ରଖିଛି। ମୁମ୍ବାଇ ଇଣ୍ଡିଆନ୍ସ ଟ୍ରେଣ୍ଟ ବୋଲ୍ଟ ଓ ଦୀପକ ଚହରଙ୍କୁ ରିଲିଜ୍ କରିଥିବା ବେଳେ ଦିଲ୍ଲୀ କ୍ୟାପିଟାଲ୍ସ ଅଷ୍ଟ୍ରେଲୀୟ ପେସର୍ ମିଚେଲ ଷ୍ଟାର୍କଙ୍କୁ ଦଳରୁ ମୁକ୍ତ କରିଛି। ସନରାଇଜର୍ସ ହାଇଦ୍ରାବାଦ ଟ୍ରାଭିସ୍ ହେଡ୍ , ରାଜସ୍ଥାନ ରୟାଲ୍ସ ସିମରନ୍ ହେଟମାୟର ଓ ଲକ୍ଷ୍ନୌ ସୁପର ଜାଏଣ୍ଟସ୍ ଅଭେଶ ଖାନଙ୍କୁ ରିଲିଜ୍ କରିଛି।

ଡିଫେଣ୍ଡିଂ ଚାମ୍ପିୟନ୍ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ବିରାଟ କୋହଲି ଓ ଅଧିନାୟକ ରଜତ ପାଟିଦାରଙ୍କ ସମେତ ୨୦ ଜଣ ଖେଳାଳିଙ୍କୁ ଦଳରେ ବଜାୟ ରଖିଛି। ରିଟେନସନ୍ ପରେ ଲକ୍ଷ୍ନୌ ସୁପର ଜାଏଣ୍ଟସ୍ ପାଖରେ ସର୍ବାଧିକ ୪୭.୪୫ କୋଟି ଟଙ୍କା ବଳକା ରହିଛି। ଏହା ପଛକୁ କୋଲକାତା ନାଇଟ୍ ରାଇଡର୍ସ  ପାଖରେ ୪୧.୬୫ କୋଟି ଓ ସନରାଇଜର୍ସ ହାଇଦ୍ରାବାଦ  ପାଖରେ ୪୦.୧୫ କୋଟି ଟଙ୍କା ରହିଛି। ଦିଲ୍ଲୀ କ୍ୟାପିଟାଲ୍ସ ପାଖରେ ୩୯.୫୦ କୋଟି, ମୁମ୍ବାଇ ଇଣ୍ଡିଆନ୍ସ ପାଖରେ ୩୨.୬୦ କୋଟି, ଚେନ୍ନାଇ ସୁପର କିଙ୍ଗ୍ସ ପାଖରେ ୨୮.୦୫ କୋଟି ଓ ରାଜସ୍ଥାନ ରୟାଲ୍ସ ପାଖରେ ୨୭.୦୫ କୋଟି ଟଙ୍କା ରହିଛି। ସେହିପରି ପଞ୍ଜାବ କିଙ୍ଗ୍ସ ପାଖରେ ୧୮.୬୦ କୋଟି ଓ ଡିଫେଣ୍ଡିଂ ଚାମ୍ପିୟନ୍ ଆରସିବି (RCB) ପାଖରେ ୧୪.୧୫ କୋଟି ଟଙ୍କା ରହିଛି। ସେପଟେ ଗୁଜରାଟ ଟାଇଟାନ୍ସ (GT) ପାଖରେ ସବୁଠାରୁ କମ୍ ଅର୍ଥାତ୍ ମାତ୍ର ୮.୭୫ କୋଟି ଟଙ୍କା ବଳକା ଅଛି।

ଆଇପିଏଲ୍ ୨୦୨୭ର ମିନି ଅକ୍ସନ୍ ଆସନ୍ତା ଡିସେମ୍ବର ୧୬ ତାରିଖରେ ଗୋଆରେ ଅନୁଷ୍ଠିତ ହେବ। ଏହି ନିଲାମୀରେ କେଉଁ ଦଳ କେଉଁ ଖେଳାଳିଙ୍କ ଉପରେ ବଡ଼ ବୋଲି ଲଗାଉଛି, ତାହା ଉପରେ ଏବେ ସାରା କ୍ରିକେଟ୍ ଜଗତର ନଜର ରହିଛି ।

Latest Posts

Don't Miss