ନନ୍ଦିଘୋଷ ବ୍ୟୁରୋ: ପୋଲିସ୍ ଡାଳେ ଡାଳେ ଗଲେ ପତ୍ରେ ପତ୍ରେ କ୍ରିମିନାଲ । କ୍ରାଇମ ରୋକିବାକୁ ଅଣ୍ଟା ଭିଡ଼ିଲା ପୋଲିସ୍ । ଫୁଟ ପାଟ୍ରୋଲିଂ ସାଙ୍ଗକୁ ନିଶା ଆଡ୍ଡାରେ ଛାପା । ସ୍କାନର୍ ରେ ପେସାଦାର ଅପରାଧୀ ଓ ନିଶା ମାଫିଆ । ୫ ତାରିଖ ରାତି । ଭୋଜିଭାତ ଆୟୋଜନ ଭିତରେ ଫୁଟିଲା ଗୁଳି । ବନ୍ଧୁକ ପାର୍ସଲ ଅନ୍ ବକ୍ସିଂ କରିବା ବେଳେ ଚାଲିଗଲା ତପୁ ନାୟକଙ୍କ ଜୀବନ । କେସରେ ତଦନ୍ତ କରିବା ବେଳେ ୮ ଜଣଙ୍କୁ ଗିରଫ କଲା ଧଉଳି ଥାନା ପୋଲିସ । କ୍ରାଇମ ସ୍ପଟରୁ ଜବତ ହେଲା ବନ୍ଧୁକ । ଆଜି ସେହି ବନ୍ଧୁକ ଡିଲ୍ ଓ ରୁଟମ୍ୟାପ ସମ୍ପର୍କରେ ଜାଣିବା ପାଇଁ ମୁଖ୍ୟ ଅଭିଯୁକ୍ତ ଚିତ୍ରସେନ ଗଜେନ୍ଦ୍ର ଓ ଉମେଶ ପଟ୍ଟନାୟକଙ୍କୁ ୨ ଦିନିଆ ରିମାଣ୍ଡରେ ଆଣିଛି ଧଉଳି ଥାନା ପୋଲିସ । ଲକ୍ଷ୍ମୀସାଗର ଗୁଳିକାଣ୍ଡରେ ମଧ୍ୟ ବନ୍ଧୁଜ ଜବତ ହେବା ପରେ ପୋଲିସ ପାଇଁ ମୁଣ୍ଡବିନ୍ଧାର କାରଣ ପାଲଟିଛି ବନ୍ଧୁକ ଚୋରା ଚାଲାଣ । ତେଣୁ ବନ୍ଧୁକ ବେପାରୀଙ୍କ ଲିଙ୍କ, ଆର୍ମ ସିଣ୍ଡିକେଟ ସମ୍ପର୍କରେ ଜାଣିବା ପାଇଁ ହୋଇପାରେ ବ୍ୟାପକ ଖୋଳତାଡ଼ ବୋଲି ସୂଚନା ଦେଇଛନ୍ତି ଡିସିପି ।
ସହରର ଛାତି ଉପରେ ଅପରାଧୀ ହଲ୍ଲାବୋଲ ଡାକରା ଦେଉଥିବା ବେଳେ ତାଙ୍କୁ ମାତ୍ ଦେବାକୁ ଆରମ୍ଭ ହୋଇଛି ଥାନାୱାରୀ ଫୁଟ ପାଟ୍ରୋଲିଂ । ବସ୍ତି ଓ ସମ୍ବେଦନଶୀଳ ଅଞ୍ଚଳରେ ଛାପା ମରାଯାଉଛି । ଗୋଷ୍ଠିବଦ୍ଧ ହୋଇ ଅପରାଧିକ ଷଡଯନ୍ତ୍ର କରୁଥିବା ସନ୍ଦିଗ୍ଧଙ୍କୁ କାବୁ କରାଯାଉଛି । ନିଶା ଆଡ୍ଡା ଗୁଡିକରେ ସ୍ପେଶାଲ ସର୍ଭେଲାନ୍ସ ରହିଛି । ନିଶା କାରବାର କରୁଥିବା ବ୍ୟକ୍ତି ବିଶେଷଙ୍କୁ NDPS କେସରେ ବୁକ କରାଯାଉଛି । ରାତି ତମାମ ଥାନା ଆଇଆଇସି ମାନେ ଘନ ଘନ ପାଟ୍ରୋଲିଂ କରୁଥିବା ଦେଖାଯାଇଛି । ଖଟି ମାନଙ୍କରେ ଅସାମାଜିକ ଓ ଅପରାଧିକ ତତ୍ତ୍ୱ ଭିଡ଼ ଜମାଉଥିବା ବେଳେ ସେମାନଙ୍କର ଉପରେ ପୋଲିସର ସନ୍ଧାନୀ ଆଖି ରହିଛି । ସେପଟେ ବସ୍ତି ମିତ୍ରଙ୍କ ସହ ମିଶି ବସ୍ତିରେ ଘଟୁଥିବା ଅପରାଧ ରୋକିବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ ହୋଇଥିବା କହିଛନ୍ତି ଡିସିପି । ପ୍ରମୁଖ କେସମାନଙ୍କରେ ଅଭିଯୁକ୍ତଙ୍କୁ ପୋଲିସ ଧରିଥିବା ବେଳେ ଲକ୍ଷ୍ମୀସାଗର ଘର ମାଲିକାଣୀ ହତ୍ୟା ଘଟଣାରେ କେୟାର ଟେକର ଫେରାର ରହିଛି ।
